《我老婆唔係我女朋友》【那些年／學界比賽／真人】 第四章至六章: 【第六章】 個人單項初賽（１）
個人單項初賽
回到看台高處稍事休息，阿祥過來叫我，一副準備收工的模樣。「喂我去沖涼換衫，一陣一齊食飯吖？」
我有點奇怪：「你無報單項咩？好似收工噉嘅樣？」
今次輪到他一臉疑惑：「我上午收皮喇，都話戥腳游接力嘛，下午游多一場決賽咋，你有報單項咩，50自？」唔使問【山大】都可以入接力賽決賽了。
我點點頭：「Leon條粉皮想我哋學校都有人報單項，咪隨緣游下囉。」
「哦，噉沖完涼出嚟睇你啦，之後再一齊食飯。」阿祥邊行邊說。
接著Leon和兩個隊友都一起到更衣室梳洗準備返歸，其他院校的隊伍和應援團一下子都撤了大半，整個看台變得冷冷清清。
眾人去後，我剛攤下準備眠一眠，Lulu又拿著一大包糖，蹬、蹬、蹬的跨上看台高階。「咦，得返你一個嘅？食糖吖。」
「佢哋沖涼嘛，得返我一個游單項咋。」我順手拿了粒檸檬糖放入口。
啊哈？味道咁似昨晚我們那顆抵死纏綿的「初吻糖」嘅。
「咦，你一陣幾點游單項呀？」Lulu好奇的問道。
「好似半個鐘後，50自呀。」
「你好似好攰噉嘅，快啲休息吓啦，我一陣再嚟叫你，千祈唔好唔記得報到喎。」高妹仍舊非常熱心。
確實太耐沒有比賽，剛才緊張了一陣，現在身體也真的有點發軟，遂返回坐位瞌了一陣，不過也只是片刻而已，因為轉頭已經叫第一組初賽集合了。