我接通了來自陰間的電話: 第五十八節
只見嚴國旋神色凝重，不敢鬆懈，像隨時準備向鬼仔作出致命一撃。
他們在對峙著，大家也不敢移動分豪。
「嘻嘻！嘻嘻！」突然之間，鬼仔在笑著。
剛才嚴國旋的一擊難道不能對鬼仔起到警戒的作用嗎？可是看著鬼仔神色自若，我看剛才那一擊根本不能對它起到太大的作用。
「李志寶，頭先嘅一擊我只係出咗半成功力，你好快啲收手，如果唔係我就出十成功力將你打到魂飛魄散！」嚴國旋說著。
「嘻嘻，咁我哋十二點後見啦，我而家去搵細佬，嘻嘻！」鬼仔說著。
本應躲在一旁的李泳兒推開傻強的手並走到嚴國旋的旁邊說：「夠啦！李志寶，你哋乖啦!快啲收手！我唔要陳天佑死，我要佢長命百歲！你聽唔聽到呀！」
「你傻咗呀！做咩行出嚟呀！快啲返埋去啦！」在陣法中的我在大叫著。
「嘻嘻！你之前唔係咁同我講，你話佢死左你先會落嚟陪我，而且我唔鍾意細佬，我要媽媽只對我一個好，嘻嘻！」
「你想點呀？你唔好去搵天樂呀，我警告你！」我向著鬼仔怒吼著，天樂是我的兒子，我又怎可讓鬼仔害天樂？
只見鬼仔面色一沉，並化成一道白煙從大門離開，屋內的溫度亦突然之間變得溫和起來。
我們在房間裡害怕得不敢亂動。
鬼仔已經離開了嗎？可是我還是相安無事，它的這個舉動會是一個計謀去引我離開這個陣法嗎？
「咁而家即係點呀？旋哥做咩要俾佢走呀！？」坐在陣法中的我說。
「佢已經走咗喇，不過我諗佢今晚十二點之後會返番嚟！呢隻鬼仔唔簡單，我頭先已經打出五成功力，但係都只能夠俾個下馬威佢，如果佢過咗今晚十二點，我哋陽間嘅人係一定唔夠佢打架！」嚴國旋不停的在喘氣。
「但係點解頭先鬼仔見到李泳兒都唔殺佢？我見佢之前已經想殺天佑，佢如果真係想一家團聚，其實直接殺左李泳兒就得啦？」傻強說。
「李泳兒，你係咪用你嘅血去養鬼仔架？」嚴國旋說。
「係.....我係用血養佢，而且佢個名亦都係我幫佢改........」李泳兒說。
「難怪佢唔害你.....因為鬼仔係唔可以親手害死用血供養自己嘅人。」嚴國旋說。
「唔好講呢啲住，佢頭先講話唔鍾意天樂，佢會唔會去陰間搵天樂出嚟害佢架！？」我說。
「頭先聽佢咁講，真係有咁嘅機會！」嚴國旋不停的喘氣並走到旁邊的椅子坐著。
李泳兒見狀亦立刻走去拿了一杯水給嚴國旋，嚴國旋飲了水再休息一會之後，臉色已經好轉。
「咁點算呀！唔得，我一定要救天樂！旋哥，如果天樂嚮陰間俾佢殺咗，會唔會投唔到胎架！」我追問著。
「會，如果嚮陰間俾鬼仔殺多次，咁天樂就一定會魂飛魄散，而佢亦都會喺輪迴冊消失。」
「咁點算呀！我唔可以俾天樂有事，佢已經俾我害到唔能夠出生嚮呢個世界，我唔可以俾佢連輪迴投胎嘅機會都冇埋！旋哥！你一定有辦法，你幫幫我，就算我唔要條命都可以架！」我說。
嚴國旋望著我一臉認真的說：「方法唔係冇，不過呢個方法好危險，你哋如果真係想救天樂，就要有死嘅心理準備，仲有成唔成功都要睇你哋嘅做化。」
「冇問題，如果可以救到天樂，要我死我都冇問題。」
「天樂只係一個已經去世嘅鬼魂，你真係諗住救佢？」嚴國旋試圖勸服我。
「係！佢係人又好，鬼又好，我一定要保護佢，十年前我做錯事令到佢冇得出世，十年後我唔可以因為貪生怕死而令到佢連投胎嘅機會都冇！」我說。
「好！既然係咁，我會向你施一個禁術，我會將你做成一個假死嘅狀態，咁你就可以落去陰間裡面救天樂。」
「假死？即係點呀？」傻強不解地問。
「你哋都應該聽過三魂七魄呢樣嘢，三魂即係人魂，天魂，地魂，地代表地府，我會將你嘅地魂打落去地府，咁你就會好似一隻亡魂咁可以進入地府，而陽間嘅你就會保留住其他兩個魂唔會死住，直至到你另外一個魂都返嚟，咁你先至會醒。」嚴國旋說。
「去到陰間嘅話，我有機會打低鬼仔嗎？」
「當然冇機會啦，不過你記唔記得天樂因為記掛住你所以唔肯去投胎？你要做嘅好簡單，只要帶天樂去投胎，咁鬼仔就冇你辦法！」
「但係，旋哥你會一齊去嗎？」李泳兒說。
「我唔去得，因為呢個術係有時間限制，兩個小時內一定要搵到同救返天樂，而喺陽間嘅我，就會召喚返你嘅魂魄返嚟。」嚴國旋說。
「我明白喇！旋哥，事不宜遲，你即刻同我施法啦！」
「記住，如果喺陰間你俾鬼仔殺死嘅話，咁就玉皇大帝都冇辦法將你嘅魂魄送返上嚟，而你就會好似植物人咁冇晒知覺，你明唔明！」
「我明架喇！嚟啦！旋哥！」
「等等，我又要去！」李泳兒和傻強說。
「你哋又去？癡線架你哋，可能會死架！」我望著他們說。
「係我累到你咁，而且天樂都係我個仔，我又點可以唔去？」李泳兒說。
「咁難得可以地府一日遊，我又點能夠錯過呢？再講，我諗你冇我嚮你身邊，你一定會六神無主，所以我都要同埋你一齊落去！」傻強說。
我沒有回應他們的說話，只以一個簡單的擁抱作回應。
死都有人陪，我還有什麼好怕？