穿越時空，冒充平行世界嘅另一個自己，再去呃佢條女上床: （148）

距離觀光塔逐漸接近，摩天聳立嘅建築活現於眼前.

估計唔洗再行好耐，佢地就會到達目的地。

而越接近觀光塔，四周圍環境就越係荒廢。

到處一片頹垣敗瓦，石屎倒塌遍佈地上，屍體則堆積喺一個個被掘開嘅大窿之下。

偏偏喺廢墟之中，出現左一座擂台。





一個有正規籃球場咁大咁寬嘅虛擬擂台。

眾人步近擂台，看見喺擂台對面遠處，坐左一個頭部圓碌碌，無眼耳口鼻，卻戴住一副眼鏡嘅外星人。

「美國鷹，呢隻嘢又係咩來頭？」Mike細細聲問。

「Er…弊啦…我好似無乜印象…」美國鷹努力回憶，「呢隻嘢究竟係…」

「你地好，我係Card gamer，歡迎嚟到我嘅咭牌擂台，你地邊個有興趣陪我玩一鋪？」對面嘅外星人對佢地講。





「Card gamer？Oh！咁我記得啦，喺隻格鬥game入面，呢隻外星人只係用飛牌攻擊嘅低級怪物。」

美國鷹諗返起：「後來遊戲公司集合所有外星人角色，限量發售左隻card game，仲用左呢隻嘢做咭盒嘅封面。」

「咁…咁…即係點呀？」Mike聽唔出個重點

「你地商量好揀邊個同我對戰未呀？」Card gamer催促。

「睇嚟我地依家要搵一個人，同佢玩鋪咭game。」美國鷹講。





「咁就你去啦，呢度得你玩過。」

「其實我都無玩過，隻咭game當年限量得一百盒，根本想買都買唔到…」

「頂！洗鬼講咁多咩！直接砌佢啦！」魔迪加插嘴。

「既然你地揀唔到人，咁就我嚟揀啦！」

Card gamer手指輪流指住Mike佢地：「點指兵兵，點著誰人做大兵！」

「好！揀到啦！就你啦！」Card gamer指住企喺人堆較後位置嘅張醫生。

「下？」張醫生呆左一呆。

與此同時，黑幕出現籠罩住四方八面。





除左張醫生之外，其他人包括魔迪加在內，都未反應到過嚟就突然間收縮，變成左一張張遊戲咭牌。

「發…發生…咩事」張醫生嚇到呆左。

之後嗰沓牌以及Card gamer手上嘅牌，一齊飛到擂台中央。

兩沓牌隨即溝勻再重新洗牌。

「快啲坐低啦，對戰就嚟開始啦。」Cardgamer對張醫生講。

心神未定嘅張醫生，戰戰兢兢咁坐擂台邊上嘅位置。

成沓牌洗勻過後就平均分成兩份，並自動送到二人面前。





「好啦，等我簡單同你解釋一下遊戲嘅玩法。」

Card gamer托一托眼鏡話：「家陣我地每人分配到十五張角色牌、三十張效果咭，仲有五張功能牌，喺唔打開牌嘅情況下，你數下係咪一共有五十張牌？」

張醫生吞一啖口水，數下啲牌，Card gamer繼續解釋下，呢三款牌分別代表啲咩。

角色牌包括Mike、美國鷹、阿鬼、子瑜、三個老婆以及魔迪加，仲有一堆外星怪物。

由於成沓牌打散左，所以張醫生手上，未必有齊自己同伴嘅角色牌。

效果咭就係，抽走外星人同Mike等人原有嘅能力或招式，獨立成一張能力咭。

打個譬如，鐮刀怪嘅鐮刀被分離成一張效果咭，當佢被召喚上場，手上係無武器，若要使出迴力刀攻擊，咁就要抽到嗰張鐮刀咭。

至於Mike嗰啲招式，就被拆成為獨立嘅效果咭。





然而所有效果咭，並唔局限於喺一個角色身上使用，而係可以隨意自由配搭，應用喺任何角色咭上。

除此之外，仲有五張功能牌。

分別係 「重新洗牌」、「同對手交換三張手牌」、「停止對手攻擊一回合」、「停止對手抽咭一回合」以及「額外抽多兩張咭」。