《我老婆唔係我女朋友》【那些年／學界比賽／真人】 第四章至六章: 【第六章】 元洲街邨的邪神傳說（１）
元洲街邨的邪神傳說
返到麗池還未夠鐘入場，只好圍埋班細路度hea吓。
剛從細輝手中搶了一本《龍虎門》（舊著，千祈唔好同我講新著），踎低準備開始睇吓，點知條友仔食住上。
「仁哥，教我計呢條數吖，『手表賣400元，八折出售，便宜了多少？』。」細輝「隊」本作業到我眼前。
幫眼教吓細路功課都是我這個副教練日常的義診範疇。
「嘩，乜嘢題目嚟㗎，七蚊都兩個錶啦，仲四百…嗱，八折幾多呀？乘80除100嘛，320蚊啦。但你睇清楚題目喎，陰Q你平咗幾多呀。」小學雞的題目一向都喜歡「捉字蝨」，以前幫人補習時都領教不少了。
細輝話頭醒尾：「啊？即係平咗80蚊啦。」啲𡃁仔愈來愈醒，唔似我以前成舊飯噉。
輪到攣毛來問英文，攣毛是個天生攣頭髮的小四女生，像極了童星時的馮B寶。「仁哥哥，呢度唔識，I _____ dim sum with my Mother at a Chinese restaurant tomorrow。」
我一見題目，仆街乜嘢dim sum呀，唔識解喎，阿Sum我就識佢；後來諗諗Chinese restaurant即係茶樓啦，呵～聯想到dim sum即是點心譯音，冚家祥出啲噉嘅題目嘅？
「哦，去茶樓嘛，前面嗰個係點心啦。」我估計攣毛跟我一樣，被個英文生字考起啩。
「梗係食點心，填eat囉？」攣毛又可以馬上聯想到，九成是今天剛學完這個生字。
我接著說：「嗯～佢話聽日先去食喎。」明顯又是「捉字蝨」問題。
「誒…」
此時我有點不耐煩了，咪阻Ｑ住我睇《龍虎門》啦。「嚡～will eat咪得囉。」懶得等她「誒來誒去」了。