我同離家出走嘅有錢仔合謀扮拍拖: 十三

今日係我出國嘅日子。
朱皓言送咗我去機場。喺離境大堂，我哋依依不捨咁同對方講最後嘅説話。
「到咗嗰邊安頓好之後記得同我講。」
「去到唔准溝鬼仔。」
「要多啲打電話俾我。」
朱皓言好似一個唔放心寶貝女獨自遠行嘅家長咁囑咐我。
「知道喇！」我攬住佢。「你都要乖乖哋等我返嚟！唔可以俾其他女人勾引走！」我惡狠狠咁𥇣住佢。
「係喇。」佢笑，摸咗摸我個頭。
真係希望時間過得耐啲，我唔想咁快走。





但即使我再點樣拖延都好，要嚟嘅始終要嚟。
我係時候要走喇。
朱皓言拖住我行向禁區方向，喺差唔多到嘅時候停低咗。
我哋最後一次用力咁抱緊對方，然後我終於放開咗佢，一步三回頭咁慢慢越行越遠。
我內心有對未來嘅期待，亦有迷惘同空虛。

我一邊行一邊打開電話個mon，lock screen嘅wallpaper係我同朱皓言喺我生日時影嘅合照。
我擰轉頭再望咗朱皓言一眼，佢同我揮緊手。
我對佢微笑咗一下，深呼吸。
然後步伐堅定咁行入禁區，前面等待住我嘅係未知嘅未來。





出國嘅初期，由於環境轉變太大，我好唔適應。喺外國嘅頭三個月，我個腦無數次浮現出放棄嘅念頭，成日喺電話喊住咁同朱皓言訴苦。
如果唔係有佢一直溫柔咁安慰我鼓勵我，我諗我撐唔到落去。
喺我出咗國一年後，朱皓言有偷偷地嚟搵過我，但淨係留咗幾日就走。
為咗瞞住佢屋企人，我哋大部分時間都只可以電話/FaceTime聯絡，佢唔可以嚟搵我。
喺我讀廚、朱皓言接手屋企生意嘅忙碌生活下，我哋就咁樣捱過咗幾年異地戀。

短短幾年間，朱皓言成為咗佢屋企公司最主要嘅話事人，佢阿爸基本上已經將成間公司都交俾佢，自己就過住退休生活。
聽到我同朱皓言呢幾年一直冇斷過聯繫，佢阿爸阿媽最後都只係嘆咗一口氣，算係默許咗。
再後來，朱皓言亦將工作慢慢交托俾佢啲下屬。




「我而家都變咗做un un腳唔使做嘅管理層，可以去寫小說喇！」電話入面，佢嘅語氣係前所未有嘅放鬆。
果然，只要佢想做，就冇嘢係做唔到。
「而家就只係等你讀完書返嚟喇⋯⋯」佢嘅語氣有啲委屈。距離上一次見面已經係一年前嘅事。

而今日，我終於踏上咗心心念念嘅回國旅程。
拖住行李行出閘口，我見到朱皓言翹首以待嘅身影。
佢都見到我，興奮咁同我揮手。
平時FaceTime睇唔覺，而家咁樣睇，佢個樣比起幾年前成熟咗好多。
我忍住鼻酸，笑住向佢跑去。

朱皓言係揸車接我嘅。佢返屋企嘅全程都喺度哼歌，喜悅嘅心情無法掩飾。
車停咗，我哋喺一個屋苑嘅停車場落車。
「咦，真係變返有錢人喎。」我打量一下周圍，呢度環境優美，同我哋以前租嘅地方簡直差天共地。
「使乜講。」佢一手拖住我，一手幫我攞行李。我跟住佢上咗屋企。
我曾經無數次喺同佢FaceTime嘅時候見到呢個地方，但到親眼睇到嘅時候，感覺又唔同咗。




「呢度就係我哋嘅屋企喇。」朱皓言溫暖嘅聲音喺我背後響起，我擰轉面望向佢。「我已經一早買埋你嘅日用品。」佢而家講任何嘢個嘴角都係上揚嘅。
我嘅視線對上佢發亮嘅眼眸。
下一秒我眼前一黑，原來我已經落入佢嘅懷抱。
「歡迎你返屋企。」佢語帶笑意，稍一偏頭就喺我嘴唇落下一吻。
我手臂自然咁環抱佢嘅頸部，熱烈咁回吻佢。

有句嘢我唔好意思講出口。
只要有你嘅地方，就係我屋企。

（完）