若你信了我的大話 我就能聽見你的真話: 10. 兄弟情(上)
一世人流流長，總會認識到很多朋友。有些可能曾經親如兄弟最後卻漸漸失聯，有些卻又幸運地可以是由你小時候到到死亡那一刻都仍然存在於你的生活圈子裏。
友情可以面臨很多考驗，而其中一個常見的挑戰者就是愛情。到底友情和愛情，有沒有它應有的先後次序? 而當兩者發生衝突時又能否可以同時並存?
「你好，請問你係咪可以幫人調查真相?」
「係呀，有咩幫到你?」
「其實係咁，我想你幫我查下我個老死係咪鍾意左我女朋友…」
「可唔可以具體D講下件事係點?」
「我叫阿勇，有一個由細玩到大嘅老死叫阿武，我地細細個已經係屋邨鄰居，加上小學開始都係同一間學校返學，所以一直都好friend。可能因為我地兩個都係獨生仔啦，基本上我地都當大家係真嘅兄弟咁，一無野做大家都會搵大家玩，一齊蒲下機鋪同波地。
而且我地唔係只係普通一齊玩樂嘅朋友咁簡單，而係真係一齊共過唔少患難嘅兄弟。我記得中學果陣有次我見佢突然口腫面腫，一問之下發現原來佢岩岩比個黑社會同班同學恰，放學拉左佢入後巷問佢拎錢，佢唔比就打左佢一鑊。我知道後好嬲，之後日日專登同佢一齊放學，初時D黑社會見到佢身邊多左個人都收斂左唔敢再攪佢，不過過左排佢地就班左馬想連我都打埋。
好彩我細過曾經跟個高手學過兩年功夫，最後犧牲左隻手嘅情況下都成功打走左佢地，不過隻手就打左成個月石膏。果陣阿武同我講，以後佢隻左手就係我隻左手，仲話就算要幫我打飛機佢都義不容辭~」想起當時的情況，阿勇說到這裏亦不自覺笑了幾聲。而那笑聲的溫度足以讓獨生的我都能夠感受到”兄弟情”這三個字。
「之後有年我老豆比人炒左，屋企財政狀況好差，屋企基本上都無乜錢比我，我只可以餐餐麵包，阿武知道後就成日搵我食飯然後叫個餐兩份食，零用錢有淨又會比我，果時大家真係爭在未到一條底褲兩份著架咋… 好彩三個月後我老豆搵到野做後情況先好返D。
到到年幾前有次發夢，我失手比隻…”野”捉住左，阿武見到後亳不猶豫回身一野踢開左佢，然後立即扶起我一齊走，好彩最後我地都走得甩，唔係佢我衣家可能已經係入面”mou”緊… 所以基本上除左父母，佢就係我最親嘅人…」想到之後幾段往事，阿勇的笑聲又漸漸感動到變成沙啞聲。
「其實我覺得一世人可以有個由細就咁要好嘅兄弟，真係一件好幸福嘅事，你地仲要無血緣關係都咁好就更加難得…」這時我突然想起了一個大學時認識的室友，不知他現在過得怎樣呢? 我們好像也有十年以上沒見面了吧…
「係… 我都一直咁認為，而且覺得我地真係可以一世都繼續咁friend落去。但近排開始一切都有左轉變…」他靜了一會後冷靜下來說。
「DSE後，我僥倖入到大學，而阿武就唔好彩失手入唔到，屋企又無錢比佢讀副學士，佢只好逼住出黎做野。自此，我地嘅生活模式同價值觀開始唔同，衣次應該係我地認識以黎第一次大家走向唔同嘅生活圈子。而係大半年前當我係大學識到我衣家個女朋友後，情況就好似開始變差…
點解我會懷疑佢鍾意左我女朋友，係因為自從試過兩三次三個一齊出去食飯後，我發覺佢開始避開我女朋友，有我女朋友出現佢就唔會出現，但我女朋友對佢無惡意，份人又nice，無理由會令阿武討厭佢，所以我懷疑佢因為鍾意左我女朋友唔知點面對佢然後就避開佢，甚至近排我覺得佢都開始有D想避開埋我添…
我知我咁諗好似有D武斷，又或者因為電視劇真係好多衣D情節所以影響左我… 但我真係接受唔到無左阿武衣個兄弟，所以先咁唐突搵你幫手希望盡快知道真相然後解決個問題…」
「單憑咁就懷疑佢鍾意左你女朋友又好似真係有D武斷… 不過我想問如果佢真係鍾意左你女朋友，你諗住點?」我好奇一問。
始終有時你必須要預備好認對方案才可以把真相揭破，不然事情很可能只會變得更糟。
「咁我會即刻分手。雖然我知唔係我分手就代表佢地可以一齊，但阿武對我真係好重要，我寧願放棄女朋友都唔想我地嘅友誼受到任何損害。如果有日佢地真係可以一齊，我都會祝福佢地，繼續同佢地做好朋友…」不過阿勇並沒有半分猶豫立即答道。
「睇得出你真係好重視衣個朋友，不過到時件事如果真係你咁諗我相信唔會係咁簡單就完到… 點都好，麻煩你比一比阿武嘅背境同相片我先，我ready後會再搵你約時間。」他們的兄弟情讓我有點感動，所以我決定伸出援手。
「我都知真係嘅唔會咁簡單解決到，所以我一定要搵出真實原因先可以再諗點解決… d資料我轉頭send比你呀唔該。」阿勇應該亦有認真想過這問題。
「好，酬勞500，同埋要update我事情之後嘅發展，ok?」
「無問題。」阿勇爽快地答應。
阿武現在是在一間便利店工作。收到阿勇給我的資料後不久，我便出發開始預備我的前期工作。
我到達的時候人流並不多，阿武正在收銀處幫一個女顧客收銀。不過當我胡亂閒逛了一圈後，卻發現那女顧客還在那處，原來二人一直在聊天，只是阿武的感覺看來並不自在。
「你走先啦，有人等緊比錢呀。」阿武看見我後便對那女顧客說。
「我唔會就咁放棄架…」說完那女顧客便離開了。
(阿武有女仔追? 但睇佢個樣似乎對個女仔唔多有興趣喎… 個女仔個樣都幾好呀，唔通佢真係已經心有所屬鍾意左阿勇女朋友?)看見這情境我不其然無聊在想。
「先生，多謝你12.8呀。」不過阿武嘟完我拿的飲品後很快便打破了我的思緒。
「八達通呀唔該。同埋唔好意思呀，我想問你衣度有無位可以比電話叉電? 我部電話無晒電自己熄埋添喇…」我從褲袋拿出了我的八達通說。
「Sorry呀，公司規矩唔可以比客人係度叉電…」阿武抱歉說道。
「咁呀…咁由佢啦唔該晒…」我露出一個失望和不知所措的表情。
「如果你真係好急要叉，我借我個私人尿袋比你叉一陣啦…」不過給完我收據後阿武竟又主動給了我一個尿袋。
「好呀，唔該晒你!」
這當然是一個大話，我的電話實質上還有80%電，不過這讓我明白至少阿武是一個心地不錯的青年。等待途中，我有想過試探性問一問剛剛那女仔的事，不過為了避免太odd，最後還是放棄了。裝模作樣了十多分鐘後，我便把尿袋還給阿武然後離開了便利店，並打給阿勇告訴他一切已準備就緒。
兩天後的一晚，阿勇約了阿武到官塘海濱長廊那邊飲酒吹水，而我則化身成為路人甲坐在他們後面不遠處的一張椅子上。酒過數巡，阿勇見氣氛已經差不多便直接入了主題。
「阿武，你老實話我聽，你其實係咪鍾意左Cherry?」
「痴線，點會呀?」阿武有點驚訝呆了一呆後答道。
「唔係嘅話，點解你成日好似專登避開佢咁?」
「邊有呀，費事做你地電燈膽咋嘛!」
「就算係都唔會次次拒絕呀? 阿武，我想話比你知，除左父母，你就係我最親最重要嘅人，你嘅感受對我好重要… 只要你開心，我可以放棄任何嘅野，包括Cherry， 所以係真嘅你唔怕同我講…」阿勇激動地捉著阿武兩邊膊頭說道。
「阿勇，你對我何嘗唔係一樣咁重要? 你可以搵到鍾意嘅女朋友，我只會替你開心，點會想破壞你幸福? 放心啦，我真係無野呀… 黎緊你再約我實出黎，到時你唔好嫌我電燈膽阻住你地就得~」阿武拍了阿勇一下心口說道。
「你話架!」聽到阿武的回答，阿勇像放下心頭大石，也回敬地拍了阿武的心口一下說道。
之後二人又像沒事一樣繼續吹水，反而是我有點愁眉心鎖，再坐了一會後便默默地離開了。
(或者阿勇同阿武友誼之間的真正考驗，其實都仲沒正式開始…)
而我知道這考驗卻會在我告訢阿勇真相後正式展開。到底我是不是真的應該把真相告訴阿勇?
我收到阿勇電話已經是第二天的中午時份。
「唔好意思，琴晚飲得太醉返到屋企就斷左片…」聽得出阿勇還是有點宿醉的狀態。
「唔緊要。」
「咁阿武係咪真係鍾意左Cherry?」但他還是立刻問出了重點。
「唔係。」我簡單答道。
「咁點解佢要避開Cherry?」阿勇追問。
「你會唔會知道唔係就已經足夠?」想了一想後我反問道。
「你咁講即係佢真係有其他原因咁做啦? 只要關阿武事嘅我都會想知道…」
「Even個真相未必係你承受得起?」我想再三確應。
「係。」
「咁我想問你愛情同阿武之間，你會點揀?」
「我一定會揀阿武。」
「咁如果要你一係捨棄畢生嘅愛情衣世都唔拍拖，一係要愛上阿武呢?」
「下?」阿勇不明白。
我深呼吸了一口，然後說出了事實。
「阿武之所以唔想見到Cherry，係因為佢一直都鍾意你。」