若你信了我的大話 我就能聽見你的真話: 38. 上天的安排(中)
自此，Jonathan每天都會關心Mabel，給她不同的信心和支持。首先，她鼓勵她離開丈夫，搬回娘家。然後又帶她改變造型和參加一些健身班，再報讀了一些基本實用的培訓課程，希望她能接觸回出面的世界同時認識到更多的朋友，擴闊她的世界觀。
改變總是不容易，但只要你能堅持下去，努力習慣它克服它，總會有成功的一天。慢慢地Mabel從和老公離婚的負面情緒走回出來，人亦漸漸變得有回自信。而正如Jonathan所說，當你有自信，對生活有回熱誠，自身的魅力自然亦會增加。大半年後，Mabel身邊開始陸續出現一些追求者，不過她卻並沒有急於選擇。
而二人現在的關係，基本上Mabel發生了甚麼事都會和Jonathan說。
「事實証明我無錯啦，你睇你仲幾有market~」知道Mabel又有新的追求者，Jonathan取笑她道。
「係喇係喇，多謝你啦~」Mabel甜甜地笑著回應。
「咁又唔駛客氣，都要你自己努力先得嘅~ 你睇下衣家嘅你同以前嘅你係短短半年間有左幾大嘅變化?」看見現在判若兩人，容光煥發的Mabel，Jonathan由衷為她感到高興和驕傲。
「唔係你我又邊有可能起返身然後變成今日咁呀~ 我自己都唔敢想像原來我真係仲可以改變…」回想起大半年前的自己，Mabel亦有點恍如隔世的感覺，覺得難以置信。
「Never say never~好多時其實限制我地嘅都係我地自己本身! 咁點呀，衣家咁多追求者，有無邊個岩呀?」 Jonathan把話題帶回正軌。
「慢慢黎啦，你話架嘛，越易得到就越唔會珍惜，咁咪慢慢觀察下，順便睇下邊個對我真心又有耐性先囉~」Mabel並不心急。
「講係咁講，但有時熱情冷卻左就會無左架喇…」但Jonathan卻替Mabel心急。
「咁咪無囉，証明我地無緣份啫，而且以衣家嘅我，好快又會有新嘅追求者啦~」Mabel自信地說道。
「哈哈，見你咁有自信，都唔知應該替你開心定唔開心好…」Jonathan半苦笑著說。
「咁你又點呀? 咁耐都仲未搵到過岩呀?」到Mabel問回Jonathan。
「um… 雖然同好多人出過去，不過我總係會擔心唔適合然後重蹈覆轍…」
這大半年Jonathan除了幫Mabel外，閒時亦有繼續認識其他女性朋友，只是都沒有甚麼結果。
「睇黎你都仲未係前妻嘅陰影走返出黎喎…」輪到Mabel擔心道。
「我唔想再傷害人同傷害自己嘛…」Jonathan沒有否認。
「其實你有無諗過… 搵過同你有過類似經歷嘅人會更適合?」Mabel想了想後又問。
「哈哈，邊有咁易搵呀… 一係…搵你囉~」Jonathan說笑道。
Mabel靜靜地望著Jonathan，然後在隔了一會後她彷彿下定了決心問道:
「你知唔知點解我對其他所有男仔都不為所動?」
「你岩岩咪講左，想放長線吊大魚嘛~」Jonathan笑著回答。
「係因為佢地所有人都比唔上你…」Mabel望向了旁邊緩緩說道。
「比唔上我? 我有咩好? 又失婚又唔善解人意…」這時輪到Jonathan在自嘲自憐。
「做咩到你無自信呀? 唔係你教我做人要有自信先有人愛架咩? 我唔知其他人點諗，我淨係知道係你教識我做人要愛自己，兩個人一齊其中一個人唔應該咁卑微。係你將我從深淵救返我出黎，教我點獨立生活，然後變成一個有返自我吸引力嘅女仔…
你對我嘅關心同鼓勵係無一個其他嘅男人比得上… 就算佢地點努力追我點對我都好，只要我一將佢地同你比，佢地都會突然變得黯然失色… 而且你對我嘅了解亦係佢地無一個比得上，因為你見過我最黑暗最脆弱嘅一面，正如我對你嘅了解一樣… 係你先知最真實嘅我係點。 對住你我唔需要扮，唔需要收收埋埋，因為我無野係你唔知架…」Mabel一口氣把自己所有心中所想全說了出來。
「Mabel 我…」
不等Jonathan再說話，Mabel已經直接吻了上去。
其實一直無怨無悔地幫助另一個人重新振作，中間怎可能沒有其他感覺?只是Jonathan之前一心幫助Mabel沒有多想罷了。直至聽到Mabel說有追求者出現，他一方面替對方高興，一方面又有點酸溜溜的感覺，只是過往的經歷讓他一直逃避。
但現在所有這些負面的感覺隨著這一吻都煙消雲散了。
二人之後開始穩定交往，雖然間中都有少吵鬧，但大家的經歷都讓二人更珍惜對方。由於二人都很想生小朋友，所以拍拖兩年後，雙方都有想再婚的念頭。
不過Jonathan沒有想過這竟然會遇到意想不到的阻力。
「Mabel阿媽極力反對?」聽完Jonathan解釋後我不禁問道。
「係呀… 初初驚佢介意所以Mabel一直無同佢講我離過婚。直至決定結婚後我地諗住結左婚就係一家人唔應該有隱瞞，所以就主動坦白左。點知佢聽到後就好嬲，仲即刻趕左我走… 衣家我地都好頭痛，早知當日就唔坦白啦…」Jonathan懊悔地說道。
「但Mabel都離過婚，照計無理由咁大力反對架… 咁Mabel阿爸呢?」對此我亦有點想不通背後原因。
「佢阿爸都反對，不過就無佢媽咪咁強烈。其實我地都好唔明白，所以先諗住搵你幫手睇下背後會唔會有D咩我地唔知嘅原因… 不過我知Mabel媽咪好錫佢，其實果陣Mabel同前夫關係唔好，佢前夫又乜都要AA制，Mabel媽咪都靜靜雞塞過唔少錢比Mabel…」
「咁奇怪? 嗯… 咁我都可以當係幫Mabel而唔係幫你咁接受衣個委託嘅…」
一來我自己亦好奇，二來我又覺得既然Jonathan和Mabel兩個失婚人仕因緣份而走到這步找到幸福，我沒理由不幫他們一把送他們去到最後的一步。
「多謝你呀! 我轉頭send佢嘅相片同一D資料比你呀。」因已幫過他一次，Jonathan自然熟悉我的要求和流程。
因較年輕便生下了Mabel，Mabel母親的年紀並不算太大，約五十多歲，在Mabel畢業出身後已經沒有工作。據Jonathan所講，Mabel母親現在有個習慣，就是每朝早都會到公園和一大班公公婆婆一起耍太極，所以要找到她除了要早點起身外亦不算太困難。很快我便攝入了一個接近她的位置，裝模作樣跟著她們耍起太極來。
「婆婆你耍得好好喎，玩左好耐喇?」出了一大身汗，我找了個機會問Mabel媽媽。
「都兩三年喇，過得去啦~反而後生仔你好生面口喎，晨早肯起身黎同我地班老野耍太極? 好難得喎~」Mabel媽媽笑著說道。
「係呀，今日唔知做乜晨早醒左訓唔返，近排又見個人好似無乜精神咁，咪諗住落黎公園遊蕩下囉… 之後見到你地成班公公婆婆耍太極好似好精神咁咪又諗住試下跟你地耍下睇下個人會唔會都可以好似你地咁精神D囉~」我胡亂說了個原因。
「後生仔，好好保重身體，少D煙酒同捱夜啦，唔係老左你就知死喇… 耍太極要日日耍先有用架，你就咁黎一日唔會見到有咩效用，真係有心以後日日落黎啦，最多阿婆教你喇~」Mabel媽媽苦口婆心地說。
「好呀，我盡量~」
之後我當然沒有再出現過，不過至少我覺得Mabel母親並不算是難以相處的人。也許大部份的老人家，其實都渴望有年輕一輩願意和自己多說說話吧。
之後一天Mabel約了她父母飲茶，而我則又偷偷躲藏在一旁伺機行動。
「阿媽，其實點解你咁反對我同已婚嘅人一齊?」吃了兩籠點心，Mabel終於問出正題。不過當她一問，伯母立即面有難色然後瘋狂咳嗽，差一點便嗆到。
「衰女!你仲提係咪想激死你阿媽呀!」Mabel掃著母親背部幫助她呼吸時她母親責罵道。
「咁我真係想知嘛… 我真係好鍾意Jonathan好想同佢一齊，而且我亦信佢會比到幸福我… 點解你突然咁唔講道理呀?」Mabel忍不住反駁道。
「啊女呀，成個世界咁多男人點解你偏偏要揀個結過婚架? 你知唔知佢分分鐘會害你一世架! 聽阿媽講忘記佢搵過個啦!」Mabel媽媽語重心腸地說。
「你個女我都離過婚架，邊有資格嫌人結過婚? 定你想我衣世都孤獨終老呀?」見母親不講道理，Mabel開始發晦氣。
「你….! 總知我就唔比啦，唔係你就唔好再認我衣個阿媽!」因激動母親又再咳嗽起來。而父親看見這情況亦終於忍不住示意Mabel不要再說下去。
那邊戰爭終於消停，而在不遠處的我卻突然有種疲累感，不得不慨嘆這個世界上其實到底有多少秘密是我們不知道的。可不可以不要每一次都把我陷入兩難的境地? 經過大大少少這類型的case，我開始生出了金盤洗手的念頭。
有時也許真的是甚麼也不知道的人生會過得比較幸福和輕鬆…