因為前世一個承諾，令我今世三十歲都仲係青頭仔: （14）

欣欣坐喺客廳，敷住面膜，睇緊無聊嘅大陸綜藝劇。

「捨得返嚟啦咩，嗰張紙你諗住幾時簽呀？」佢問。

「我要考慮多兩日先。」

「慌死你真係肯成世唔扑嘢咩？到最後咪又係會簽，咁不如早啲簽左佢，咁咪你好我好大家好囉！」

條友大安旨意，睇死我一定會簽咁。





我費事睬佢，直行直過，行入浴室沖涼。

沖到半路，突然聞到一大陣𤓓味，仲有啲好臭嘅煙攻入嚟。

我拿拿臨著返衫，出去睇下咩事。

仆街！原來係廚房煲燶嘢，爐頭起火。

「搞乜嘢呀你？整咩搞到廚房火燭？」





「咪頭先煲燕窩唔記得睇火。」

跟住欣欣以命令嘅口吻同我講：「你唔好講咁多，快快脆救火啦！」

啲火燒到含含聲，成個廚房都係濃煙，屋企無滅火筒，我唯有入廁所，灌桶水出嚟撲火。

但係，啲火越燒越旺，濃煙更加攻到個鼻，抖唔到氣咁滯。

見情況唔對路，我當機立斷，拎齊銀包、鎖匙走人，





至於欣欣早就唔聲唔聲，揼低我衝落樓。

呢條八婆真係無好帶挈，累到我俾追數佬斬不得止，家下仲搞到我屋企火燭。

好在消防員好快就趕到，花左大半個鐘就將火救熄。

之後救護車就將我同欣欣送去醫院，檢查下有無咩大礙。

Samuel從新聞中得知我間屋火燭，第一時間趕嚟睇下我有無事。

「傑傑！你無事呀嘛？有無燒傷邊度？嚴唔嚴重？」Samuel一見到我，就好肉緊咁捉住我隻手。

「你唔好緊張，我無事。」

「真係擔心死我啦！頭先睇電視見到你屋企火燭，幾驚你有咩三長兩短！」Samuel仍然捉住我隻手唔放。





欣欣經過見到，出聲串鳩我：「咦？乜你諗住轉gay俾人玩菊花咩？」

「下？佢講真架？傑傑你終於諗通左啦！」Samuel笑曬口咁款。

「頂，你咪聽佢亂講啦。」

我講完呢句，Samuel下一秒就變臉，即刻扁嘴。
 
「我諗嗰張紙應該燒左架啦，不過遲啲我會揾專人，重新修訂過一份俾你簽。」欣欣對我講。

「傑傑，你地講緊要簽啲咩呀？」Samuel問。

「無，無嘢。」





過左一陣，差佬過嚟幫我同欣欣錄份口供，了解一下起火原因，然後就放我地走。

由於現場仲未解封，所以我返唔到屋企。

我要去Samuel屋企借宿一宵，而欣欣就返自己屋企。

「傑傑，啱先嗰個欣欣話你同簽嘢？係簽啲乜嘢？同埋佢真係你嗰個宿世情人？」Samuel一輪嘴不停追問。

為左自己耳仔著想，我一口氣答曬佢全部問題，將最近發生嘅事講俾佢聽。

「果然不出我所料！我第一眼見到嗰個欣欣，就估到佢一定唔係好人！俗語講得好，『好聽就女人，唔好聽就累人』，講到尾始終都係男人好，傑傑你話係咪呀？」

「……」我都唔知點答佢好。

「我睇你以後都係唔好再見佢啦，呢啲女人要唔過。」





「你講嘅都同我諗嘅差唔多。話時話，你之前咪帶過我去見嗰個慧真大師嘅？」

「係呀，做咩呀？」

「你可唔可再帶我去見佢一次？」

「我諗嗰個大師，應該返左台灣啦喎。」Samue回l答。

「咁你知唔知佢住喺台灣邊一度？我想去揾佢！」

「你要揾佢？」

「係！我想佢教我點樣先可以打破宿命，我唔想再俾呢段所謂嘅『宿世姻緣』綁架！」





「好呀！我支持你！我聽日就幫你查下。」

「仲等聽日？依家即刻幫手揾啦，你上網揾又好，打電話問人又好，總之越快揾到越好！」

「但係家陣都好夜，成十二點幾啦喎。」

「你訓啦咩？」

「未。」Samuel搖搖頭。

「咪係囉，咁仲等咩呀？」

Samuel「哦」一聲，然後行去熄燈。

「你做咩熄燈？」我問。

「訓教囉，又係你話唔好等嘅。」

「頂你，我叫你唔好等，意思係要你立即查下慧真大師喺邊。」

「哦~原來係咁~」

「仲『哦』乜鬼嘢，快啲開返燈，同埋縮開你隻手，咪趁黑媽媽，就借啲意抽水摸我屎忽！」