穿越時空，冒充平行世界嘅另一個自己，再去呃佢條女上床: （79）

外面無乜動靜，即係已經擺脫左嗰幾隻外星人。

車後面座位，Mike訓喺Vincy同Suki大髀，個屎忽插住兩條刺，唔敢亂咁郁。

子瑜就行落車，打開後面車門，用力彈一下插喺Mike屁股其中一條刺，痛到條友成個人彈起身。

「咚」一聲，Mike個頭撼到車頂，屎忽陣陣痛：「頂你靠害咩！好痛架！」

「鬼叫你條友喺度詐死，快啲起身啦！」子瑜手上嘅白色太陽槍使用時限已過，慢慢咁消失。





佢地跌落嘅坑，唔算話好深，約莫三四米高。

五人擒上車頂，再騎膊馬輪流爬返上去。

夜空清澈，四周圍無電又無燈，黑媽媽一片。

子瑜拎出嗰個發光扣針嚟照明。

殘破不堪嘅環境，加上分佈地上嘅腐屍，喺黑暗環境之中，顯得特別陰森。





三個女仔驚驚青青，一邊扶住受傷嘅Mike，一邊又挨住對方。

附近非常之空曠，除左幾間大型電子車車廠，周圍就咩都無。

佢地行左大半個鐘，揾嚟到建築物較密集嘅地方，好好彩見到有間診所。

推門入去嘅時候，Mike踩到地下門口一隻熊啤啤公仔。

「邊個踩我！」





突然間，大家聽到有人講嘢，係把偏中性嘅聲音。

各人你眼望我眼，Mike問子瑜：「係咪你頭先講嘢？」

「梗係唔係啦，我把聲都唔係咁。」

Mike再問其餘三個女仔，而佢地都話啱先自己無出聲。

「喂！你聽唔聽到我講嘢！縮開你隻腳啊！」

啲聲似乎喺嚟自Mike腳下嘅熊公仔。

Mike忍痛彎腰執起隻公仔：「大家頭先有無聽到，好似係呢隻熊公仔講嘢？」

「你講咩呀！本大爺係宇宙之王奧迪加，唔係咩熊公仔！」隻公仔發出聲音。





呢次大家都聽得一清二楚，真係隻熊公仔講嘢。

「你…你點解識講嘢…唔通你都係外星人？」Mike問。

隻公仔冷笑一聲：「呵！對你地球人嚟講，你叫我外星人都無錯嘅，不過本大爺希望你地，尊稱叫返我宇宙之王。」

「宇宙之王？橫睇掂睇你都係毛公仔嚟渣喎，同埋你係外星人，點解識得講我地地球人嘅語言？」Mike問。

「你地地球人嘅低級語言，要學幾下就學得識啦！另外，本大爺鄭重再講一次！我唔係毛公仔！我係宇宙之王魔迪加！依家我只係處於休眠狀態，所以先係咁嘅樣。等我徹底甦醒，見識到本大爺真正嘅實力，包保你地驚到瀨尿！」

「既然係咁，睇嚟我要喺你甦醒之前消滅你！」

「你居然想乘人之危！乜原來你地地球人係咁卑鄙！」





「哈，講下笑啫！你係外星人又識講嘢，梗係留你喺度套下你料啦！」Mike決定收留呢隻公仔。

「喂！快啲放開本大爺！」

Mike無理會魔迪加嘅說話，同子瑜等人慢慢行入診所。

雖然裡面凌亂一片，但都尚算安全，而且仲有後備電箱。

佢地商量左一陣，決定暫時就喺呢度落腳。

「雷公！劈友！除世害！」Mike用雷電攻擊，幫電箱叉滿電。

診所啲燈同冷氣隨即就著返曬。

之後三個女仔扶住Mike，訓上醫生房嗰張病床度。