《我老婆唔係我女朋友》【那些年／學界比賽／真人】 第四章至六章: 【第六章】 顏文字二人組（２）
「喂Lu竹，妳成日問住總舵主，乜事先？」我賊忒兮兮的盤她。
「乜佢叫總舵主咩？你都未講我知點解你識佢嘅？」她眨眉眨眼的，面上掛著萬分好奇的樣子。
於是我又將「書劍」和「青梅竹馬」等逸事向她解釋。
她聽過後呼了一口氣：「呵～原來你識佢咁耐㗎嗱。」
算來我確實跟總舵主也相識近十年了，「青梅竹馬」實至名歸。
「喂，妳咪詐詐諦諦喎，咁緊張做乜先？」我乘機施壓。
她有點無奈：「邊有嘢喎，佢係本科Year 3師兄，都係關心吓啫。」傻大姐居然罕有地面露靦腆之色。
哈，我開始明白瘦妹點樣讀心了，似乎Lulu的徵狀跟我一樣，都是生有容易被人一眼看穿的「顏文字」，呢條囡明明係有啲嘢！
明愛暗戀，患得患失，自己試過，阿心試過，似乎Lulu都難以免疫。
阿祥沖完涼返來，拉了我和Leon一起去吃午飯，Lulu則返回「園區」跟應援團午飯。由泳池出來行落Park Lane，Leon提議去吃【Wendy’s Hamburger】。好啦，過馬路到加連威老道斜路，在名醫密佈的【東英大廈】對面就有【Wendy’s】。
以前後生細仔唔會咁大吉利是去【東英】睇醫生，出來工作後開始玩影相才去多了，因為「癲搶」、「影相舖」、「蠔油」等相機老店都在【東英】。
