我接通了來自陰間的電話: 第五十一節

我，現在應該怎樣做？
 
「你而家打算點做呀？」傻強說。
 
「我，我真係唔知點算，個仔俾人困住咗，李泳兒又失咗蹤搵唔到佢，仲有我今晚十二點前要搵到養鬼仔嘅人，我一個人可以做到咩？」我說。
 
「你個仔被人困住咗？我唔係好明你嘅意思。」傻強說。
 
或許剛剛見面的時候，我只顧著向傻強質問養鬼仔的事，難怪他對於天樂的事一無所知，接著，我把傻強住院期間我所發生的經歷向傻強說了一次。
 




「咁好易解決啫，你而家去救天樂先，之後再搵嚴國旋幫手咪得囉！」傻強說。
 
「咪李泳兒呢？我唔駛理佢呀？」
 
「唔係唔駛理，而係你理唔到，佢有心避你你都冇辦法架啦，至少而家你可以做嘅只有救返天樂出嚟，係咪？其他嘢你搵嚴國旋問下佢意見咪得囉，而家我哋懷疑李泳兒養鬼仔，話唔定佢問吓師公就知道成件事係點，係咪？」
 
我望著傻強，不論從前到現在，傻強一直為我分憂，幫我解決問題，十年前他只是一時糊塗而做錯事，試問我又怎可能一直嬲著傻強？
 
「望住我做咩呀？你仲唔去救你個仔？冇時間架喇！」傻強推著我說。
 




「咁你.....點呀？」
 
「我？我而家幫你問下啲舊同學睇下有冇李泳兒嘅其他聯絡方法啦！一有消息，我就會打俾你架啦！」
 
「好，咁我而家就去救天樂先！咁李泳兒嗰邊就交俾你啦！」我抄下李泳兒的電話交給傻強。
 
之後，我便乘的士往嚴國旋的家駛去。
 
本來雷雨交加的天氣也開始放晴，這讓我的心情好了一點，而且接下來當我和嚴國旋去偷葫蘆的時候也方便一點。
 




的士很快便駛到嚴國旋的家，付了車資，我便飛快的走到嚴國旋的屋內。
 
「旋哥！你起咗身未呀，我而家嚟接你喇！」我推開了大門說。
 
只見嚴國旋梳了一個「賭神」的髮型，並在整理自己的背包。
 
「旋哥，做咩梳個咁有型嘅頭呀？」
 
「我同你講，一個人最緊要就係個前額，我將頭髮梳起係想加強返啲陽氣，你都將啲頭髮梳返起佢先！」嚴國旋向我遞了一支定型水，我也當然照辦。
 
「係呢，咁早嘅？我哋唔係約五點架咩？」嚴國旋問。
 
「本來係，不過而家成件事複雜左好多，我懷疑養鬼仔嘅係李泳兒呀！但係我而家又搵唔到佢，所以我諗住救咗天樂出嚟先再算，李泳兒嗰度我哋再慢慢想辦法啦！」
 
「李泳兒養鬼仔？冇可能！我嚮公園救被上身嘅佢嘅時候，都唔覺佢有接觸靈異之物喎，因為養鬼仔嘅人我哋學法之人一定睇得出，會唔會係你哋估錯呀？」




 
聽到嚴國旋這番說話之後，又讓我的思緒有點混亂。
 
嚴國旋說得對！如果李泳兒真的養鬼仔，學法之人又點會唔知？如果不是傻強，又不是李泳兒，那麼是誰會想養鬼仔害我呢？
 
說實話，對於不停的猜度，我也有點感到煩厭，既然如此就不要再想那麼多，先救出天樂再算，而且現在我能做的就只有這件事。
 
「旋哥，既然你咁講，我都已經唔知道邊個會養鬼仔害我啦，所以我決定救咗天樂先再算，之後嘅野再慢慢諗啦。」
 
「好，我冇所謂，最緊要係你自己有呢個決定。」
 
我們執拾好行裝之後，便關門出發。

由於嚴國旋與沈震龍的家距離不是太遠，所以我們選擇步行過去，順道在行過去的時間中，我們商討一下拯救天樂的對策。
 




「旋哥，我想問多次係咪攞返個葫蘆出嚟，我哋就可以救到天樂架啦！」我說。
 
「係，只要攞返出來，我再施法就可以放佢出嚟，不過你記住個葫蘆你唔好自己開個塞，唔係佢個魂魄合唔返埋，咁就真係魂飛魄散啦！」
 
「好，我明白架喇，陣間我哋睇情況，如果冇人我就直接入去偷返出嚟就得架啦！」
 
「偷？我唔係同你講咗我哋光明正大咁走過去同佢講攞返咪得嘅？你都仲係諗住偷？」
 
「如果佢哋唔肯俾返個葫蘆我咁點？到時打起上嚟咪仲麻煩？」
 
「我哋學法之人係唔可以偷嘢架......如果真係要偷，咁你自己偷，我唔會再幫你！」嚴國旋說。
 
聽到嚴國旋堅定的語氣，我也只好無奈接受，畢竟沒有嚴國旋的幫助，整個拯救計劃也不可能完成。
 
我們很快的便到達沈震龍屋外的位置，只聽見屋內傳來了李泳兒的聲音。