穿越時空，冒充平行世界嘅另一個自己，再去呃佢條女上床: （167）

濃煙漸漸散去。

觀光塔底下，被炸出一個足球場咁大嘅坑洞。

陳總司令帶住班時空使者，包括子瑜，坐住懸浮軍艦，慢慢從塔頂降落到地面。

「Mike…Mike…」子瑜絕望咁嗌住Mike嘅名。

隨住懸浮軍艦越嚟越接近地面，大爆炸後嘅環境面貌，漸漸清晰於眼前。





破壞衝擊炮嘅威力理應炸到所有人渣都無，而結果Mike等人仲死剩一啲殘骸殘肢。

帝洛斯更加未死得曬，仲保留住極微弱嘅意識。

佢下半身被炸到爛曬，手腳癱瘓，已經徹底喪失任何反擊嘅能力。

「真係講…講到唔信…我居然俾你地呢班人陰到…」帝洛斯奄奄一息。

「我都估唔到你居然仲講到嘢，睇嚟你頭先嘅衝擊波，卸左炮彈一半嘅威力。」陳總司令一邊講，一邊執起地下嘅時間倒流儀同埋時光機。





呢兩部機一部本來俾帝洛斯吞左落肚，另一部就俾佢收埋左。

依家帝洛斯被摧殘成咁，兩部機就喺佢身上跌出嚟。

「我…我唔服…」帝洛斯好唔忿氣，仲想伸手搶走嗰部時間倒流儀。

陳總司令一腳輕鬆伸開佢：「你條友肆意搗亂平行時空，殺左咁多人，做左咁多壞事，呢啲就係你嘅報應！」

帝洛斯並唔信咩報應，心入面只有極度嘅唔甘心，同時間喺佢耳邊，傳嚟子瑜嘅哭泣聲。





Mike死無全屍，死剩得返一個頭，其他人就得返啲手手腳腳。

面對愛人嘅逝去，子瑜傷痛得忍唔住落淚。

原來失去一個人係咁痛苦。

「Mike！你出嚟啦！我唔介意你變成鬼魂架！你快啲出嚟見我啦！」子瑜含住淚，高呼MIke嘅名。

Mike、美國鷹、阿鬼、張醫生，佢地四個都唔屬於呢個時空，死左之後照計無得投胎而變成遊魂野鬼。

「無論你係人係鬼，我都唔介意架！Mike，你快啲出嚟啦！」子瑜抱住Mike嘅頭，四周圍大嗌。

「33568，唔洗嗌啦！你嗰啲朋友俾破壞衝擊炮炸到魂飛魄散，已經徹底喺呢個世界上消失。」

「咩話…魂飛…魄散…」聽見呢個絕望嘅消息，子瑜嘅眼淚從眼角不停湧出嚟。





「無錯，佢地已經魂飛播散，至於呢壇嘢完左之後，你返去都要受罰！」

跟住陳總司令叫手下解決帝洛斯，絕不能遺留後患。

帝洛斯同廢人無分別，而且氣息極度微弱，只要再喺佢頭上開一槍，咁佢就會一命呼嗚。

臨死前，帝洛斯用盡最後一口氣，留低呢句說話：「你想救返你條仔，只有一個方法...」

成句說話都未完，下一秒，「砰」一聲，子彈穿過佢嘅頭，了結佢嘅生命。

子瑜從帝洛斯最後嘅口型讀出五個字：時間倒流鐘。