妳與我，間隔着一點點距離: 第十八章

鄰座沒有鍾英敏的第一天，我伏在桌上納悶着，沒有心情上課，忽然有人拍了我肩膀一下，是詩詩。
「呢疊係你冇返嗰幾日各科嘅筆記，你睇完有咩唔明可以問我，功課有咩唔明都可以問我架！」
「唔該晒……不過我自己都搞得掂，嗰幾日嘅功課我都有交齊。」我看着詩詩遞給我的筆記，卻沒有接下來的意欲。
「我啲筆記淨係寫低咗重點，睇起上嚟好過揭書啦，可能會用得着呢！」
「唔……咁唔該晒……」
詩詩見我伸手接過筆記，對我露出燦爛的笑容，似乎很高興。
我沒有理會她，把筆記收在抽屜後，便繼續伏在桌上。
 
「喂死仔，訓夠未呀？」劉華狠狠拍了一下我的頭。
「咦，落堂喇……」我揉着惺忪睡眼，又伸了個懶腰。




「條女調走咗啫，唔洗搞到自己咁頹喎，起碼又調返條女坐你隔離啦，係咪咁話先？」
「咁不如我調去你隔離呀？」
「調你老母呀！衰仔想拆散我同我女神？冇咁易……」
「咦，邊個係你女神呀？」李詩詩突然插嘴。
「嘩乜……乜你原來仲喺度架……」劉華嚇得瞪目結舌。
「哈哈，唔阻你地傾偈，我走先喇。」詩詩再一次展露其招牌笑容，然後轉身離開。
「其實佢都唔錯呀，份人幾nice，把聲又溫柔，又笑得幾靚，仲要成績好喎！有個咁嘅人坐你隔離，你執到啦。」
「你執埋我嗰份囉……」
「女咋嘛，唔係坐你隔離啫，都可以傾偈，都可以text嘅，唔洗咁灰喎。」
「又好似係喎……」




「係囉係囉，劉華講得啱架。」
「嘩李詩詩，你唔係走咗喇咩？」今次輪到我嚇倒了。
「漏咗銀包冇拎，咪返嚟拎囉。」
「哦……」我和劉華面面相覷。
「其實我聽唔到你地講乜架，我純粹搭下嘴咋，好喇，我又走先喇。」又一次笑容，然後轉身離開。
「佢……係咪真係聽唔到架？」不知為何我有點心虛。
「怕咩喎，佢講到明佢聽唔到，證明佢就算聽到都扮唔知唔想理啦，況且又唔係咩唔見得光嘅事，你唔好咁細膽好冇？」
「唔……」
「希望佢聽唔到我女神係邊個……」
「你咪又係咁……」




「講下啫，冇事嘅……」
「有咩事？」這次不是女班長詩詩，而是男班長。
「關你鬼事咩，學咩人搭嗲呀！」我跟劉華齊聲說。
 
小息完結，詩詩也返回了座位。
「喂！」詩詩主動向我搭訕。
「唔？」不知怎的，我感到有點不自在，可能是顧忌着她剛才可能聽到我跟劉華的對話。
「其實呢……明眼人都睇得出你同佢咩啦，哈哈！」
「吓？」
「佢呀。」她指了指遠處的鍾英敏。
「唔係掛……」
「你同佢上堂雞啄唔斷咁，會唔會係冇野呀？」
「唔……」我敷衍着她，我實在不習慣跟不太熟的人談自己的事。
「鍾意人就俾啲心機去追啦，唔係坐隔離啫，咪又係同一班！」她在我耳邊細語，不讓附近的人聽到，想不到她也有如此心思。
「唔……」我隨便回她一句，心裏卻一直思考着她說的那番話。




「超！十問九唔應，淨係識唔唔唔，唔理你喇！」她鼓起了腮怒目睥了我一下，然後別過了頭。
我忽然有一刻覺得，詩詩鼓起了腮，原本圓潤的臉頰顯得更脹的樣子很是可愛。
我下意識舉起了手，然後捏了一下她的臉頰，只見她呆住了，我亦沒有鬆手的意思。
就這樣僵持了數秒，她的臉頰都紅通通了，才給了反應，撥開了我的手，一拳捶在我的手臂。
「做……做咩meet人塊面喎！」
「吓，得意咪meet囉，哈哈！」
「衰人！」她伏在桌上，把通紅的臉埋在雙臂之中。
「咁易嬲架……對唔住囉。」
「哼！」
「唉算……聽書。」