因為前世一個承諾，令我今世三十歲都仲係青頭仔: （28）
「咕姑固~~~」
天啱啱光，煩人嘅雀仔喺度嘈生曬。
太陽從海平線升起，溫暖嘅陽光照射過嚟，而我卻只感受到一股寒意。
一股令人心寒嘅敵意。
欣欣殺到嚟！
Samuel同Lily都俾呢股突如其來嘅殺氣嚇到扎醒。
晃眼間，遠處嘅沙灘出現一個熟悉嘅人影，正一步一步行緊過嚟。
「快啲走！條八婆殺到埋身！」
我帶頭衝出房門，直奔出旅館，另外二人則跟隨身後。
然而，正所謂「是福不是禍，是禍躲不過」，走到嚟長洲大街，遇正欣欣攔喺前面。
「哈哈！我地又見面啦！唔怕依家就話你知，長洲呢度就係你嘅葬身之地！哈哈哈！」欣欣肆意大笑。
長洲四面環海，就算再走都走唔到去邊。既然如此，倒不如放手一搏。
反正繼續匿埋都無意思，匿得一時匿唔到一世，乾脆就堂堂正正嚟個了斷。
欣欣率先發難，先捲起一陣烈風，吹起街邊嘅雜物襲擊我地，跟手再狂啪手指，係咁射出致命嘅黑色激光。
喺猛烈嘅攻勢下，我地只能左閃右避。
「哈哈！感受到命運嘅可怕未？」
欣欣射出嘅黑色激光，猶如AK47般密集開火，大街上嘅鋪頭門口、招牌以及路邊大樹，都一一被摧毀。
好在家下天蒙光，條街無人，否則肯定傷亡慘重。
喺我嘅掩護之下，Lily卒之召喚出真氣。
經過大師提點，今次佢學精左，直接用手射出炎殺黑龍波。
可惜效果都係一樣，對欣欣幾乎零傷害。
至於無任何真氣嘅Samuel，就擸起路邊一舊大石飛埋去攻擊。
結果舊石都未埋到身，欣欣就一掌將大石，反彈撼落Samuel額頭度。
Samuel堂當訓低左，前額爆曬缸。
「哼！不自量力！」欣欣語氣極度不屑。
「喂！晨早流流咪嘈住曬啦！」「咪就係！靜啲啦…」打鬥所發出嘅聲響，令樓上嘅街坊相當不滿。
不過欣欣點會理咁多，佢向住暈低嘅Samuel，作勢想射出激光。
呢個時候，我將真氣傳到雙腳上，激發最快嘅速度，衝埋去抱走Samuel。
「嘩！傑傑你好型…」懷內迷迷糊糊嘅Samuel講完呢句，就徹底昏迷過去。
好彩佢只係受左皮外傷，應該無乜大礙。
另一邊廂，Lily將真氣貫通全身，再配合想象力，令到自己化身一部比例1:1嘅初號機。
「乜玩到咁大？不過你唔係以為，咁樣就對付到我下話？哈哈哈哈！」欣欣望住眼前巨大嘅初號機，放聲大笑。
就趁條八婆嘅注意力去曬Lily身上，我嚟一招埋身突擊，將體內僅餘少量真氣，聚積喺拳頭之上。
隨即我意想出星鬥士星矢嘅絕招「天馬流星拳」，以超越音速嘅速度，一秒擊出幾十拳。
殊不知欣欣眼尾都唔洗睄，一手就捉實我嘅拳頭：「搲痕都嫌細力啦！」
「啪啦！」
對方揸住我拳頭，出盡力捏爆我啲手指骨。
好在呢個時刻，變成初號機嘅Lily出手攻擊，條八婆為左閃避先肯放開手。
巨型嘅初號機拎住高振動粒子刀，向住欣欣不停揮斬。
但係欣欣閃避速度極快，輕而易舉就避開曬每一下嘅斬擊。
跟住條八婆縱身一躍，跳得半空幾乎九樓咁高：「就等我俾你地見識下我嘅真功夫！」
欣欣伸出右手食指，有深灰色嘅光慢慢積聚喺手指前。
佢指向初號機個頭，一邊出招一邊大嗌：「厄命絕運衝擊波！」
深灰色嘅光束以肉眼睇唔到嘅速度，一擊命中初號機個頭。
「砰！！！」
一下劇烈嘅爆炸，令Lily被逼解除意形化。
Lily全身傷痕累累，趴喺地下，失去戰鬥能力。
「依家就得返你一個啦，林嘉傑！」居高臨下嘅欣欣啪一下手指，射出激光。
處於下風嘅我，無法還擊，唯有到處閃避。
目前就得返我一個，勢孤力弱之下，若果要絕處逢生，或者就只有嗰一個辦法。
「你依家後悔未呀？本來乖乖地接受命運嘅安排，同我一齊咪好好地囉！點係都要咁犯賤，破壞上一世嘅誓約？」欣欣不停射出黑色激光。
我一邊閃避一邊回答：「我再講一次，無論上一世嘅我講過啲咩，都與今世嘅我無關！同埋命運嘅安排唔係大曬，唔通命運註定我要食屎，咁我都要照食呀？」
「咩話？咁你即係話我係屎啫！」
「我無咁講呀，係你自認喳！」
「可惡！死到臨頭仲咁串嘴！」
震怒嘅欣欣伸出食指，作勢要使出剛才嗰招衝擊波：「我要你死無全屍！！！」
旦夕之間，我再次運氣，將真氣谷到去雙腳下，然後極速逃跑。
「砰！！！」強勁嘅衝擊波射到碼頭岸邊，激起幾層高水花。
「死八婆！有本事就嚟殺我啦！」我一邊走佬，一邊出言挑釁對方。
欣欣怒髮衝冠，嬲到個樣揦埋一舊，極度兇狠猙獰。
我一路逃走，對方就一路從後緊貼追趕。
直至跑到去張保仔洞口，前路被幾塊巨型大岩石包圍住，再無路可走。
「哎喲！無埞走啦？橫掂都死路一條，不如直接跳海啦！哈哈哈！」欣欣逼到埋身。
「呵！你以為我唔敢呀！」我動身想衝去跳海。
下一個瞬間，欣欣閃現眼前，單手叉住我條頸，將我成個人壓喺大岩石上：「講下笑渣，我點會俾你跳海死，咁豈不是益左你？你係死都係要死喺我手上！」
佢隻手緊緊咁捏住我條頸，令我幾乎抖唔到氣：「要殺就好快啲郁手，否則俾我走得甩，我一定會嚟反咬你一啖！」
「哈哈哈哈！反咬我一啖？乜你呢隻喪家之犬，仲有能力反擊咩？」欣欣啲指甲插入我啲肉度，搞到我條頸流血。
我呢刻保持冷靜，不懂聲色咁運氣。
「好啦！廢話就唔多講，係時候送你上西天！」
對方一隻手捏住我條頸，另一隻手就用嚟出招。
深灰色嘅光團積聚喺佢手指頭上。
剛才一擊就射爆初號機，威力絕對係非比尋常。
呢一刻嘅我全身動彈不得，睇嚟想避都無得避。
而我亦都無諗住閃避。
一秒之後，欣欣對住我嘅心臟，使出呢一招厄命絕運衝擊波：「接受命運嘅衝擊，受死啦你！」
啱先我傳送真氣去到左胸口，亦即係心臟位置，當迅猛嘅光束射出，剎那之間，我利用氣形合意功，將心臟位置幻化成一樣嘢。
一樣雖然我從未見佢個樣，但卻對佢了如指掌嘅東西。
我對佢嘅熟悉程度，係不費吹灰之力，就可以輕易幻想到出嚟。
呢樣嘢有強大嘅斥力以及反彈力。
佢就係「貞操力場」。
不過我呢道力場唔係反彈賓周，而係反彈欣欣發出嘅致命衝擊波。
深灰色嘅光束準確無誤咁，命中我心口幻化出嚟嘅無形力場，隨即以接近肉眼睇唔到嘅速度，反彈射去欣欣額頭。
由於我地雙方距離太近，加上反彈速度極快，所以欣欣根本反應唔切，就連我都睇唔清。
「砰！！！」
一瞬間，欣欣個頭好似扑西瓜咁成個爆裂開，即場身亡。
居然咁都俾我反殺到，仲要依靠自己以前最憎嘅貞操力場。
呢啲可能就叫做「以其人之道還治其人之身」。
幾經波折終於再一次戰勝命運，我攤坐喺地下，鬆一口氣。
「恭喜你！」
大師失驚無神千里傳音，我俾佢嚇左一跳：「想嚇死人咩大師！」
「對不起，因為我感應到你打敗了你的前世情人，所以心情太激動，沒來得及打聲招呼，就千里傳音給你、」
「大師，學你話齋，今次我靠意想不到嘅招數打敗左欣欣。」
「你做得很好，儘管命運可以局限一個人的處境，但卻無法局限人的想象力和想法。」
「咁命運以後會唔會再嚟搞我？」
「當然會，這世界上哪一個人不是被命運作弄？不過無論它再設置多少難關，我相信你一定嫩能夠再次戰勝它。」
「哈！我都係咁話！」
抹走身上嘅血，處理好欣欣條屍之後，我就返轉頭揾返Samuel同Lily。
Samuel已經醒返，至於Lily雖然傷痕累累，但都仲行得走得。
我慢慢扶Samuel起身，對方問我：「傑傑，你係咪打敗左欣欣？」
我點點頭：「係呀，我已經打敗左佢。」
「哈哈！咁就好啦！以後都唔會有人再阻止到我同你一齊啦！」Samuel哈哈大笑。
「發夢啦你，有無人阻止都好，我都唔會同你一齊架！」
「船嚟啦，我地入閘啦。」Lily帶頭慢慢行入閘口，「係啦，話時話，頭先我變成初號機嗰陣喺度諗，只要有氣形合意功，咁以後玩cosplay咪唔洗化妝換衫。」
「乜你有玩cosplay架咩？」Samuel問。
「有呀！同埋呢，假如我變成你個傑傑咁嘅樣，咁你會唔會同我搞嘢？家下我爭你一個未上到床渣！」Lily問返Samuel。
「妖！你咪咁癡線啦！」
「乜你仲諗住集郵？」我問Lily。
「梗係啦，話曬都係我嘅心願…」
我地有傾有講，一齊搭船離開長洲。
「你地快啲睇下！」Samuel突然show部電話出嚟。
佢打開youtube，我地啱先同欣欣喺長洲大街打鬥嘅情景，原來俾人影低左，仲拍埋片放上網。
段片影到Lily射出炎殺黑龍波同Samuel飛石仔對付欣欣，而關於我嗰段就只係影到我走佬。
嗰啲留言個個讚Lily同Samuel好型、好英勇，反過嚟就屌鳩我做逃兵著草。
仆佢個街，段片都無影到我反殺欣欣，淨係影到我點逃走，搞到啲人個個以為我係懦夫。
我頂！咁樣俾人點左相，咁我以後仲出嚟溝女呀？Shit！
（全文完）