若你信了我的大話 我就能聽見你的真話: 8. 生母之謎 (下)

就在我心想今次GG了的時候，阿成的父親卻好像並不意外阿成會有此一問。他望了一望兒子，想了一會然後說
 
「其實自從上次比你睇到個短訊，我就有預感遲早我都係暪你唔住… 無錯，其實你阿媽一直都無死，佢仲好逍遙快活咁生活緊係衣個世界上…」
 
雖然早有這懷疑，但當這懷疑從父親口中得到確認成為事實時，阿成還是大吃了一驚，然後立刻捉著爸親的手激動地問
 
「點解你要一直呃我? 咁佢衣家到底係邊?」
 
「我呃你係因為我唔想你知道你阿媽係一個咩人… 我寧願你以為佢一直死左，咁你做人應該會開心d…」成父痛心地說。
 




「佢到底做過d咩?」沒想過是這答案，阿成沉寂了一會後問道。
 
「佢做過d咩? 哈，當年佢生完你無耐，連你第一個生日都未同你過就嫌我窮然後跟左第二個有錢佬走左去喇! 我仲記得佢拖住行李走果晚我抱住你喊住咁求佢唔好走，話你唔可以一出世就無左阿媽，我應承佢一定會努力搵錢養你地，但最後佢都係好狠心咁走左上個有錢佬架車… 我唔想你知道你阿媽一出世就唔要你，唔想你知有個咁冷血完全唔愛你嘅阿媽，所以我選擇寧願呃你佢死左等你唔會咁傷心…」成父激動地訴說著。
 
期待的喜悅與殘酷事實的反差讓阿成的臉色變得很差，不過亦讓他明白了父親的苦衷，沒有再為他的謊言而感到那樣生氣。
 
「咁點解衣家佢又會send message比你問你拎我嘅相?」隔了一會後他再問道。
 
「佢走左五六年後有日突然搵返我，話好掛住你想見下你… 我好惡咁鬧佢當年因為錢拋夫棄子，我唔想你知自己有過咁嘅阿媽傷心所以一直同你講佢已經死左，佢聽到後好傷心，但又贊同我嘅做法，所以佢最後應承唔會再話想見你，不過就希望我定時定候比一d你嘅相同資訊佢聽… 上次咁岩我唔記得左所以佢追我啫… 
 




阿仔對唔住呀，一直自把自為呃左你咁耐…」成父既傷心又帶著點歉疚，強忍著淚水說道。
 
二人再度陷入沉寂，明顯地阿成還是需要點時間去消化這消息。
 
「咁你係咪仲好嬲佢?」接著阿成再問。
 
「邊有可能唔嬲? 佢背叛我唔講，最重要係一生完你無耐就扔低你走左去呀! 佢邊有資格做人阿媽同老婆? 佢冷血架!」成父生氣地答道。
 
「不過如果你想見佢，我會明白亦唔會阻止你…」只是見兒子陷入沉默，隔了一會他又心軟再說。
 




「唔會喇，我會繼續當佢死左，我只有阿爸你一個親人…」阿成想了想後憐惜地對著父親說。
 
「你肯定?」成父臉色一喜，但又不敢相信想再確定一次阿成的答案。
 
「嗯… 佢咁對你同我，仲邊值得我原諒佢?」阿成半笑著說道，但我看得出那是一個自嘲的笑容。
 
「乖仔…」成父感動地捉著了阿成的手然後喊著。
 
 
之後他們兩仔爺就繼續普通的閒話家常，由於要一直陪著父親，所以阿成到離開都沒有和我聯絡。直至晏晝他才打電話給我。
 
「早知老豆突然主動坦白就唔駛搵你幫手啦。」感覺到他仍是苦笑著
說道。
 
「咁事前無人會估到嘅…」我安慰他道。




 
阿成:「點都好，多謝你幫手，仲要唔收我報酬。」
 
我:「咁我最後其實都無幫到D咩手。不過我好奇想問下，你真係唔想見你親生阿媽?」
 
阿成:「坦白講，自己親生阿媽其實邊有可能唔想見呀…我都好想親口問佢點解要咁對我… 不過我知阿爸心底入面仲好嬲佢，唔想我同佢接觸，所以我順佢意啫，始終一直都係佢一個人咁辛苦養大我，無野比佢嘅感受更重要。」
 
「嗯… 我明白。其實我唔收你報酬係因為我同你初初嘅故事都一樣，不過我媽係係我五歲果年遇上交通意外。」有感而發，我告訴了他自己不收他報酬的原因。
 
「咁橋? 咁你會唔會因為咁懷疑你阿媽都未死?」阿成帶點好奇地問。
 
「唔會， 因為我係睇住佢為左救我比車撞死…」我嘆了一口氣後說。
 
「…對唔住」阿成帶著歉意say sorry。
 




我:「唔緊要，都過左咁耐… 不過我想再問下，咁衣家你有無後悔知道左真相?」
 
「我都唔知… 一方面我應該為佢仲在生而感到高興，但當我知道左佢為左錢一生完我後無耐就扔低我，我個心入面又真係好唔舒服…」想了一回後阿成帶著點難過地答道。
 
「所以有時我都諗，幫人搵真相，其實係咪真係一定幫到人呢?」帶著點感慨，我拋出了一個自己都還在尋找答案的問題。
 
阿成:「衣個問題我都唔識答，不過我會覺得，人總係希望有選擇多過無選擇。」
 
我:「嗯… 可能衣個都係我要為自己追求嘅真相。」
 
其實，我知阿成的老豆並沒有講出事實的全部。因為當阿成問完第一個問題沒多久，我便感受到他老豆的所有情感和思緒，然後我便知道我的八達通是在和他說話之後才遺失的。事實上，在當天回到家後我亦馬上在房內的地上找到了它。由於我兩天都是穿同一條褲，昨晚我並沒把八達通從褲袋裏拿出來，所以很可能它是在我今朝早在掛架上拿褲的時候跌了出來而自己沒有為意。
 
說回正題，當時我能感受到阿成老豆其實對於阿成母親還是有很深的感情和思念。亦正因這樣，她的背叛才讓他受到更大的傷害。其實之前一直他都有定時把阿成的狀況告訴成母，因為雖然生氣和心痛，但心底裏他還是希望二人仍能保持著某一種的聯繫，代表著他們是血濃於水的一家人。
 
直至幾個月前，有天他在街上意外撞見了她。那時她剛從一架名車上下車然後把手撓在另一個老年男仕的手臂。從她身上華麗的裝束和服飾，看得出她正過著十分舒適和富裕的生活，亦恰好和還穿著破爛褲子一臉寒酸的自己形成了強烈的對比。




 
成母並沒有看見成父，但成父看見她後一種自卑感和憤怒在心底油然而生，於是一氣之下才沒再把阿成的近況和照片發給成母。
 
不過由於阿成沒問，我亦覺得這並不是甚麼重要資訊所以也沒有主動告訴他。
 
謊言的出發點可以是惡意亦可以是善意，但它們都有個共通點，就是當被揭破的一刻，都是同樣傷人。
 
而經過今次任務，我明白到以後講大話，一定要想一些不可能變成真話的大話才行。今次算是僥倖過關，不過這亦令我想起和曉嵐關係的其中一個轉捩點，也是和母親這事情有關。