呢排成日發春夢: 八

***
「你叫張樂妍？」酒店床上，面前嘅女仔好驚嚇咁望住我。
「你點知㗎？」望住佢驚慌嘅樣，我竟然有啲想伸手搣佢塊面。
「你琴晚自己講嘅。」我語氣平淡。
「哦……」佢搲咗搲頭，好似唔記得咗有件咁嘅事。
佢梗係唔記得啦，因為我呃咗佢。
佢根本冇講過自己個名俾我聽。亦因為咁，我嘅猜測得以證實。
本來我都覺得自己嘅諗法太荒誕，純粹想試吓。但呢個女仔嘅反應話俾我知，我之前發嘅夢並唔係單純春夢。
我夢入面嘅人——張樂妍，確實存在喺現實。
其實由喺酒吧廁所門口見到佢嗰刻，我已經好確定呢個女仔就係張樂妍，如果唔係我都唔會咁隨便同一個陌生人去酒店。




我有認真諗過要唔要當呢晚係普通嘅One night stand就算，但最後都係順從自己嘅感覺，同佢交換咗contact。
我知道自己係希望同張樂妍繼續來往嘅，雖然夢入面嘅佢根本對我嘅表白唔上心。
但老實講，我並唔認為自己真係會好似夢入面一樣對一個女仔咁著迷，仲對佢表白希望轉正。
邊有咁多炮友變情侶吖。
之後嘅日子，我哋都係相約喺床上。
呢段時間，越同佢相處，我就越理解夢入面嘅自己點解會心動。
張樂妍的確係一個好有魅力嘅女仔，佢好直接，亦好清楚自己想要啲咩，唔會委屈自己。
我甚至有少少懷疑，如果我呢一刻突然間同佢講想斷咗呢段關係，佢會乾脆俐落咁著衫走人，由得我自己一個繼續瞓喺呢張酒店床上，再順手block埋我。
諗到呢度，我脫口而出。
「去唔去睇戲。」我一講出口就已經後悔。




「咁有閒情逸致？」佢望住我，我盡力掩飾自己嘅慌亂。
其實我都唔知自己點解要約佢，我一直都認為炮友一定要認清自己身份，除咗肉體交流外唔應該有其他接觸，如果唔係是但一方沉咗船都會令段關係變得好複雜。
但話已經講咗出口，再收返又好刻意。
又或者係我唔想收返。
同我擔心嘅一樣，自從呢日起，我哋嘅關係有種微妙嘅變化，唔再係一對只有肉慾嘅炮友。
我嘅擔憂應驗咗，但我竟然冇感到困擾。
我諗咁樣先至係最令人擔心。
同張樂妍相處嘅日子入面，我有無數次機會可以向佢提出中斷關係，或者變返之前咁，唔做上床以外嘅嘢。
但我冇咁樣做到。
我知道我出咗問題，但我一直袖手旁觀，任由自己沉淪落去。唔單止咁，我仲變本加厲，帶埋佢嚟我屋企。




我淨係想同張樂妍身處同一個空間，做最平常嘅事，唔帶住任何肉慾。事已至此，我不得不承認自己係唔滿足於炮友嘅關係。
我鍾意咗張樂妍。
不過佢好似同我諗嘅嘢唔同，我喺梳化攬住佢睇Netflix，但佢只想直入主題，好急切咁錫我。我唯有順住去，帶佢入房，怕俾佢發現我嘅私心。
但最終都係出事。
一時忘情，我爭啲講咗同夢入面一模一樣嘅表白說話。
但諗到夢入面佢嘅反應，我又僵硬咁停住。
我唯有將張樂妍嘅視線轉移，以情慾掩飾自己嘅私慾。
唔需要急於一時，以後仲有好長嘅日子，會有好多機會。我同自己講。
我唔會放開你。呢一刻，望住張樂妍被慾望染上粉紅嘅臉龐，我暗自下定決心。