【請勿當係真人真事】女朋友的AV: 小學六年級

傍晚。

  我同我阿哥將個足球一路互拋，一路行返屋企。

  小學六年級既下學期簡直係一個長既暑假，呈分試已經過晒，學校既氣氛都由上兩年一路累積既緊張，剎那間解放左出黎。

  加上我成績唔錯，如無意外都可以入到同區一啲好既中學，無乜多想可以放心享受下最後既小學生活。

  阿哥開門入屋，聽到既係吸塵機既聲音。



  屋又唔係大，當然一轉身入房就見到媽媽係度吸緊塵。

  「你地都唔細，要自已執下房啦，七國咁亂。」媽媽都係哦下。

  阿哥好識做，放左個波係窗台，再係個箱度抽左套衫比我就話：「細佬沖涼先，」再一手攞左個吸塵機，「我會吸埋個廳。」

  媽媽見呢度無佢既事，就繞過我地行出房，但又話：「今晚食翠肉瓜炒豬頸肉。」

  「好野~~！」我同阿哥異口同聲。



  媽媽入廚房，我亦入廁所沖涼。

  沖完涼後，我正想開電視睇一陣，我阿哥突然走過拉住我隻手。

  我愕然咁望佢，佢好認真咁同我做左一個shhhh 既動作。

  我心下一沉，知道佢既意思，就係「風起雲湧」。

  我同阿哥慢慢竄返入房，但係就一件事令我地泠汗都出埋，大門鎖「啪」的一聲打開了。



  「我返黎啦，我買左兩條廁紙啦。」爸爸一入門口就話。

  鴉雀無聲。

  關門既聲。

  洗菜既聲。

  爸爸放低兩條廁紙，走埋黎我兩兄弟度，踎低同我地講野。

  「死！人！頭！」廚房傳來淒厲的怒吼。

  唔知幾時開始，媽媽係會突然好憤怒咁鬧爸爸，我地幾個細路，其實唔係好知係咪真係爸爸做錯左啲乜，只係知道媽媽有時好恐怖。爸爸開始時都好似有拗一兩句，不過好快佢就係由得媽媽鬧。

  「沖左涼未呀你地？」爸爸一如以往的溫柔。



  「細佬沖左，我未沖。」阿哥答。

  「捨得滾完返黎嘞咩？唔使同你個姣婆食糖水呀？」

  「你去沖先啦，跟住我沖。」爸爸吩咐阿哥後，阿哥點頭就入左廁所。

  「你老闆咁鍾意你又唔見佢升你職？比狗屎你食仲咁開心！」

  爸爸摸一摸我個頭問：「家姐呢？」

  我：「家姐學校有增潤，遲放，跟住佢去圖書館，唔返黎食。」家姐最忍受唔到屋企，但係佢唔係離家少女果啲，佢成績超班，係讀邊間入咩科都無問題果啲，不過佢唔想比環境影響佢既DSE，所以佢出左去當咩都唔知。

  「正一仆街黎架！去！死！啦！」



  斬翠肉瓜要咁大力既咩？

  爸爸執住我兩隻手，同我講：「爸爸同你講啲野，等你派好中學之後，爸爸打算搬去離島住，你諗下覺得點再話我知？」

  「煮飯又係我！睇醫生又係我！你就去攬女人！」

  我：「吓？點解呀？」對於小六既我，離島好似台灣咁遠。

  爸爸話：「係車船有啲唔方便，但你同阿哥都係港島區學校，都應該應付到既。搬去離島，屋企大啲，個人空間多啲，出面地方又好啲，雜人又少啲，我諗……你媽媽可以舒服啲。」

  「人又矮！工又龜！仲要去認威！」

  爸爸話：「你幫爸爸執好張飯枱先，我要收好條廁紙。」爸爸好似博士叫主角去救世咁拍了一拍我膊頭，就企返黎身去攞起兩條廁紙了。