自尋短劍 (己完結): 第14章

第14章

———我一直無放棄過音樂，經常都會拎住支木結他玩Busking。

———27歲嘅我，依然主要靠住街頭賣藝維持生活。

———有晚有個音樂監製呀Paul走埋嚟話覺得我唱得幾好，問我有無興趣去試音。

———於是我膽粗粗走上佢公司試吓。



———我無諗過自己真係有機會正式出道做一個女歌手，但呀Paul係我真正嘅伯樂。

———28歲嘅我，喺樂壇搵到一個位置，同另外兩個男新人唱咗一隻歌，可能叫做紅起咗…

———不過因為我唔想公開我嘅性別，我無同唱片公司同經理人公司正式簽約、只當係Free-lance咁樣合作。

———身邊少數識得我嘅人，好似Duncan、呀峰、呀聰、呀蕭、韓先生、大學同學等等都有恭喜我…

———我覺得成件事好夢幻，當然一首歌嘅成功並唔係我嘅最終目標。



———我開始同更多嘅本地歌手合作，名氣穩步上揚，但隨之而嚟嘅係有更多娛樂圈狗仔隊騷擾我嘅私生活。

———例如韓先生唔敢再約我出去，我亦唔敢上網識男仔，當紅嘅代價係令到我嘅性生活跌入死寂嘅黑暗。

———我不得不放棄我嘅音樂之路…

———原來我好怕有一日我嘅真實性別會被社會揭穿…

———我打從心底想去泰國…



———曾經，有好多人建議我去一轉泰國，將自己改造成一個真女人… 但我總會有理由去拒絕，覺得自己維持現狀完全可以無問題咁過生活…

———但呢鋪代價太大，我輸唔起，情願自己放棄僅有嘅男性依據，迫切渴望將自己無限接近女人…

———……

———三個月後，我獨自由泰國坐飛機抵港。

———手術… 成功咗…

———我問自己最想搵嘅人係邊個，但我鼓起勇氣撥打電話俾表姐，發現號碼已經停用，最終我都係一個人坐的士返屋企。

———當成為咗一個女人之後，我發覺已經完全失去咗自己…

———同下體一樣，變得一無所有，剩下一個空洞…



———花咗兩年嘅時間，我成功淡出咗樂壇，我一直打聽表姐嘅下落，結果，得到嘅消息係… 兩年前表姐自殺身亡…

———我接受唔到啊…

———我甚至未同妳正式講一聲再見…

———表姐，其實妳一直都係我的最愛，只係我一直唔肯面對，一直貪心喺男人堆度搵快慰…

———我喊咗幾日幾夜，如果19歲當日，我無喺手術室走出嚟，我地可能會一直相愛落去… 表姐就唔會咁諗唔開…

———當知道永遠失去妳…. 我嘅世界完全失去咗色彩…

———表姐，我想見妳…



———但我無自殺嘅勇氣…

———妳講得啱，我真係無撚用…

———……

———半年後，街頭Busking。

———「可不可與妳放膽嬉戲，忘掉日與夜那些限期…」

———我用女聲唱住一首表姐生前最鍾意聽嘅歌…

———Ping Pung - 愛是最大權利。

———唱出咗眼淚，唱出咗咽哽悲痛…



———曲終，有個男仔遞咗張紙巾俾我。

———就係呢一個暖心嘅動作，我將我一切一切，回饋呢個男仔。