《我老婆唔係我女朋友》【那些年／學界比賽／真人】 第四章至六章: 【第六章】 顏文字二人組（４）
輪到阿祥接口：「今年我哋會邀請其他院校報名參加。係呀，有下文㗎，我哋要求一Pair人出席，單拖嘅我哋會幫佢配對，睇星、燒烤、聯誼一炮過喇喂。絕～對唔係餵蚊，好彩嘅話係畀囡餵或畀仔餵。」
我望向Leon：「咁文青又熱，唔多啱我喎，你個仆街不如搞聯校遊船河啦，有得睇水著，有得濕身，又一樣可以聯誼。」
「聯校船P？！你嫌命長想玩花式自殺呀？老佛爺實擰甩你個頭啦。門小你，啲囡好鍾意睇星㗎，你同埋老佛爺一齊去，保證佢開心呀。」呢個弄臣二話不說已經跟主子站在同一陣線。
阿祥插嘴：「係囉，大家兄弟燒嘢食聚吓嘛，仆街中學時日日都濕身，浸到皮都巢晒，夠皮喇啩，一於叫埋條囡一齊去啦，你條囡間【肉園】都放假啦。」
我怔了怔：「你條友咁㒼塞嘅，都話個高妹唔係喏。」
Leon啞然失笑：「門小你，仲講緊嗰個係佢條囡呀？哈哈，佢條囡好賢妻良母feel㗎，當佢仔咁湊，錫到佢燶呀。你呀，好送返啲嘢箍住條囡啦。」前一句向阿祥講，後一句跟我說。
我沒好氣的咕噥：「你唔抵得啫。」Leon一言驚醒，真係應該買件小禮物𠱁𠱁老佛爺喎。
「唔得唔得，你哋搞到我心癢得不得了，我一定要見下你條囡。」阿祥誇張的大叫。