《我老婆唔係我女朋友》【那些年／學界比賽／真人】 第四章至六章: 【第四章】 出得嚟行 點都要還（２）
阿心給挑起好奇心，轉身來問：「坪洲蝶王？捉蝴蝶專家嚟㗎？」可能奇怪我們怎會認識到「蝶王」此等高人。
我回憶起阿扁條友的死樣和「柒」事，還未笑完。
Leon接口答阿心：「阿扁係我哋以前游水時啲街外朋友。哈，妳唔知咩，我哋以前玩水嘅。佢讀港島名校【事頭婆中學】，細個住喺坪洲，所以大家成日笑佢好似『小志強練猛虎射球』噉樣，喺個海度練水。噉佢主項游蝶式，咪亂吹叫佢『坪洲蝶王』囉，實在佢游水成績麻麻。佢真名又唔係叫阿扁喎，只是佢生得扁口扁臉，我哋幫佢改花名咋，條友脾氣好又隨和，後來吹多咗水就熟咗囉。」
適時我扮了那個扁口扁臉的鬼臉：「佢個樣真係噉㗎。」
阿心微微笑了笑，反問我：「佢話你…游水比賽？」她指指Leon，再指指我。
我怔了一下，想起以前初見她時，她的頭髮又黃又開叉，以為她也是練開水的（鬼知佢原來太麻甩，無心機保養頭髮，唉～邊有女仔噉樣㗎），就想跟她攀攀關係，所以才略略跟她提過，我都有玩游水之類的話題，只是後來見她無太大反應，就沒有再提了。
其實自從中學畢業後，幾乎已經無人知道我有過游水的歷史，除了面前條粉皮。
Leon又幫我搶答：「係呀，佢喺我哋嗰堆人裡面係比賽常客，乜嘢聯校、學界、分齡，區制水運會，都成日見佢有獎攞㗎。佢呀，以前個頭好似染金毛噉㗎。」無端端被翻出這些塵封了的歷史，又唔知佢想點。