【請勿當係真人真事】女朋友的AV: 被偷的玩具

「阿LING，何家俊呀。」

  我略帶遲疑地敲門。

  奇怪，星期三晚，又唔係房又唔聽電話。

  不過我心諗，都唔係啲咩特別野想搵阿LING，都係返房做埋啲野先，夜啲再搵都得。

  行到去𨋢門，見到一大堆人係度等𨋢，我突然社恐發作，打左個招呼，就轉身推門諗住行樓梯上幾層樓算。



  一入到梯，就一大陣煙味撲面而黎，後梯係煙囪，就人所共知，只係我無諗過，上左半層樓梯，一轉角，係見到袁可兒坐左係度食緊煙。

  袁可兒一對人字拖，一條薄身既高腰長直裙，一件大圓領既緊身背心，再加一對圓框金絲眼鏡，全完係文青既裝扮。

  但係佢一身古銅色皮膚，及肩既金髮，特長既眼睫毛，厚厚既咀唇悠悠咁吐出一小縷煙，唔係109辣妹又係乜。

  袁可兒見到我，即時笑口噬噬：「咁啱呀？」

  其實我一直都有少少故意避開佢，畢竟我同阿LING都拍緊拖，同佢好熟咁咪盞瓜田李下，有啲無謂既誤會都係可免則免。



  袁可兒拍一拍佢隔離既地下，示意我同佢一齊坐樓梯級。

  我諗下，坐一陣啦，一場舊中同，無理由咁都唔埋佢架，我小心翼翼咁坐底，因為後樓梯都唔係特別闊，我唔想有意外既身體接觸。

  坐低左，但大家又好似無話題咁，過左大半分鐘，佢先開口：「多謝你呀家俊。」

  我：「多咩謝丫，舉手之勞啫，你地咪請左我食飯囉。」

  可兒：「唔係講搬野，我係多謝你無同其他人以前既事……」



  我：「得啦，你放心盡情去享受下大學生活啦。」

  袁可兒雙手抱膝，將個頭放左係膝頭上面，側起面對我微笑：「你始終都係咁體貼。」佢吸左一口煙，吹左去另一邊，突然問我：「你同阿LING拍拖拍得開唔開心呀？」

  我比佢咁問，搞到我都問左自己一下，不過都覺得自己笨，反而係佢條問題怪。

  我：「梗係開心啦，唔開心的話拍拖黎做乜？」

  可兒：「記唔記得以前我地都會咁坐樓梯傾計架？」

  我總覺得每次佢問完我一啲野，其實唔係好理會我答乜，又跳左去問第啲野，一係就係佢極度自我中心，一係就係句句野都係煙幕黎，直擊要害果句未出場。

  我答佢：「記得，你仲話唔明點解啲蚊淨係針你唔針我丫嘛。」

  袁可兒變為面向前方，食左幾口煙，就話：「有啲野我唔知點同你講好……」



  我心下一寒，你唔好而家先同我講果啲餘情未了果啲呀，我應付唔到架。

  但我又覺自己痴線，會唔會幻想得自己太有型。

  我答佢：「你咪慢慢諗清楚先講囉，反正我地住埋一棟，你想到點講先搵我囉。」就諗此地不宜久留，就用呢個契機起身走。

  妻不如妾，妾不如偷，男女一樣，有啲男仔拍拖之後，反而覺得多女仔埋身「試探」，我見過唔少人上當悲慘收場，男仔女仔都係一樣，想用「偷」呢個行為去自我膨漲，被偷既只是一件玩具。

  保持係友善同太友善之間，呢個平衡係好難玩，聰明既係應該知道，君子最好不立危牆之下。

  我起身要繼續上樓梯之際，袁可兒仲加多句：「如果你拍拖有咩唔開心，可以隨時搵我傾計架喎。」

  我擠出最熱心既一句：「好額！」就急不及待衝上樓梯返房嘞。