《我老婆唔係我女朋友》【那些年／學界比賽／真人】 第四章至六章: 【第四章】 我城隍老坑嘅（４）
現在最直接的就是試試找阿直，探探行情和聽聽他的意見吧。我有阿直家中電話號碼，中午時在「眾義堂」（Leon莊房）打過一次去沒有人聽，晚上回家再打去有個女人聽：「喂，唔該我想搵阿直呀，我係佢以前嘅學生。」
「哦，您稍等。」聽電話的女聲操國語的。
咦，講國語的？
「喂，邊位呀？」熟悉的潮汕口音傳來。
「阿直，我阿仁呀，以前跟你練水嘅呢。」我忙不迭想喚起阿直的記憶。
「… … 」
「呢～幾年前破分齡賽紀錄嗰個肥仁呢？你仲串我係人都得呢，你話你高小畢業就已經游到我嘅時間呀。」老坑永遠對我們的成績踩到一文不值。
「…呵呵，你個死肥仔，死咗去邊呀，咁耐唔返嚟練水？」聽到他這樣反應，即是他已經記起我了。
於是我將事情的始末告訴他後，求救的問道：「點算呀，阿直。」
「成日叫你哋要保持住要游吓游吓，唔可以完全停晒嘛，啲狀態唔可能話有就有㗎嘛！幾時要比賽話？仲有六個月？好啦好啦，我安排吓先，你幾多號電話？我安排咗打返畀你。」阿直一輪嘴訓話，感覺比以前正經多了，嘿，可能人成熟了吧。
我稍為安心一點，反正以前都是由零開始，俾條老嘢操返來的，再跟返他應該都好容易恢復的。
大約兩個鐘後阿直打來，結果卻跟想像中有很大落差：「阿仁，你聽晚6點去麗池，咩話？唔係北角嗰間夜總會呀～去麗閣邨泳池搵黃幼軍，黃—幼—軍—呀，肥佬嚟㗎，佢係我以前嘅省隊隊友，而家幫荔閣泳會教細路，唔好遲到呀。」