穿越時空，冒充平行世界嘅另一個自己，再去呃佢條女上床: （160）

「邊個喺度搞搞震？有本事就堂堂正正企出嚟，唔好匿埋做縮頭烏龜，喺度搞埋啲小動作！」

帝洛斯擴散身上嘅邪氣，嘗試搵出佢口中嗰個「縮頭烏龜」。

「好…好強…好強嘅邪氣…」另一個帝洛斯俾對方嘅邪氣震懾，全身不寒而慄，手腳不自控咁顫抖。

一瞬之間，方圓二十里被陰森嘅邪氣覆蓋。

手持時間倒流儀嘅戴司令背脊發涼，雖然身處高空，但佢都感受嗰股邪氣嘅可怕。





不過就算幾驚都好，佢都唔會臨陣退縮。

佢再一次扭動時間倒流儀背面嘅鏈匙，眨眼間，所有邪氣消退。

時光又再倒流返前十五分鐘。

帝洛斯條氣好唔順，佢覺得自己好似俾玩緊咁：「好！既然你要玩伏匿匿，咁我就同你玩！」

佢再一次爆氣，今次發出嘅邪氣更加強烈，不但引起狂暴嘅烈風，而且連地下都喺度震。





戴司令處於高空之中，暫時都未受到太大影響。

佢抓緊時間，再去轉動指針行一圈。

殊不知，正當指針就嚟轉到一圈之際，帝洛斯發現左佢嘅位置。

「原來就係你條友喺度搞事！」

帝洛斯以極快嘅速度飛上半空，兼且揮刀出招攻擊。





千鈞一髮間，指針咁啱轉完一個圈，時間再次倒流，令到帝洛斯「回帶」返翻轉頭。

問題係戴司令嘅位置已經暴露左，時光一倒流，帝洛斯就第一時間飛上天。

之後，佢地兩個好似玩緊「狐狸先生幾多點」咁，帝洛斯負責做捉人嗰個，每次就嚟去到戴司令面前嗰陣，對方就扭動時間倒流儀，令佢唔單止無法再前進，甚至仲會掉返轉頭。

帝洛斯從來未試過咁樣俾人撚，佢將消滅另一個自己嘅事擺埋一邊，然後專注去突破時光倒流嘅限制，誓要打低戴司令。

隨後佢嘅速度一次比一次快，最後試左三次，佢卒之成功戰勝左戴司令嘅手速。

「十字殺！」帝洛斯雙刀劃十，從上而下對準戴司令出招。

戴司令並無束手就擒，佢其實係個氣功大師，都有返兩道散手。

佢運用多年積累嘅氣功擋隔外星人嘅招數。





「估唔到你都有啲本事喎！」

帝洛斯有啲意外，不過頭先嗰招佢只係出左半成力，只要再稍稍出多兩成力，對手就肯定無法招架。

佢加快出招嘅速度，戴司令果然即刻就跟唔上節奏，連續被打中幾次，梗從半空被砌到落地下。

至於另一個帝洛斯呢個時候忽然加入戰團。