[微血腥] 覺能之戰 (逢二、四更新): 訓練篇第五章: O隊與AP訓練 (一)

四人進到會議室坐下，浩政不一會兒就帶著四份文件夾進來。他坐在主席位，開始閱讀手上的文件，大概是他們四人的入隊資料。接著他除下眼鏡，抺了抺道：「大家要有心理準備，每次出搜救，我地O隊基本上就係做其他隊嘅後備多。大家都明我哋隊俾人稱「棄兵」，尤其見習隊員，永遠冇份做正選。不過，如果你地做得好，升做隊員之後會受重用，有好幾個隊員受重用到幾個月返得嚟一兩次。一般而言，比較大型嘅搜救行動其他隊都會同返自己隊出，但我地就多數單獨行動或跟其他隊行動。而…訓練方面，其他隊都有內部培訓，我地隊都算有，但⋯會特別一啲。」
 
浩政打開文件：「好似阮超同君詡，我地隊就得一個人係以力量為AP，但佢就…比較…暴躁少少。如果你地同佢溝通唔嚟就同我講，我幫你地申請直接去P隊接受訓練啦！而麗瑤，我哋隊有三個都係念力AP，唯一嘅女同事Crystal 被暫時調走咗，你就問其他兩個人啦！梓旻你同我一樣A Mark，我就盡力幫你啦！訓練係自己安排，你地鍾意點就點，反正冇作為兩年就會被淘汰，呢個就係作為O隊所要面對嘅問題。明白未？」
 
「明白。」四人齊聲回應
 
「食咗午餐未？」眾人搖頭，浩政打開會議室門：「鹿仔！用我積分買嘢食啦！呀…約埋其他人開個歡迎會啦！」
 
「OK！」鹿仔高聲回應
 




「梓旻，你⋯諗好幾時訓練就係我個時間表度Mark低。um⋯時間表係我房個白板上面，我決定好就會send信息去你錶度，同係出面通告板寫低時間。」浩政說完就離開回自己辦公室去
 
「喂！你地想食乜？唔使慳喎！佢成日幫人，儲咗好多積分，夠我地食一年！」鹿仔招手示意他們過來
 
「幫人有得賺積分？」詡問
 
「有！幫其他隊本身唔係我地隊嘅職責嚟㗎嘛！係我地O隊嘅優勢，我地多數都冇行動出，當你被其他隊發掘之後，其他隊爭住請你個陣，賺積分賺到笑！而家我幾乎每餐都免費！所以一有行動或者幫人個陣記得show下自己能力呀！」
 
「咁今日⋯我地要做咩？」梓旻問
 




「冇，坐囉！等到有通知為止，鍾意可以玩下board game或者喺電腦下載game玩。又或者去訓練場練習，但一陣我就會走，呢度要留低最少兩個人比較好，至少接到幫忙請求都有人接應，你地自己諗啦！」鹿仔再想了想：「係喇！記得報更！如果唔係水晶姐實鬧死我！仲有，佢有講過你地頭一星期每日隨便搵8個鐘打卡就得，8個鐘內包一個鐘食飯時間，出面電視隔離有部機，可以打卡同換積分，未打而家打啦！」
 
他們四人選了午餐後，便討論安排，他們決定享用午餐後剩下的兩小時分兩批休息。未知何故，就只有阮超的午餐點錯了，這令阮超低聲投訴了一會。享用完午餐，梓旻見浩政仍在忙，也不好意思入房內填寫訓練時間打擾他工作，他和詡二人留在辦公室，他們拿了些棋類遊戲玩了一小時。其他二人回來後，他們二人到處閒逛，第一天這樣就完了。
 
由於梓旻發現浩政又要通宵當更，他相信早上浩政仍未回辦公室，所以第二天就早早回到辦公室填寫自己可接受訓練的時間。早上的辦公室靜寂一片，他填完時間後也沒什麼可以做，所以他打開電腦下載遊戲。就這樣玩了三小時，下午十二時終於聽到開門聲。一個拿著三大個紙皮箱的人笨手笨腳的走進來，梓旻立即上前幫忙。