妳與我，間隔着一點點距離: 第五章

自從那天跟鍾英敏打開了話匣子後，我們之間開始多了交流，每天早上我們也會互相打招呼，上課時不時都會交談，但話題主要圍繞着學業，多數是她遇上不懂做的題目而叫我教她，但甚少閒聊。
 
「喂呢題數點計架？」
「唔……呢題有啲複雜嘅，你首先要爆開呢舊數，之後再咁樣計……」
「咦，原來首先要咁計架，唔怪得我計極都計唔到啦！」
「呢類題目一定係咁做架啦！」
「原來係咁……嘻嘻！唔該晒！」
「唔洗…」
 
「喂喂！點解我計極都計唔到個internal resistance嘅？」




「等我試下計先……你係咪計到3.86呀？」
「係呀！」
「咁咪啱囉！有咩問題？」
「但係同miss喺黑板上面計嗰個答案唔同喎…」
「唔係掛……我計多次先……妖！擺明條八……呃……miss寫錯答案啦……」
「哈哈！原來又係咁，佢都唔係第一次喺黑板計錯數架啦！」
「呃……唔……」
「係呢，你頭先……係咪想講……條八婆呀？」
「呃……唔……係呀……」
「嘻嘻！你紅都面晒啦，擺明係啦！」




「邊……邊有喎……做你嘅physics啦！」
「做囉……嘻嘻！」
「仲笑喎！」
「唔笑囉……嘻……」
「哎……」
 
因為「八婆」這個詞語，我們談到了《頭文字D》由杜汶澤飾演的阿木那一段痛罵校長的對白；再因為《頭文字D》這部電影，我們談到了周杰倫。
 
原來周董是她的偶像，她很喜歡聽周董的慢歌，而我只聽過《一路向北》、《菊花台》這兩首熱門到不行的歌，於是她便如數家珍地向我推介周董的歌。
當然，我亦會禮尚往來，向她推介動聽的廣東歌，由熱門歌手的冷門歌曲，說到冷門歌手的動人之作，每次她都會用紙筆記下歌手及歌名，然後回家細聽，翌日再詳談她的聽後感。




 
「陳永謙！」
「咩事呢鍾英敏小姐？」
「你仲好意思問？你尋日推介首咩歌俾我呀？」
「唔好聽咩？作曲伍樂城，填詞林夕喎，仲有靚仔主唱勁歌熱舞。」
「哼！你仲好講喎！」
「其實我真心覺得好好聽架喎，同宜家啲Kpop差唔多姐。」
「哼！我唔會再信你。」
「喂喂唔好嬲啦…我今日推介一首金歌俾你，王菲嘅《約定》，絕對冇伏！」
「憑咩要我信你？」
「一係咁…有伏嘅話乜都得！」
「拿！你話架！我聽住先啦。」
 
她鼓着腮的樣子很可愛，所以我經常用一些小把戲來作弄她，不會令她過份生氣，又可以讓我欣賞她腮子脹脹的可愛模樣。
然而，她是個很難哄的女生，但又很喜歡別人哄她，所以每次惹惱了她，我都要絞盡腦汁，千方百計去逗她笑。




 
我問過她為何女生總喜歡別人哄，她說這是天性。
但明知別人不過是在用花言巧語哄騙她們，她們都會照單全收，這是天性作祟嗎？
我沒有問她這個問題，該說我沒有必要問她這個問題，因為當看不見女生的笑臉，男生會自然地逗她們笑，這也是天性，是發自內心的。
縱使我們說的只是哄騙說話，不都是真的，但都是出於真心的善意謊言，只為博紅顏一笑，僅此而已。
 
呃，我好像沒有跟大家提及我向她推介的那首歌曲，其實我覺得這歌確是不錯，起碼我每次聽都會放聲大笑……那首歌是……不過是古天樂的《今期流行》而已。

https://www.youtube.com/watch?v=vmgySQRzU7A