《我老婆唔係我女朋友》【那些年／學界比賽／真人】 第四章至六章: 【第四章】 藝伎回憶錄（３）
「做乜嘢發吽哣呀，嗯？」一隻柔軟修長的小手，滑入我手中牽著我。放學坐火車返石硤尾途中，阿心見我納悶著問我。
「無呀，突然叫我去返比賽，有啲唔知點噉啫。」我內心還在糾結著。
「點解之前無聽你講過游水啲嘢嘅，你有去泳會練游水㗎咩？」她帶點嘲弄的眼神，伸指篤著我的肥肚腩問。
「中學時有同學話可以游免費水，你知我怕熱啦，玩其他運動又笨手笨腳，噉暑假時咪跟佢去玩吓，就開始練水囉。」我抽出食指擳佢手心反擊，呢招在手牽手中擳手的招式，已經運用得頗為熟練了。
「嘻嘻，唔准擳我呀～睇你跳舞就知你笨手笨腳啦，你有去比賽㗎咩？」阿心笑著再問。
「有㗎，游學界啦，夏天每星期都去友校邀請賽呀，有時泳會又會叫你參加公開賽噉囉。但都係去到中四咋，會考嗰年開始，我媽禁止我參加比賽，所以就停咗喇。」我隨口答道。
「咦，噉你有無嚟過我哋中學嘅水運會呢？我記得好似有請其他學校喎。」她對比賽這個話題似乎特別有興趣。
我𢯎𢯎頭：「友校接力嗰幾年去過嘅，無一百都幾十間啦，我記得妳嗰間【瑪利亞紅花會】吖嘛，但我哋每次走堂去比賽，都係直接由學校去泳池㗎，所以嗰間友校係咩嘢名同邊區，基本上我哋係零印象嘅。」我說出真實的情況。
她的樣子有點失望：「噉你嗰啲獎牌有無我間學校呢？」
我好生奇怪，怎麼她今天這樣鍥而不捨的呢。「我啲友校獎牌隨便亂丟㗎咋，因為無乜價值嘅，嗰陣我哋接力隊4個成員都練水嘅，所以比起其他學校平均水平都高，贏啲友校獎牌都相當輕鬆，返屋企隨便放喺曲奇餅罐，都儲咗三個餅罐有多，我哋兩間中學都係同一個字頭嘅，都好大可能會去過，妳想知嘅，我返去搵吓囉。」兩間學校都是「耶字堆」，又同在九龍西，真係去過都唔出奇。