穿越時空，冒充平行世界嘅另一個自己，再去呃佢條女上床: 後記---美國鷹篇
返到嚟自己嘅時空，美國鷹第一件事就係去拜祭好朋友阿榮。
雖然帝洛斯死左，仇亦都已經報左，但嗰種失去好友嘅痛仍難以撫平。
而其實喺佢離開上個時空之前，佢喺嗰個時空嘅阿榮手中，拎左一粒靈魂螺絲返嚟。
即係話，如果佢可以喺地獄召喚阿榮嘅靈魂返嚟，咁或者就可以令對方「起死回生」。
離開墓地，佢先去親戚屋企接返走隻狗，再去郵局交返啲電費水費同上網費。
返屋企之後，佢就打開電腦，上網搜尋關於招魂、通靈相關嘅資料。
就咁揾左一陣，結果俾佢發現屋企附近有一個自稱識得招魂嘅通靈師。
如果喺華人嘅世界，要召喚亡魂上嚟人間，應該就要去揾啲問米婆，又或者茅山道士，而喺西方嘅世界就係揾通靈師。
隔日，美國鷹就按住網站提供嘅地址，揾到嗰一位通靈師。
對方係一個老到頭髮都白曬嘅阿婆，頭上戴住條印住奇怪圖案嘅頭巾，面前放置住一個紫色水晶球。
至於間房嘅佈置就古靈精怪，有燈唔開而係點蠟燭，四圍又擺放住一啲奇形怪狀嘅晶石。
美國鷹第一次嚟到呢啲咁嘅地方，感覺有啲唔自在。
「Welcome to my place」通靈師一開口，把聲低沉到成個男人咁。
而美國鷹事先已準備左阿榮嘅全名、出生日期、死亡日期等資料。
佢將呢啲資料交俾通靈師，然後拜託對方召喚阿榮嘅靈魂返嚟。
「I can do this, but…」通靈師講到個「but」字，說話就停頓落嚟。
「But what？」美國鷹追問。
通靈師乾咳兩聲，擺一副好嚴肅嘅表情，用低沉嘅聲線，問阿榮生前有無同佢有過過節。
一講到過節，美國鷹就諗起自己搞過阿榮老婆。
通靈師嚴重警告，假如死者生前同諮詢人有過節嘅話，一旦召魂，隨時有機會招致惡靈。
美國鷹心諗，假設阿榮死嗰刻都仲未唔原諒佢，咁可能變惡靈嚟搵佢算賬。
佢一方面驚好朋友會變成惡靈，另一方面又好想阿榮「返生」。
猶豫左一陣，最後佢都係選擇博一鋪，決定招魂。
由於有招引惡靈嘅風險，所以通靈師話要加錢，由原價100蚊美金，加至400蚊。
價錢一加就加咁多，美國鷹心諗對方頭先講咁多，睇嚟只係想作個藉口賺多啲。
然而既然都一場嚟到，貴少少佢都照俾。
通靈師笑笑口咁收好筆錢，然後瞇埋眼，對住面前水晶球念起咒語。
通靈正式開始。
「drjijbyyx…」對方好似鬼食泥咁，口噏噏施展緊啲聽唔明嘅咒語
唔知係咪心裡作用，美國鷹漸漸感覺到陣陣陰氣，全身沾寒沾凍。
突然「砰」嘅一聲！
道門無啦啦打開左，一陣陰風「呼呼呼」猛咁吹入嚟。
屋內嘅蠟燭眨下眼統統吹熄曬，四周圍瞬間變得漆黑一片。
美國鷹坐立不安，佢開著部電話照明，睇見通靈師依然好淡定咁對住水晶，快速念緊咒語。
殊不知下一秒，個水晶球爆開左。
通靈師更好似發羊吊咁，全身痙攣，手腳抽搐。
「Are…are you ok?」美國鷹騰騰震，不知所措。
「No…」通靈師口吐白沫，成個人趴喺檯面暈左。
同一時間，嗰陣猛吹嘅陰風都停左落嚟。
美國鷹即刻檢查對方嘅脈搏，好在發現對方仲未死。
跟住佢拎起電話報警。
「怦怦！怦怦！」
撥通電話，聽到嘅唔係嘟嘟聲，而係「怦怦」嘅聲音。
怦怦！怦怦！怦怦！
聽真啲，呢啲都係佢心跳被放大嘅聲音。
美國鷹唔理咁多，cut線再打過。
打到第五次，卒之打通左！
佢同警局啲人講有個阿婆暈左，叫佢地快啲派十字車嚟救人。
對方回覆話十分鐘內就會派人到達現場。
一收左線，暈低嘅通靈師居然又趌返起身。
昏暗環境下，只得電話發出嘅光喺度照明。
美國鷹嘅視線隨住光線望去，只見通靈師啲眼耳口鼻縮埋一舊，真係嚇鬼死人
佢驚到馬上退後，口震震咁問：「阿榮，is that you？」
可惜得到嘅回應就係無回應。
三秒之後，通靈師再一次摞低。
「怦怦！怦怦！怦怦!」
美國鷹嘅心跳快到唔洗放大都聽得到。
此時此刻，間房唔單止黑麻麻，而且變得好安靜。
安靜到一啲聲音都無。
直覺講俾美國鷹聽，阿榮已經返左嚟。
佢繼續利用電話照明功能，好認真咁嘗試喺間房入面，揾個鬼魂出嚟。
光線喺漆黑房間內移動，佢先照去角落頭，咩都見唔到，之後又慢慢順住幅墻，照上去天花板…
「Hey！」
背脊突然傳出一把粗曠嘅聲音。
美國鷹打左個突，戰戰兢兢咁擰轉面，見到嘅唔係鬼。係人。
救援隊行動比想象中迅速，只係用左五分鐘就到左。
佢地一行五人，嚟到第一時間當然係搶救昏迷者。
而經診斷後，通靈師被確定為中風。
明明一開始仲好地地，偏偏喺通靈嘅過程間居然就中風？
此事必有蹺蹊，Mike擔心會唔會就係阿榮嘅惡靈搞鬼？
時間過左半個鐘。
幾個差佬同美國鷹錄左份口供，之後先放佢走。
「滴噠—滴噠—」
天空陰陰沉沉，落起好大嘅雨。
美國鷹雙手遮頭，快步冒住雨跑上車。
撻著架車，一開個冷氣，啲風就從冷氣口「fung fung」聲咁吹埋嚟。
美國鷹伸手去較返細，但扭嚟扭去，啲冷氣吹出嚟都係咁大。
「滴噠—滴噠—滴噠—」與此同時，外面嘅雨勢就越嚟越大。
密密麻麻嘅雨點不停敲打前後左右嘅車窗。
此地不宜久留，美國鷹唔理咁多，拿拿聲開車走人。
「乞嚏！」啲冷氣吹到佢係咁打乞嚏。
一路上佢凍到震曬咁扭軚揸車。
「咚！」
架車行到中途，車尾箱後面響起一啲被撞擊嘅聲。
「咚！」
個感覺就係有人喺度大力敲打車尾箱：「咚！」
「阿榮，係你嘅話就出嚟啦，唔好再搞埋啲小動作嚟嚇我！」美國鷹對住空氣講嘢。
點不知此話一出，車尾箱嗰啲聲就停左，個冷氣仲自動閂細埋。
最後轉埋兩個彎，美國鷹就安全返到屋企。
將架車泊入車庫，落車之後，佢行到去車尾，想打開車尾箱睇一睇。
佢覺得阿榮嘅鬼魂跟左返嚟，兼且就匿左喺車尾箱入面。
望住個車尾箱，佢個心跳得好快，因為佢好驚。
佢驚自己最好嘅朋友真係變左可怕嘅惡靈。
喺電影入面，嗰啲惡鬼邪靈個樣全部都係好恐怖。
萬一阿榮真係成為左嗰啲臉容扭曲、血流披面嘅惡鬼，咁點算好？
「唉…」
美國鷹歎氣，心諗無論，佢都想再見對方一面。
最起碼，佢想再親口同對方講一聲對唔住，為佢所做過嘅事致歉。
於是做好心理準備，深呼吸一口氣後，美國鷹抽起車尾箱。
瞪大眼一望，裡面空空如也，乜嘢都無。
奇怪…無理由架...阿榮佢走左…？
「乞嚏！」
啱先啲冷氣開到咁大，搞到佢依家冷親作感冒。
佢拿拿臨返入屋，沖返個熱水涼，暖下個身。
未離婚之前，每次返到屋企，佢老婆Jenny都會較定水俾佢沖涼。
不過依家返到屋企，就得返佢隻狗會肯埋嚟嗲佢。
聽啲親戚講，佢前妻已經搬嚟左香港，返左去芝加哥。
因此想重拾舊好睇嚟都無乜可能。
間屋少左個人，感覺都靜左好多，美國鷹開著部Hi-Fi，播放啲柔和嘅音樂，令間屋無咁空洞。
餵完隻狗之後，佢就行上樓沖涼。
然而，由入屋到行入沖涼房，其實佢都一路凝住，阿榮嘅鬼魂仲喺一直跟住佢。
問題係每次當佢擰轉頭，甚至三百六十度望勻曬，都唔見對方嘅蹤影。
沖完涼，美國鷹返入房，打開電腦覆一覆公司嘅郵件。
走左成個月，個email信箱幾乎塞爆曬，大部分都係啲客同上司嘅信件。
搞左一大輪，做好曬啲公事，見時間尚早，未夠鐘訓教，佢於是就喺床下底，摷隻塵封嘅遊戲碟出嚟。
Battle of Aliens。呢隻係佢同阿榮最鐘意玩嘅game。
親身見識過外星人，勾返起佢鋪癮，想回味一下遊戲入面嘅外星人。
插隻碟入電腦，拎起手掣，準備開波之際。
佢隻狗突然喺度吠：「汪汪！汪汪！」
一開始佢都無乜理，繼續打佢嘅機，不過後尾隻狗吠個唔停，佢逼不得已行出去睇下咩事。
佢隻狗喺走廊，對住書房門口，係咁喺度吠。
聽講動物嘅感應同人類唔一樣，有時佢地會感應到一啲人類感覺唔到嘅嘢。
莫非係隻狗感覺到書房入面有啲特別嘢？
美國鷹放輕腳步，慢慢行過去。
嚟到門口，佢先貼隻耳仔埋門，聽一聽裡面有無咩動靜。
結果入面咩聲都無。
然之後佢扭開門柄，推開道門。
「Shit！」
一隻腳踩入去，門口就出現一隻好似異形咁核突嘅物體，嚇到佢大嗌。
佢伸手啪著書房嘅燈，原來，原來隻嘢異形真係「異形」。
喺佢書房，本來就有一隻一比一嘅異形模型。
佢將隻嘢放返好，喺房內仔細查看。
書檯、書架、地下、天花板，全部睇過曬，都唔見有任何異樣。
「汪汪！」
呢個時候，佢隻狗又喺門外，向住天花板猛吠：「汪汪！」
「Stop！」美國鷹行返出去，叫隻狗唔好再叫，順便抬頭望一望。
殊不知，天花板出現一隻全身黑色，面目猙獰嘅鬼魂
「You fuck my wife！」厲鬼由上跳落嚟，叉住美國鷹條頸。
「Bro, I’m sorry…」
「Shut up！」化作惡靈嘅阿榮眼珠凸起，面容腐爛，個樣都幾得人驚。
美國鷹當係係想請求原諒，只不過惡靈似乎係要嚟算賬，唔單止半句聽唔入耳，仲不停攻擊發洩。
惡鬼同外星人唔同，外星人幾勁都好，你反擊都可以打得中，相反面對惡鬼，你完全都掂唔到佢，就只有俾佢打，
美國鷹額頭撞墻流血，喺無法反擊嘅情況下，佢只能逃跑。
佢轉身跑返入房，鎖埋道門，但係阿榮輕鬆就穿過，雙手緊緊捏住佢條頸。
「Damn you！」阿榮表情憤怒。
美國鷹掙扎左一陣就放棄左，一嚟好辛苦，二嚟佢於心有愧，的而且確係自己對唔住對方。
當佢以為自己死硬嗰陣，阿榮居然放軟左手腳。
嗰一對凸出嚟嘅眼珠，望住美國鷹身後嘅電腦。
屏幕顯示嘅遊戲，喚起左佢嘅回憶。
阿榮慢慢鬆開手，行到電腦面前，拎起一個手掣。
美國鷹唔知發生咩事，而咁嘅情況下，最好當然係逃跑，不過觀察左一陣，見對方似乎失去左惡意。
幾番猶豫後，佢選擇坐埋過去，拎起手掣進入遊戲畫面。
阿榮揀左佢最鐘意嘅機械怪人，美國鷹就用魔迪加。
「Game Start！」
由於呢隻係差唔多十幾年前出嘅遊戲，畫質並唔係好清。
佢地兩個坐埋一齊玩，感覺就好似返到中學時代一齊打機嗰陣咁。
阿榮最擅長就係用隻機械怪人呢個角色，儘管美國鷹用更高級嘅魔迪加都係打唔贏。
佢地玩完一鋪又一鋪，美國鷹都唔記得左對方係惡靈嘅身份，一邊打機，一邊開始講起自己喺另一時空，遇到外星人嘅經歷。
「The real Mordica can really fly, but he’s got a bad temper…」
講講下，美國鷹睄到隔籬本來係面容扭曲、充滿黑色怨氣嘅阿榮，個樣竟然出現變化，好似回復緊本來嘅樣。
「K.O.」
玩左咁多鋪，美國鷹終於贏返一鋪。
佢放低手掣，趁機會又同對方講對唔住：「Sorry, please forgive me.」
同時間，阿榮已經完全變返本來嘅面貌。
不過佢無講啲咩，只係淡然笑左一下，然後對住個mon話：「OK，next round！」
一切仿佛都在不言之中。
最後為左令阿榮嘅靈魂繼續留喺人間，美國鷹用靈魂螺絲將個魂魄，固定喺隻異形公仔度。
自此阿榮就成為左屋企嘅一份子。
（本篇完）