穿越時空，冒充平行世界嘅另一個自己，再去呃佢條女上床: （7）

帶住滿腦疑問，佢終於搵到一間油站，有得俾佢問路。

雖然油站係自助式，不過裡面有間便利店，有個店員喺度。

「你好，借問聲附近邊度有巴士站，同埋呢度其實係邊度嚟架？」

「Pardon？」個店員望落似係華人，卻聽唔明廣東話。

「Can you speak Cantonese？」Mike問。





個店員搖搖頭。

無奈之下，Mike唯有用佢有限度嘅英文問：「Do you know...where...the bus stop？And can you tell me…here is what location? 」

「This is To Kwa Wan gas station, and I think there's no bus station around here.」店員回答。

「What? You say…here is…To Kwa Wan？」Mike眉頭一皺，露出驚訝嘅表情。

「Yeah, it is.」





Mike靜左無出聲，唔敢相信所聽到嘅說話。

個店員見Mike個樣好疑惑，以為對方蕩失路，因此拎自己部電話出嚟，開個google map，顯示呢刻嘅定位。

To Kwa Wan town，土瓜灣小鎮。

Google Map顯示依家嘅位置的確係To Kwa Wan，只係後面搭多個「town」字。

Mike將個地圖拉左拉右，發覺有啲地方名唔同左，例如九龍塘變成Kowloon Tong Village。





佢覺得對方個Google map唔准，諗住用自己部電話search，點知發現褲袋淨係得部iPod Classic同嗰部立體影像投射機。

「Sir, May I have my phone back？」店員覺得Mike有啲神神化化，擔心對方會搶走自己部電話。

Mike再望多兩眼個Google map，個定位顯示確實係「To Kwa Wan Town」，之後佢先還返部電話俾人。

從頭先到依家，一連串所發生嘅事，都令人無法理解。

Mike行出去，獨坐在便利店門口，嘗試整理自己嘅思緒。 首先，佢順住脈絡連結返成件事：

一開始佢喺自己房，玩緊部立體投影機，然後㩒左中間粒掣，隨之突然就瞬間轉移去左一間大屋，並遇見同自己生得一樣樣嘅男人。

佢係獨仔，無孖生兄弟，照計世界上應該唔會有人同佢撞樣。

另一樣難以理解嘅係，從店員口中以及Google Map嘅定位系統，都顯示呢度係土瓜灣，問題係除左舊宋皇臺石，呢度完全無一忽似土瓜灣。





呢一切到底係咩一回事？

順住思路，佢又諗返起開機嗰陣，曾經出現一句「時空裝置啟動」嘅提示音。

莫非部立體影像投射機係一部時光機？

佢左諗右諗，最終經過一番思量，得出左一個好大膽嘅結論——自己穿越時空，嚟到左另一個平行宇宙！

或者只有咁樣先解得通目前所發生嘅事。

Mike推測部立體投影機應該就係穿越時空嘅裝置，當其時佢㩒左中間粒掣，無意中啟動左穿越功能，就將自己傳送左嚟另一個時空。

嗰個生到同佢餅印咁嘅男人，順理成章就係呢個平行時空入面嘅另一個佢。





亦正因為喺唔同嘅時代背景，所以眼前呢個土瓜灣，同佢所認識嘅土瓜灣截然不同。

至於點解會變成「歐美小鎮」，呢層佢就未諗得通。

然而，以上都係佢根據件事嘅來龍去脈，以及結合左五季Rick and Morty所推斷出嚟嘅想法。

想知估得啱唔啱，只要攞部機出嚟，再試一次就知。

佢之前隨手轉左幾下個環形轉盤，就開著左部機，呢一次佢就照辦煮碗，順時針轉幾下個轉盤。

只不過，部機今次卻毫無反應。

跟手佢再試多幾次，結果都係一樣，都係開唔著。

係咁就大獲啦，家下開唔到機，一嚟驗證唔到部機係咪時空裝置，二嚟假如真係嘅話，咁仲大獲，部機開唔到，就等於返唔到去原本屬於佢自己嘅時空。





Mike繼續再試，無奈搞左大一輪，始終都係唔得，最後仲攰得滯，頂唔順直接挨埋墻恰著左。