《我老婆唔係我女朋友》【那些年／學界比賽／真人】 第四章至六章: 【第五章】 廢青升呢殘廢青（２）
肥直待我們兩人都可以做出「垂直蝶式」後，叫停我們，專注糾正和指導亞里仔的動作，而我則在旁偷聽。「嗱亞里仔，頭先我喺水底觀察你嘅動作，你做得好好，已經掌握到點樣燃點瞬間嘅爆發力，明白到要爆，力量唔係由一兩塊肌肉可以提供嘅，關鍵係在於全身協調。」
肥直說時偷偷瞟了我一眼，我知道他暗示我注意，遂緩緩點頭扮同意。他繼續說：「所以要有完美嘅『瞬爆力』，單用肩臂力係唔可能嘅，我哋必須要向全身肌肉借力，令全身上下都要保持緊張，呢一種肌肉覺醒嘅狀態，如果協調得宜，所有肌肉包括背、腹、腰、臀、膝、大腿、小腿以至腳踝都能夠供給力量。」
誒…我練練吓會唔會變超級撒亞人呢？
他稍為停頓一下，見我們沒有發問，就繼續再說：「好嘞，把握到點燃肌肉嘅『瞬爆力』，接住就係討論點樣令團火燒耐啲，就係所謂嘅『肌耐力』嘞，即係肌肉喺產生力量時，所能夠持續嘅時間。嗱亞里仔，一般你游蝶式比賽，係唔係30秒之內點都完成到？」
亞里仔點頭答道：「係呀，游50蝶或200四（即是200公尺個人四式，其中蝶式佔50公尺），多數都係30秒內。」
「好，一般認為30秒內嘅，都屬於高爆發力嘅運動，所以我哋嘅『自力煉抗』，就以30秒嘅肌肉耐力，嚟做訓練指標嘞。不過無論『瞬爆力』同埋『肌耐力』都係靠自己游出嚟嘅，我只可以製定餐單，食唔食得落，就睇你自己喇。」肥直清楚的向亞里仔闡述訓練理念。