我接通了來自陰間的電話: 第四十九節

李泳兒，真的會是你嗎？你真的恨不得要養鬼仔來找我尋仇嗎？
 
「天佑，我諗你聽完我講，自己都會估到係邊個人想害你…..」傻強說。
 
「唔係，我估唔到，我唔知邊個想害我！」我還是不想承認，我一點也不想懷疑李泳兒，我們昨天還不是好好的嗎？為什麼她要害我？我又再一次逃避起來，每當遇到一些我不想去面對的困難的時候，我也和現在一樣，選擇逃避。
 
「你估唔到？你心裡面一定係估緊李泳兒，係咪！」傻強說。
 
知我者，捨傻強其誰？
 




即使昨晚我是如何有決心去保護天樂和李泳兒也好，可是在傻強面前，我的真面目也慢慢的浮現出來，或者過去我真的對傻強太依賴了，漸漸認為傻強可以幫我解決所有煩惱的事，想不到我還是這麼脆弱。
 
「冇可能係佢，我唔相信！我哋問米見返自己個仔嘅時候，李泳兒仲同個仔講係唔關我事，佢雖然之前係好憎我，但係知道咗係因為你離間我哋之後，佢已經原諒咗我啦！而且，佢要害我，都冇理由十年後先害我呀！我唔要佢嘅時候，佢已經可以害我啦！」我說。
 
只見傻強突然之間從褲袋拿出了手提電話，並不停的把玩著。
 
「喂！你做咩玩電話呀？你唔係同我研究緊邊個人想害我架咩？」我不解地說。
 
「你想知係咪李泳兒做呀嘛，而家上李泳兒嘅Facebook 睇下佢呢幾年嘅生活係點樣咪得囉，可能會睇到啲端倪呢！」
 




「吓？你有加佢做朋友咩？」
 
「冇呀，而家咪搵緊囉，佢有冇咩英文名呀？我打佢全名搵唔到佢！」傻強不停的嘗試尋找李泳兒的名字。
 
「佢十年前嘅英文名叫Crystal　呀，你試下打Crystal Lee 啦！」
 
「好，我試一試先！」傻強輸入了Crystal Lee 的名字後，頁面顯示了數十個人的名字。
 
「嘩，百九幾個Crystal Lee 咪有排搵？」我說。
 




「搵啲有共同朋友嘅咪得囉，我哋係同學嚟架！傻瓜！」
 
我內心不禁讚賞傻強的機智，可是傻強這句「傻瓜」的口頭禪現在向我說出，我還是感到渾身不自然。
 
「有喇！我搵到喇！」傻強說。
 
我們按入李泳兒的Facebook，看一看她所有的留言和相片，或許我還是找不到任何端倪，但總比我現在只是靠估好，我可不想冤枉一個剛饒恕了我的人。
 
我們按入相片的連結，其中有一個相簿叫做「All About You」的相簿較為吸引我的眼球，我們於是按入相簿查看一下。
 
相簿內顯示的是李泳兒與一個男人在台灣影的結婚照片。
 
她，已經結婚了嗎？這個男人是誰？為何李泳兒沒有在我面前提起這個男人？
 
我的心臟又來了一下下錐心的刺痛。




 
「佢結咗婚？」傻強說。
 
「我唔知，佢冇同我提起。」我感覺到自己的臉面如死灰。
 
傻強快速地觀看相片，看見她穿著婚紗的樣子，與那男人相擁時所展現的笑容，我才知道原來李泳兒沒有我的日子，生活也可以過得這麼好。
 
或許，在她的生命中，我只是她認識的其中一個人渣罷了。
 
傻強接著按去主畫面，感情狀況：與Albert Tse 已訂婚。
 
「傻強，睇下Albert Tse係邊個。」我說。
 
「吓？你真係睇？」





「係呀，我想睇下邊個咁好彩可以娶到李泳兒，唔係，我想知娶李泳兒嘅人會唔會好似我咁一事無成，咁無學識，佢應該配上一個有學識有錢可以照顧佢嘅人.....」
 
傻強嘆了一口氣說：「如果你哋兩個唔係分咗手，仲喺埋一齊，我都唔知你會變成點，估唔到你到咗今日嚮李泳兒嘅面前仲係咁自卑。」
 
或許，傻強十年前離間我和李泳兒的做法可能沒有錯，因為十年前後我還是對自己一樣沒有信心，在李泳兒的競爭者面前我還是一樣的自卑。
 
傻強按下了Albert Tse 的連結。