穿越時空，冒充平行世界嘅另一個自己，再去呃佢條女上床: （71）

子瑜被救上岸邊，但卻不省人事。

「喂子瑜，醒啊喂！」Mike拍拍子瑜塊面，可惜對方一啲反應都無。

Mike細個有學過急救，佢雙手放喺對方心口，進行心外壓。

「快啲醒啦！」Mike連續按壓，並向子瑜口中吹氣。

大約三十秒之後，子瑜終於扎醒。





佢擘大眼見到Mike嘴對嘴錫埋嚟，兩隻手仲掂住自己心口，嚇到大嗌。

「非禮啊！」

「非你個頭咩，我幫你急救渣！」Mike縮開雙手。

「咩…咩話…急…急救？」子瑜塊面紅曬，吐左幾啖海水出嚟。

「係呀，你頭先跌落海浸親，係我救你上嚟架，枉你仲好人當賊扮！」





子瑜回憶起自己喺海入面失去意識嗰陣，的確係有個人伸手捉住自己，莫非真係Mike救左自己？

「好啦，唔好發吽豆啦，拿拿臨返入去，睇下嗰道時空裂縫消失左未。」Mike著返面衫同面褲。

突然間，子瑜又大嗌：「踎低！」

三道藍色激光從工廠入面掃射出嚟。

好在子瑜及時提醒，踎遲一步，Mike都會被爆頭。





三道激光幾乎射爛半間船廠咁滯，維持左一分鐘後先至消失。

二人半踎低，靜靜雞咁喺窗口望入去。

本來嘅嗰幾十隻飛天鯊魚同黑袍怪全部死q曬，就得三隻灰色矮仔外星人。

相信剛才幾道激光，就係佢地發射出嚟。

子瑜同Mike唔敢輕舉妄動，等到嗰三個外星人走左，先敢擒窗返入工廠入面。

令人好遺憾嘅係，墻上嗰道時空裂縫已經消失左。

咁都未算慘，更慘嘅係子瑜部偵測裝置俾海水浸壞左，成部機打柴。

「無啦無啦…今次無啦…」子瑜個樣灰到好似經歷緊世界末日咁。





「你會唔會士啤機？」

「咪玩啦，呢啲嘢點會有士啤？時空裂縫已經係我地剩低嘅唯一方法，依家無左探測機，揾唔到時空裂縫，咁即係話，我地以後都無辦法離開呢個時空…」

「咁…咁我地咪要成世困喺度？無可能嘅，我信你一定仲有其他方法嘅…」

「無…無其他方法…」子瑜極度沮喪，成個人頹曬。

想走但走唔到，就連偵測器都壞埋，佢地兩個頓時之間，變成左被時空遺棄嘅孤兒。

「咚窿！」

附近又有地震，而且震動維持左好耐。





工廠上搖搖欲墜嘅天花板開始冧，子瑜同Mike暫時唔傷心住，快步先逃離現場。

地面震動喺嚟自對面船廠門口，一隻超巨型嘅紫色公雞。

佢喺度不停咁啄塊地，個雞嘴隨體型變得好大，啄一下，地下就穿個大窿。

喺大雞旁邊，仲有幾隻體型較細嘅雞，矮仔外星人狂射激光射死佢地，令啲雞不停復活，不停變大。

眨下眼，又多三隻雞變到十幾層咁高咁大，一齊喺度啄地。

至於喺另一邊，都有十幾隻鐮刀怪喺度掘地，側邊有幾隻矮仔外星人傍住，好似喺度監工咁款。

「噼砰！」

突然間，其中一個巨型公雞擂低，個身逐忽逐忽咁爆開，最後慢慢化成灰燼。





旁邊嗰幾隻都一樣，接連擂低並化成灰，感覺佢地好似過勞而死。

「Raughhh！！！」

十幾隻鐮刀怪見到紫色公雞逐一冧低，憤怒咁咆哮，突然發難，攻擊旁邊嘅矮仔外星人。

附近其他嘅外星怪物聽到咆哮聲，齊齊響應，當中包括八爪魚怪、四手怪，仲有其他幾種未見過嘅外星怪物，成班一齊去對付嗰啲矮仔外星人。

又係一輪外星人大戰，Mike同子瑜深感不妙，轉身衝返入去船廠，匿埋喺最角落嘅角落頭。