穿越時空，冒充平行世界嘅另一個自己，再去呃佢條女上床: （67）

以免俾人發現，佢地兩個前後腳行出房。

等Vincy出左去先，Mike先戰戰兢兢咁行出門口，落返去樓下。

同前幾日一樣，食完早餐，阿榮就召集大家出去揾食物同搜救生還者。

由於三個𡃁仔受左傷要休養，另外占士話自己有啲唔舒服，想留喺度休息。

因此，今日就得Mike、阿榮、子瑜再加多另外三個男仔出去。





架吉普車揸左咁多日，油缸已經無曬油，阿榮要轉揸另一架私家車。

大約只係行左三百米，架車無端端突然死火。

阿榮同另外三個男仔落車檢查，同時間，子瑜手上嘅偵測儀器突然釋出強烈信號！

「嘩！有啦有啦！」

子瑜好興奮咁指住儀器上一個信號光點：「Mike你睇唔睇到呀？呢度係時空裂縫嘅位置，距離我地大概係五公里左右，位置仲喺平地。除此之外，呢個光點特別光，咁就代表時空裂縫維持嘅時間會比較長，我地由呢度行過去，時間絕對綽綽有餘！」





「咁...咁個裂縫即係可以維持到幾耐？」相比起子瑜，Mike個反應唔算特別大。

「起碼一個半鐘之後先會消失！時間一定夠！」

雖然時間充裕，但子瑜就好心急，「喂唔好等啦！我地快啲落車行啦！」

Mike卻有啲少少猶豫，喺度諗假如依家返去自己嘅時空，咁咪要揼低其他人唔理？

但如果依家唔返去，咁隨時可能以後都返唔到去...





子瑜見到對方咁嘅表情，就話：「頂！你唔係俾我講中左，你真係想留喺呢度，繼續冒充另一個自己做英雄下話？

「我…」

「琴日見你俾幾條女圍，個樣流曬口水咁，我就知你一定係做英雄做得好過癮，不過唔該你清醒下啦，呢個時空唔係屬於你架，而你都唔屬於呢個時空！」

子瑜講得無錯，Mike並唔屬於呢度。

對於呢個工業化嘅香港，Mike無任何認知，亦無任何歸屬感。

對於阿榮、Lulu、長腿家姐仲有其他人，Mike同佢地無任何共同嘅回憶，無任何共同嘅經歷，更加無任何感情。

由始至終，佢都只係假扮嘅另一個自己，戴住虛假嘅面具，欺騙阿榮，欺騙Lulu同埋長腿家姐。

或者佢係時候要抽離，係時候離開呢個時空。





Mike認真咁沉思左一陣，明白自己唔應該留戀於此，應該趁機會返去自己嘅時空。

只不過喺離開之前，佢唔想帶埋肚入面條蟲走。

佢想將魔蟲留俾其他人，等佢地利用嗰本秘笈去練功，然後對付嗰啲外星人。

「子瑜，你可唔可以等我半個鐘？」Mike問。

「你想做咩？」

「我返去大本營嘔返條蟲出嚟，跟住就同你一齊走！」

「下？」





「總之你等我啦，半個鐘之內我一定搞掂！」

講完，Mike就衝落車，調頭跑返去工廠。

阿榮見到Mike無端端跑走左，唔知發生咩事。

呢架私家車密封有窗，所以剛才阿榮淨係見到子瑜同Mike，喺車入面爭吵，卻完全唔知二人嘈緊啲咩。

好快Mike跑返工廠，第一時間衝入廁所，扣喉嘔返條蟲出嚟。

「嘔…嘔…」

扣喉扣左一輪，今朝食嘅早餐，連埋啲黃膽水都幾乎嘔埋出嚟，偏偏條蟲就係唔肯出嚟。

Mike諗諗下，決定揾碌棍毆落自己個肚度，逼嗰條蟲出嚟。





佢逐間房去揾，揾到嚟Lulu同自己嗰間房。

未打開道門，就聽到裡面隱約傳出一啲聲音。

佢放輕手腳，擰開門鎖，然後輕輕推開。

道門只係開左半隻手指嚹咁多，佢就剎停左，因為佢俾啲震撼畫面嚇親。