穿越時空，冒充平行世界嘅另一個自己，再去呃佢條女上床: （64）

原本嘅七個人再加三個女仔，一架車已經擠唔落，要分開兩架車。

子瑜同Mike仲有三個女仔坐一架車，Mike個肚仲痛緊，所以由子瑜負責揸車。

佢唔識路，全程就跟住阿榮佢地前面架吉普車嚟行。

「點呀，個肚仲好痛？」

「你個頭出曬汗，一定好辛苦啦。」





「等我嚟幫你按下個肚，可能會有啲幫助。」

嗰三個女仔坐喺車後面，一齊照顧肚痛嘅Mike。

佢地一個著住校服，一個就係眼鏡娘，仲有一個金髮mk妹。

Mike枕住mk妹對波，其餘兩個女仔就幫佢抹汗同按肚。

子瑜從車內嘅倒後鏡，睇見幾條女對Mike又呵又盛咁，就話：「洗唔洗呀，睇佢個款最多咪係食錯嘢絞肚痛。」





「但...但我今朝淨係食左Lulu整嘅通粉…」

「咁有可能穿越左時空，一時水土不服啫。」子瑜話。

「嗯？穿越時空？咩嚟架？」眼鏡娘好奇發問。

「無嘢無嘢，我地隨口亂噏。」子瑜同Mike異口同聲，扮作講錯嘢。

一陣之後，佢地終於返到大本營。





「細佬，你個肚做咩呀？」長腿家姐擔心咁問。

Mike顧唔上解釋，第一時間去廁所解決。

至於阿榮就先抬三個受傷嘅𡃁仔去休息，再揾人幫手安頓嗰三個女仔同分派食物，最後先坐低，維修自己穿左窿嘅手掌。

「點呀細佬，好返啲未呀？」長腿家姐企喺廁所門口，關切Mike嘅情況。

「放心，無事嘅，我諗都係普通絞肚痛啫。」子瑜揸住一包啫喱糖經過，叫長腿家姐無需擔心。

子瑜雖則睇落悠哉悠哉咁，但事實上佢內心焦慮，好想快啲離開呢個時空。

因為身為時空守序者，佢係唔可以停留喺同一個時空連續超過三十日，咁會被視為過度干預該時空嘅運作，後果嚴重起上嚟係會死人。

一諗到此，佢就無奈咁低頭歎息，然後抬返頭，睄到占士同Lulu鬼鬼鼠鼠咁，行入二樓角落一間房。





佢無理會太多，打返開偵測儀器，揾下方圓廿里內有無出現時空裂縫。

Mike屙左七八次，乜都屙乾淨，個肚終於舒服返啲。

工廠入面無儲存白米，煲唔到粥，長腿家姐只能整啲速食麥皮，俾Mike「long」下個胃。

「多謝。」Mike坐喺工廠嘅機器運輸帶上，捧住兜麥皮，筆一啖放入口。

其他人見到Mike無事，都安落返曬。

而三個被佢救左嘅女仔，更加係猶如螞蟻嬲蜜糖咁，不停向Mike示好。

「你係咪叫Mike啊？我叫阿蚊，頭先多得你及時出手，我地幾個先得救渣！」MK妹挨落Mike度，暗送「波餅」。





「係呀係呀，真係好彩有你渣！」眼鏡娘就叫Suki。

「話時話，點解你好似人地拍戲咁，使得出啲咁勁嘅招式？」校服妹坐到好埋，佢個名叫Vincy。

「Er…呢層就…有啲難解釋…」Mike口窒窒，唔知點解釋。

「點都好啦，總之就多謝你救左我地！」Vincy翹住Mike隻手講。

「唔單止你地，其實我地呢度唔少人，當初都係俾Mike救返嚟。」一個老婆婆搭嘴話。

「無錯呀，所以Mike係我地嘅英雄嚟架。」另一個大叔附和。

本來Mike偷𥄫緊校服妹Vincy嘅大髀，但一聽到有人話自己係英雄，下意識擰返轉面，兼坐開返少少。

佢唔想損害「Mike」本來喺大家心目中嘅形象。





儘管佢同「英勇Mike」只得一面之緣，但係呢幾日喺各人口中，大概能了解到，對方係一個勇敢正直嘅人。

再諗返起，喺原本嘅時空，佢自己本來只係個無出息嘅廢青，嚟呢個時空後，居然莫名其妙、符符碌碌咁變成左「英雄」。

坦白講，佢的確享受呢種被愛戴、被人需要嘅感覺，同時心入面卻又好清楚，自己其實只係一個冒牌貨。