《我老婆唔係我女朋友》【那些年／學界比賽／真人】 第四章至六章: 【第六章】 個人單項初賽（４）
我也向他點頭打招呼：「嗨總舵主，好耐無見，今朝接力賽唔見你嘅？」穿好頹Tee，信步行到他第三線起點。
「哈，好耐無人叫我總舵主喏。無呀，今朝要返實習帶隊呀，剛啱都係早走咋，你而家讀乜嘢？」他不忘交代近況。
「我市儈啲讀商科，唔似你哋作育英才啦。係喎，你實習教男校定女校呢？」我指著他那套【肉園】的隊服，意會我知道他實習教師的身份，當然要八卦一下我和Leon最關心的話題了。
「唏，誤人子弟就真啦，我喺【孖你慢司祭】實習呀，今朝原本要幫手帶隊㗎。」總舵主不虞有詐，照答無誤。
「噢～喺男女校實習呀…」我心諗咁嘥料呀門小你，等下又可以同Leon圍爐當笑話了（梗係唔會當面笑狗總舵主啦，撩交打咩）。
那知「陳瀡」以為我羨慕他可以去名校實習，一臉謙遜的說：「我以前喺嗰度讀中學，佢哋先收我實習咋，好彩呀。」
「係喎，真係好彩喎。」我不以為然，因為根本不是重點，我梗知你讀邊間中學啦仆街，我同你學界比賽時已經青梅竹馬啦你鹵味。
此時裁判員過來趕我離開起點了，因為第二組初賽即將開始。
「噉一陣再傾啦，你『早登彼岸』嘞。」我當然不忘抽多一下水。
「哈哈，講埋啲衰嘢。」他笑著回應。
以前大家一齊在起點等出賽時，我都不知叫他冚家「早登彼岸」幾多次了。