穿越時空，冒充平行世界嘅另一個自己，再去呃佢條女上床: （145）

海面慢慢恢復返平靜，隻船亦都定返落嚟。

眾人面前嘅魔迪加，全身佈滿傷痕，對眼無左眼珠，咩都睇唔到。

「魔迪加，乜你搞成咁嘅？」美國鷹抬高頭，打量半空中嘅魔迪加。

「喂你係咩人？竟然敢直呼本大爺個名？」魔迪加順住啲聲擰轉面。

「『本大爺欠你一個人情，依家還返俾你』。」Mike模仿魔迪加救左自己嘅嗰個口吻，然後親口致謝：「多謝你嗰日救左我。」





「哦，乜原來係你地，」

魔迪加聽完呢句，就認得出係Mike佢地：「唔洗講咩多謝，本大爺只係還你一個人情啫！」

「但係點解你對眼…」

「講起就火滾！帝洛斯條友挖我雙眼，仲想用我嘅魔怒火焰燒死我！不過佢應該無諗到，本大爺係唔會俾自己嘅火焰所傷。」

「即係…你輸左俾佢？」Mike問。





「無！本大爺無輸！如果唔係帝洛斯條友洗橫手、出陰招，本大爺一定唔會輸！」魔迪加怒氣衝天，狠得咬牙切齒。

「咕…」與此同時，佢個肚發出咕咕聲，「喂你地有無嘢食！本大爺肚餓呀！」

「Er…我地啲存糧就得返啲茄汁罐頭，你啱唔啱食？」美國鷹點算左一下啲存糧。

「本大爺要食啲有血有肉嘅嘢！」

「下？你唔係諗住食我地下話？」子瑜出聲問。





「呵！餓起上嚟，本大爺真係唔敢擔保！」魔迪加舔一舔脷。

阿鬼拎起船上幾支魚竿：「不如我地釣魚啦。」

「都好喎，釣到魚好過食罐頭。」Mike同埋其他人都覺得呢個主意幾好。

首先佢地先fing支竿出去，將半空上嘅魔迪加牽引上船，再遞碌魚竿俾對方，然後大家排排坐咁喺遊艇上釣魚。

「咕…」魔迪加個肚餓到係咁打鼓，「喂！有魚上釣未！本大爺好肚餓！」

「啱啱先坐低，邊有咁快呀。」Mike對佢講。

「再無魚上釣嘅話，本大爺餓起上嚟，真係會食人架！」

「得啦！俾啲耐心啦！」





「填飽個肚之後，本大爺要去帝洛斯報仇！」

「你連嘢都睇唔到，咁嘅情況你仲想去挑戰帝洛斯？」

「實力上，依家嘅我或者真係比唔上帝洛斯，不過本大爺就係唔甘心！明明我先係宇宙之王！」魔迪加感到深深不忿。

「呢鋪我撐你！帝洛斯殺死左我嘅朋友，我都要揾嗰條友報仇！」美國鷹眼神中閃過一絲恨意。

「喂！帝洛斯一定係要由本人親自處決，你地唔好諗住同我爭！」

「你依家連嘢都睇唔到，仲揾得到帝洛斯喺邊咩？」Mike就問。

「呵！雖然睇唔到嘢，但本大爺可以感受到帝洛斯嘅氣息。」





講完，魔迪加集中精神力，嘗試探測帝洛斯嘅位置：「嗯？奇怪！點解我感應唔到佢嘅氣息！」

「因為帝洛斯去左第二個時空。」Mike答。

「第二個時空？哼！我唔理！總之就算帝洛斯去到天腳底，本大爺都要揾佢出嚟！」

魔迪加一邊講，手中嘅魚竿一邊劇烈抖動。

有魚上釣，Mike佢地幫手扯起魚竿，結果釣左一條泥猛上嚟。

魔迪加成條魚就咁啪入口：「唔掂喎！都唔好食嘅！」

「頂你！有得食你就食啦！」

佢地釣魚充飢，填飽個肚，抖足精神之後就要繼續上路。





無論係要摷魔迪加出嚟，定還是要返去各自嘅時空，唯一辦法就只有穿過觀光塔上，嗰一道時空裂縫。

眾人照住地圖指示，向住觀光塔前進，魔迪加亦都隨行。

然而，帝洛斯有三個猛人手下，全部都係屬於A級怪物。

如要通去觀光塔，就必須先打敗嗰三隻強勁嘅外星人。