[微血腥] 覺能之戰 (逢二、四更新): 覺力賽篇第十一章: O隊的卧底戰 (一)

五人其後到訓練場練至當日賽事完結後就解散。翌日，梓旻起床後發現Albert傳訊息給他，原來因為有突發行動，上午的比賽被取消了。梓旻回到O隊辦公室嘗試了解現況，留在辦公室裡的人只有下午有賽事的鹿仔五人。

「發生咩事？」梓旻問

「離島區出現一隻紅核，頭三節嘅賽事取消，頭三節嘅參賽者部分要出行動。而後三節嘅參賽者待命，如果十一點前完成任務，賽事會如常進行。」Kiki回答

「唉⋯點解我哋係第四節，早一節咪好囉！我賭廿蚊會取消我哋場比賽！」亞豪埋怨

「成日都掛住賭！我賭十蚊會繼續比賽！」Kiki放下十元





「乜你好想繼續咩？」亞豪問

「我都估繼續，今次嘅怪物係紅核，難度會低啲。廿蚊。」鹿仔放下二十元

「我估取消，今次離島區救援會慢啲，而且而家已經十點。」亞豪放下三十元

「我都估取消。」富哥放下十元

「梓旻你落唔落注？」亞豪問





「你唔好帶壞新人啦！」Kiki插嘴

「你冇份？」亞豪反駁

「至少我冇主動邀請。」Kiki 道

「我都係唔落注喇⋯」梓苦笑搖頭

「唓⋯」亞豪把所有錢整理好，就在此時，辦公室內的中央咪響起音樂，然後宣布第四節比賽如常進行。





「Yeah!」Kiki大聲歡呼

「紅核！我對你太失望！」亞豪抱頭大叫：「Kiki，你講得啱！我哋唔應該教壞新人，呢場賭局唔計！」

「食屎啦！願賭服輸呀！」Kiki仲出手掌要求亞豪把錢交出：「速速磅水！」

「估唔到原來覺力祭都仲要出行動。」梓旻有點不解，看著亞豪萬分不願的把錢交出

「本身覺力祭都係為咗提升部隊聲譽同民望嗻！如果有行動唔出咪本末倒置？」亞鹿解釋，同時把Kiki給的錢接過來

「少咗觀眾都係件好事！」亞豪笑言，續說：「反正仲有五個鐘，我返去瞓一瞓先。」

「我都係。」其他人也打算回去休息。離開前鹿仔拍拍梓旻肩頭：「梓旻記得同我哋打氣。」

「可能可以再見證我協助打低亞豪嘅一刻。」Kiki笑言





「你仲有冇當過我係你哥？」亞豪皺眉望著Kiki

「有，所以先只係協助，冇直接攻擊！」Kiki得意的道

「有分別？」亞豪不爽的反問

「有！」Kiki大聲回答，再快速離開辦公室，亞豪邊跟上邊碎碎念

「亞豪永遠拗唔贏亞妹。」富哥笑說

於是，當日第四節時間，梓旻又再回到B區當值。Albert到來時，臉上有點倦意的和梓旻說：「今日你主力移動啦！我今朝出行動而家好攰。」

「今朝行動好難？」梓旻開啟所有監察用的儀器及檢查其功能





「唔太難，隻紅核係郊區而唔係民居，已經幫好大忙。只係帶一大班見習去現場視察，有啲攰嗻。」Albert伸懶腰，雖然他口說不累，但惓容已出賣他了

「可以去現場視察真好⋯」梓旻有點羨慕其他隊的見習隊員

「O隊係慘啲，一落場就嚟真。不過，視察都係超遠距離睇，冇乜嘢可以見到，你想像下，執行任務個陣，我哋冇理由俾新人阻住行動，又冇理由俾佢哋有危險，你就當係感受現場氣氛，你哋唔去冇乜蝕，真係要睇戰鬥，不如直接去實驗室睇資料片。」Albert敲敲螢幕，再從左側拿出汽水

「實驗室啲資料我哋睇得㗎咩？」梓旻記得美慧曾威脅他們看文件則報告給上司知

「當然啦！只要你係隊員就睇得㗎喇！」Albert大口喝下汽水