穿越時空，冒充平行世界嘅另一個自己，再去呃佢條女上床: （130）

「呼—呼—」

突然間風雲色變。

本來日光日白、陽光普照，家下個天黑曬，變到夜晚咁，而且狂風勁吹。

啲風吹到佢地幾乎企唔穩，Mike拖緊子瑜，保護對方。

「點解個天無啦啦黑曬嘅？」阿鬼對腳家下係兩個車轆，稍有不慎就會被吹走，要不停向前轆先企得穩。





「呢個唔係現實，係外星人製造嘅異度空間。」美國鷹雙手交叉，擋住迎面吹嚟嘅狂風。

隨即個天落埋大雨，條橋仲好似蕩鞦韆咁，左右搖擺。

「美國鷹，有無辦法破解呢個異度空間？」Mike拖住子瑜唔放手。

「隻外星人應該就喺呢個空間入面，首先揾佢出嚟先。」美國鷹抓住橋上石壆，穩住自己嘅重心。

無奈喺大風大雨之下，Mike佢地連眼都mak唔開，更唔好講揾隻外星人出嚟。





呢個時候就只有靠阿鬼，因為佢係機械人身體，啲水唔會入到眼。

佢好似踩roller 咁，盡量保持平衡，同一時候掃視四周：「無喎，見唔到有外星人喎！」

美國鷹就話：「試下用紅外線感應。」

阿鬼對眼有紅外線感應系統，能夠探測到肉眼睇唔見嘅嘢。

好快佢就揾到敵人嗰位置：「Yes！見到啦！」





隻外星人就企喺前面石壆之上。

「砰！砰！砰！」

阿鬼連續射出烈焰炮，逼隻外星人現出真身。

「係佢啦！空間殺手，Space Killer！」美國鷹指住隻外星人。

呢個能製造出異度空間、名為「空間殺手」嘅外星人，外形唔算出眾，就係一個石頭人。

頭同身、以及手手腳腳都由岩岩巉巉嘅石頭組成，難聽啲講，完全就係一個大舊衰。

阿鬼炮轟敵人，但對方卻一啲損傷都無。

Mike亦都冒住風雨，上前揮劍劈擊。





「鏘！鏘！鏘！」

隻外星人竟然刀槍不入，鋒利嘅長劍連環揮斬，卻根本傷唔到佢半分。

「無用架！喺異度空間入面，任何攻擊都係對隻Space Killer無效。」美國鷹解話。

「唔係呀嘛，咁點算呀？」Mike一劍斬落去對方嘅膊頭，結果就好似指甲鉗鋸木咁，接近零作用。

「我…我都唔知…」美國鷹都諗唔破解嘅辦法，「喺隻game入面，所有怪都有mp數值嘅限制，但嚟到現實，似乎就可以無限放技。」