《我老婆唔係我女朋友》【那些年／學界比賽／真人】 第四章至六章: 【第四章】 唔試好過試（２）
「唉～又要同啲老人家比賽。」細豬自言自語又慌死我聽唔到，他的主項跟我一樣是短途自由式，今天我在他旁邊線一起等起跳。
「喂，肥滯（仔），夠唔夠薑賭支汽水呀？你快過我，我請埋妹豬一齊飲吖。」佢兩兄妹日常有部份詞彙都用鄉下話講，可能家人習慣吧，所以我都會用返佢哋啲鄉下話同佢哋玩。
唔知點解我總是聯想起老坑以前挑機個死人樣。
「係咪呀，唔好老點喎！請埋我阿妹喎。」衝動不經大腦，以為自己天下無敵，真是十足十以前的我。
「無問題吖，肥滯，你輸又點先？」我輕佻的回應。
「挑～我會輸？不過我無錢請你飲汽水喎。」細豬倒也老實。
「咄～莫財我唔同你玩喇。噉啦，賭你後日起雙飛啦。」又係老坑教落啲衰嘢，唔好大教壞細真係遺害幾代人。泳會隔天才練水的，所以要待後天才可以找數。
細豬不明所以：「乜嘢起雙飛呀？」
嘿肥滯，以你嘅智商，你諗一世都諗唔到㗎嘞。「你今日總共游咗幾多？」我語帶挑釁的問。
「嗯，500…600…應該800左右啦。」他認真的在數手指，看游了幾多公尺。
「嗱，起雙飛呢，你後日自動自覺，將要游嘅份量乘二，乘數識喇啩。」其實何止雙飛，我當年賭輸被人罰起三飛都試過…
「嘩！咪要游1600？死梗喎。」細豬這刻才驚覺注碼的份量。
「呵，驚輸咪唔好賭囉，但第日唔好喺我側邊阿吱阿咗摩洛哥嘞。」呢一刻我直情標童老坑上身。
「挑，我使驚你個老人渣？嚟咪嚟！」細豬爆發出一往無前的氣勢。
哈哈，我攞學界冠軍時的感覺返晒嚟，佢同我當年嘅口吻如出一轍。