穿越時空，冒充平行世界嘅另一個自己，再去呃佢條女上床: （55）

雨水密密麻麻從天而降，Mike抹走不停流到眼角嘅雨水，環視四周，瞄到左手邊有一個深坑，啱先佢幾乎跣腳仆左落去。

此時此刻，靈光一閃，佢打算嚟招將計就計。

「你隻死怪物！係咪好想食我落肚？係就快啲嚟啦！」Mike一連發射幾下旋風，然後轉身逃跑。

鐮刀怪當然聽唔明佢講乜春，只知眼前獵物想逃走，就按本能反應追上去。

Mike喺雨中奔跑，兜左幾個大圈，帶隻怪物「遊花園」。





「Raughhh—」

隻鐮刀怪有啲唔耐煩，開始亂咁出招。

Mike嚟到個深坑面前突然停低，擰轉面睇見鐮刀怪揮刀攻擊。

佢睇準時機，瞄住怪物嘅左腳，使出旋風技。

鐮刀怪隻腳掌受到攻擊，一瞬間失去平衡，仆左落個大坑度。





個坑起碼有三米咁深，但係以隻怪嘅彈跳力，好易就能跳返上嚟。

而Mike早已料到呢一點。

鐮刀怪雙腿屈膝，儲力向上跳起。

Mike企喺洞口，雙手舉起，一見到怪物跳上洞口，立即瞄準嗰兩邊膊頭，發射出強力旋風。

鐮刀怪完全無料到Mike會咁樣突擊，結果就俾對方殺左個措手不及。





旋風打爆兩臂，綠色嘅血喺膊頭上嘅傷口湧泉而出。

無左兩隻鐮刀臂，隻鐮刀怪就等於廢左武功。

Mike伸出食指同中指，單手指住怪物個頭，使出致命一擊：「收擋啦你！」

指尖捲起一道旋風，直射穿過怪物個額頭，隨即好似扑西瓜咁，成個頭爆開左。

綠色血水飛濺到Mike嘅臉上，不過好快就俾雨水沖走。

阿榮等人睇見Mike卒之打敗左隻外星怪物，紛紛鬆左一口氣。

三個𡃁仔更加係拍曬手掌，相當興奮雀躍。

阿榮見到Mike手臂受左傷，上車後就幫對方簡單包扎。





好在傷口唔深，所以都無乜大礙。

返到去工廠，三個𡃁仔就將Mike一連KO兩隻外星人嘅事蹟，繪形繪色咁俾其他人聽。

大家都聽得好入神，聽完之後個個大讚Mike好神勇。

無啦啦練成武功，無啦啦隊冧兩隻外星怪物，無啦啦俾人當英雄，Mike感覺好唔真實，甚至有啲飄飄然。

大雨由日頭落到夜晚，子瑜個肚痛左一日，情況終於都慢慢好轉。

不過佢喺廁所踎得太耐，今日嘅食物已經分曬出去，無預到佢一份。

「係啦，你有無嘢食呀？」子瑜行去問Mike。





「有呀！」Mike喺褲袋um出兩排朱古力。

「點解淋曬軟pet pet咁嘅？唔會又係過期朱古力呀嘛？」子瑜睇清楚包裝紙上嘅日期。

「可能今日淋左雨，唔小心整濕埋啲朱古力。」

「係喎，啱先聽人講，你今日打低左兩隻外星人喎，估唔到你條友都有啲貢獻，唔係淨係識得冒充另一個自己抽水。」

「哈，係咪即刻對我改觀左呢？」

「唔係喎，你係鹹濕仔呢個事實，係點都改變唔到。」子瑜咬一啖淋左個朱古力，跟住拎部探測儀器出嚟。

「嘟—嘟—嘟—」

偵測信號顯示呢刻有時空裂縫出現。





「部機響緊喎，係咪代表出現左時空裂縫？」Mike問子瑜。

「係就係，問題係個地點係喺我地頭頂上空兩萬呎。」

「唔係呀嘛，咁要搭飛機先去到喎。」

「係咁架啦，要揾到一個地點好、時間又維持得長嘅時空裂縫，唔係咁易架。」子瑜對Mike講。

過左一陣，占士行過嚟，話有事要揾Mike幫忙。

佢帶Mike嚟到工廠後面角落頭、儲存電箱嘅位置。