我把愛，遺留在圖書館內: 第十六章

深水埗近南昌村附近，天橋行前一點，有一間小小的車仔麵店，那時十三元有一碗三餸車仔麵，穿校服會有豆漿送，對學生來說，簡直是恩物，我和阿曦經常放學後會到那裡。
 
「今日咁早去左食飯既？」
 
阿曦呼呼的吹著熱燙燙的河粉，吃了兩口然後說：「係啊，今日女仔猜輸左，所以要去霸位先。」
 
「喔……長洲好唔好玩？」我問。
 
「牛腩翼尖蘿蔔河粉。」車仔麵的阿姐遞上我點的那碗過來。
 


「好玩啊，不過佢地玩得好癲。」我一邊聽一邊將蘿蔔夾進阿曦的碗中，因為她最愛吃這個。
 
之後她說許多她那幾天的經歷，包括一班人，借了電磁爐在房間打邊爐、去沙灘游水、踏單車、吃甜品和講鬼故、聊天到天明。
 
「嘩，你知唔知啊，我仲踩踏單車果時，條街突然衝個小朋友出黎，搞到我避佢唔小心炒左車，跌到膝頭流血，超痛！指意果班人真係死，一枝箭唔知去左邊！」她氣憤的說。
 
「咁點算？」看到她氣鼓鼓這個模樣，我不禁笑了出來。
 
「好在，阿峰果時係我隔離，佢有帶膠布，不過我痛到踩唔到啦。」
 


我突然心跳跳得很快，整個人變得驚恐起來。
 
「咁……跟住呢？」
 
「跟住佢同我去換左架家庭單車。」
 
「妳被佢載？」
 
「係啊。」
 


過了幾秒後，她發覺我有點異樣，忽然明白什麼，就開口說：「我真係好痛踩唔到嘛，但又唔通拋低我一個咩？所以佢先載我咋，你唔好亂諗啦。」
 
我明白，可是，我心裡不太舒服。
 
「妳可唔可以唔好咁近佢？」
 
「邊個？」
 
「阿峰。」
 
「點解啊？阿峰係我好朋友。」
 
好朋友？他不是近排才跟你們那群人混熟嗎？
 
「我唔想。」


 
「我地都無野！」阿曦的語氣開始強硬起來，看得出她動了情緒。
 
「但我唔中意……妳可唔可以……？」
 
「係你可唔可以唔咁？點解唔信我？唔信我朋友？」
 
我們的爭吵已經引起整間店的注意。
 
 
「你當為左我得唔得？」
 
 
「點解唔係你為左我去接受？」
 


 
「我有，我有試過架！」
 
 
「咁就唔好咁無理。」
 
 
聽到這一句，我不知怎地突然火起來，大聲的問了她一句：「咁妳真心咁講，妳同佢係長洲無單獨兩個人相處過？」
 
 
我爆了一句，我心中一直藏著的那一句，憂患的那一句。
 
 
「曦？」
 


 
她低頭的沉默起來。
 
 
沒有回應。
 
 
我感覺到全身的血管都冷凝了起來。
 
 
不敢相信。
 
 
「屌！」我拋下一句粗口就衝走了，連錢也忘了付。
 


 
望著眼淚 如油彩般 記載變色的一剎那