穿越時空，冒充平行世界嘅另一個自己，再去呃佢條女上床: （58）

大雨落足一日一夜，第二日終於都出太陽。

一覺訓醒，Mike第一件事係遵守承諾，先去幫嗰十幾個電箱叉電。

拳頭高舉，佢召喚出高壓閃電，射去各個電箱。

電錶快速跳轉，眨下眼，十幾個電箱都叉飽電。

而Lulu亦如琴晚所講，朝早親自落廚，煮住左一兜火腿通粉俾Mike做早餐。





有得食「女神」親手整嘅嘢，Mike當然係開心。

只不過其他人嘅早餐似乎更豐富。

長腿家姐發覺儲備箱啲餐肉罐頭同即食麵，差唔多就過期，所以乾脆一次過煮曬出嚟，俾各位做早餐。

雖然份量豐富，但大家卻無乜胃口。

因為佢地喺度咁多日，幾乎日日都係食呢啲罐頭同醃製食物，早就食到個口都寡曬。





「唉！日日都係食呢啲，已經好多日無食過新鮮肉啦！」一個中年大叔歎氣喺度呻。

事實上，佢呢句說話就係在座好多人嘅心聲，大家真係好耐都無食過新鮮嘅豬、牛、雞肉。

「嘩！出面有雞雞啊！」有個細路指出去門口。

大家睄出去出面，看見門外真係有隻公雞，正喺度用個嘴啄緊塊地。

個中年大叔提議捉左隻嘢劏嚟食，並主動第一個行出去。





出去門口再望真啲，雞的確係雞，只係色水就好奇怪。

照計呢個世界上係唔會有紫色嘅雞。

中年大叔諗都唔諗，行過去伸手捉雞，結果猝不及防，俾隻雞啄到手臂流血。

個傷口仲要好深，幾乎就見骨咁滯。

全因公雞個嘴非常鋒利，猶如一把尖銳嘅匕首。

大家驚到立即退後，個細路退慢一步，隻雞跳埋去想啄佢，好在阿榮及時伸手擋住左。

尖利嘅雞嘴插曬入阿榮手臂啲肉度，但一啲血都無流出嚟。

阿榮一嘢fing開隻雞，Mike行上前睇下對方嘅傷勢，發現對方隻手穿左個窿，傷口裡面卻並非血肉，而係電線同鋼料。





「阿榮，你隻手…」Mike覺得好出奇，點解阿榮隻手咁樣嘅？

再回想起對方幾日都無飲過水、無食過嘢，Mike心諗莫非阿榮係機械人？

「你唔洗理我，呢隻雞睇嚟係外星人，你快啲去消滅佢。」阿榮同Mike講。

睇個樣，呢隻紫色公雞應該唔難對付。

「大家退後啲。」Mike摩拳擦掌，先觀察對手。

隻雞除左啄人之外，似乎就無其他招數。

既然如此，Mike就先放一招旋風攻擊，結果直接命中，打爆左隻雞。





本身打算只係試探嘅一招，估唔到一嘢就KO左敵人。

但更估唔到嘅係，三秒之後，隻雞原地復活。

咁都不得止，佢嘅size變大左成倍，幾乎有半個人咁高。

Mike唔理咁多，再捲起旋風攻擊，今次隻雞反應快，橫向一閃就避過左，跟住跳起向前猛咁啄。

呢種攻擊對Mike構成唔到威脅，只係兩下閃身就輕鬆避開，並順勢召喚出雷電反攻。

四、五道閃電猶如飛劍，由四方八面飛向敵人攻擊。

隻雞避得到左邊，避唔到右邊，最後俾閃電電爆左。