《我老婆唔係我女朋友》【那些年／學界比賽／真人】 第四章至六章: 【第六章】 書劍恩仇舊相好（１）
書劍恩仇舊相好
「…哈…」、「…係啦…」、「唔係啩…」，在朦朧中聽到斷斷續續的談笑聲。
阿心見我醒醒哋，湊過來我耳邊輕輕說：「差唔多起身喇，爛瞓豬，要食飯喇。」
半睡半醒之際，依稀聽到一把男聲問她：「妳覺得佢狀態點呀？」
哦～原來就係呢條沐契同阿心傾偈嘈住我瞓。
「嗯…佢呢兩個星期都練得幾緊要，你可能唔覺，我幫佢按摩就知，佢瘦咗好多嚕，肩背肌肉都好結實，狀態應該唔錯。」模糊間聽到阿心答他。
「佢之前整嚫個膊頭，而家點呀？我又唔聽佢提起。」疑似沐契再問。
「佢無事好耐啦，嗰次陪佢返泳會，佢喺泳池抱起…噫吔～你自己問佢嘛。」阿心不知想起甚麼，聲音變得有點嬌羞。
不知道條沐契是誰，我個怕生女友居然同佢有講有笑。
「佢自己唔會講啦，識問梗係問教練妳啦。」沐契繼續說。
「嘻，亂噏～」
這運動場看台的一隅，原本是我的露宿者床位，平日只有阿心等我，今天卻來了一位稀客。我睡眼惺忪的坐起來，原來沐契正是Leon，只見他坐在阿心旁邊吹水。
「呵～欠～點解你今日咁清閒嘅？」我伸著懶腰好奇的問Leon。
「呿～得閒死都唔得閒病呀，專登過嚟搵你㗎。」他說著從袋中取出一疊紙。「出咗比賽排位喇，你估都估唔到，撞返你個『舊相好』呀。」
聽到「舊相好」三個字，阿心警惕的揚揚眉，眼睛立即瞇起的斜睥著我，像極了小貓咪弓起背準備捉老鼠的模樣。