【奇幻短篇】最後一日: 遲來嘅後記

之前陸續聽到幾個朋友嘅意見之後，我先意識到，原來我想表達嘅嘢可能太隱晦，所以都想喺到自己解下畫：

最後一日，除咗指一年最後一日，亦都係男主家謙生命最後一日，喺呢個故事入面，家謙同女主阿瑩係年頭先識，如果家謙抽到今年早啲嘅日子死，佢就可能識唔到阿瑩，佢哋兩個之後亦都唔會有一年相戀嘅開心日子，但阿瑩之後亦都唔會因為家謙嘅死而傷心。

塞翁得馬，焉知非禍？塞翁失馬，焉知非福？我係希望帶出一種禍福相依同陰差陽錯嘅意思。

如果你係家謙/阿瑩，會寧願由始至終大家都唔識，所以唔洗生離死別，定係明知最後冇好結果，都想經歷呢一年一齊嘅時光呢？

另外，呢個故事嘅靈感來源係嚟自上年除夕嗰單車禍，然後我嘗試由樂觀嘅角度睇返件事，如果死者注定係要嗰年死，但佢抽到最後一日先死，死之前又過得開心，咁算唔算不幸之中嘅大幸呢？