穿越時空，冒充平行世界嘅另一個自己，再去呃佢條女上床: （46）

傾左一輪，Mike都未講得掂子瑜，講到口水到乾，要落返樓下揾啲嘢潤下喉。

「Mike，你攞去食啦，你喺出面返嚟，體力消耗咁多，一定要補充多啲能量先得架。」

一個左腳打住石膏嘅男人，推住輪椅過嚟，向Mike遞出一盒餅乾同紙包飲品。

「Mike哥哥，呢個好食架，俾你食呀。」又有一個年約六七歲嘅細路仔，行過嚟請Mike食魚肉香腸。

佢地無私咁將自己嘅食物同Mike分享，而事實上呢度個個人都對Mike好好。





除左分享食物之外，平時有咩佢地都會幫Mike做。當然，呢度講緊嘅Mike，梗係指戰死左嘅「英勇Mike」。

原因係呢度有唔少人，其實都係喺「英勇Mike」嘅協助或保護之下，匿左入嚟避難，所以佢地都好感激同尊重「英勇Mike」。

換言之，Mike依家所享受緊嘅待遇，都係靠另一個自己所賜。

「阿Mike，名牌朱古力，好正架！」占士行過嚟請Mike食朱古力。

「哦，多謝。」





Mike剛接過條朱古力，下一秒就俾子瑜搶走：「咦！呢隻朱古力我鐘意喎！」

「喂！呢個係我俾阿Mike架！」占士想幫Mike搶返條朱古力。

「你請我食條朱古力得唔得先？」子瑜揮動手上嘅朱古力問Mike。

「得，梗係得啦。」Mike唔敢逆子瑜嘅意，既然對方想食咪俾佢囉，反正自己都唔係好鐘意食甜嘢。

啱先一連幾個人塞左啲嘢食俾佢，Mike一條友食唔曬，諗住行過去揾阿榮share。





殊不知對方卻回應話：「哎呀你條友今日，咁鐘意開我玩笑嘅，我啱啱叉飽電，食飽左啦。」

「下？」Mike眉頭一皺，聽唔明阿榮講咩。

「咚隆！！！」

忽然間，外面傳嚟一聲巨響，隨即地下就劇烈震動。

眾人驚恐不安，立即揾嘢扶住，其中有幾個細路驚到喊。

「係咪…係咪地震呀？」Mike問。

「我諗應該係啲外星人又喺度鑽地。」阿榮回答。

Mike扶住身邊一張櫈，地震大約維持左五分鐘之後，先慢慢停落嚟。





「無事啦無事啦，大家唔洗驚。」

長腿家姐安慰緊幾個仲喊緊嘅細路：「放心啦，就算外星人真係打到嚟，都有我細佬Mike喺度保護你地架嘛。」

嗰幾個細路聽完，好似無喊得咁犀利，跟住仲行到Mike面前問：「Mike哥哥，你係咪點都會保護我地架？」

「係…梗係啦…」Mike假作肯定咁回答。