穿越時空，冒充平行世界嘅另一個自己，再去呃佢條女上床: （178）

魔迪加親手打敗左帝洛斯，而佢自己亦都油盡燈枯。

啱啱佢係耗盡自己嘅生命，先使得出最後一招。

當親眼見住帝洛斯俾自己消滅後，佢就帶住驕傲嘅笑容，呼出最後一啖氣，然後便如斯逝去。

個時光倒流鐘因為同帝洛斯融合左，最後連同帝洛斯一齊被消滅。

家陣都係得返一堆殘骸，時間亦因而再都無法逆轉。





而隨住帝洛斯嘅死，封鎖住Mike嘅六芒星結陣都一併消失。

中槍嘅子瑜仲未醒，美國鷹成隻手斷左，應該都好難駁得返。

至於Mike身上有多處傷口，有啲傷口深到見骨。

「子瑜…」Mike唔理自己受左傷，只關心子瑜嘅情況。

不顧傷勢嘅佢，死頂住撐個人起身，結果一企起身，身上嘅傷劇烈作痛，痛到佢頂唔順，成個人即時昏低左。





此時此刻，面對三個傷者，張醫生手頭上無足夠嘅醫療物資，莫講話治療Mike佢地嘅傷，就連止血都做唔到。

就喺張醫生無助之際，有救兵出現。

「搵到你地啦！」

Judy、阿榮同佢地嘅同伴，帶住一班機械人嚟到。

喺Mike佢地出發前，Judy曾經比左隻機械鴿佢地，並叮囑佢地過橋後，就用隻鴿通知。





結果當時Mike佢地過左橋，但條橋冧左，亦都唔記得通知Judy。

Judy一路都收唔到任何消息，最後佢check隻鴿嘅gps位置，先知眾人已經過左橋。

本來Judy佢地應該早一步嚟到，只係因為跨海大橋冧左，搞到佢地花左好多時間搵其他方法過海。

「你地嚟得好及時，Mike佢地受左重傷，我要你啲機械人幫幫手！」張醫生請求Judy。

「無問題！」Judy立即指令幾個醫療機械人，快速搭建出一個醫療帳篷。

阿榮就則留意到眾人之中，少左阿鬼嘅踪影，於是就問：「阿鬼同埋嗰三個機械人呢？」

「佢…佢地已經唔喺度…」張醫生眼神中閃過一絲悲傷。

個帳幕好快就搭好，喺機械人嘅幫助下，張醫生得到醫療器具同物資，隨即佢就專心幫受傷嘅Mike、子瑜同美國鷹敷藥療傷。





美國鷹斷左隻手臂，要駁就真係駁唔返，好在Judy話可以幫佢安裝機械臂。

子瑜背脊粒子彈攞走左出，亦都敷左藥，過左一陣就慢慢醒返。

反而Mike仲未醒，畢竟三個之中，佢傷得最嚴重。

Mike一路昏迷，嗰啲俾帝洛斯折磨嘅痛苦片段，一路喺腦入面揮之不去，令佢感到非常折磨。

而就喺最痛苦之際，突然間佢全身感覺到一股暖意，仲有一把溫柔嘅聲音，喺度呼喚緊佢。

呢股暖意同溫暖嘅聲音，融化曬所有難過嘅畫面，彷如黑暗中透出一道光。

Mike慢慢擘大眼，終於都醒返。





第一眼所見嘅係一個好靚，而又散發出光彩嘅女仔。

「子…子瑜...你無事？」

子瑜微微一笑：「我無事呀！你終於都醒返，實在真係太好啦！」

見到子瑜安好無恙，Mike先放下心頭大石，同時佢發現對方緊緊咁握住自己隻手。

原來嗰股溫暖人心力量，就係嚟自對方。