《一個訂婚書生嘅出軌故事》: 【作者的話】

中秋節快樂！書生嘅第三部曲終於嚟到尾聲！

唔知道呢個結局，大家收唔收貨？

我糾結咗好耐個故事到底要點樣完結。由最初訂好大綱到今天，已經大幅修改咗三次。

最初嘅諗法：林書生唔再愛江柏琪，決定同佢分手，同鍾美嘉一齊，後來因為信任問題引致兩人不停懷疑對方。到鍾美嘉做咗正室，所謂開放式關係不再存在，佔有慾令到大家都想成為對方嘅唯一。知道對方講大話好叻，每一句簡單嘅交待都會諗對方係咪講緊大話呃自己，又出去偷食。猜疑導致相處不合，同樣落得分手嘅下場。寫到中段，覺得鍾美嘉同林書生嘅相處發生太多磨擦，初相識火花最旺盛嘅時候林書生都無分手嘅話，之後更加唔會為咗鍾美嘉（aka一個未必有未來嘅對象）而放棄擁有嘅嘢。所以Idea banned。

第二個諗法：江柏琪發現林書生出軌後，林書生因為內疚而分手。林書生同鍾美嘉嘅關係建基於江柏琪係正室嘅條件之上。分手同鍾美嘉交往，幻想變成貼地嘅現實，失去浪漫粉紅色泡泡。林書生後悔同江柏琪分手嘅決定，加上疫情wfh困住喺屋企無辦法抒發負面情緒，患上抑鬱症，決定自殺。林書生喺自殺前佢搵返每個在意嘅人見面，最後見面嘅係江柏琪。林書生提及對自殺嘅幻想同詳細嘅描述，江柏琪覺得唔對路，跟住佢去廢校，喺佢準備跳樓嘅時候救返林書生。之後一路陪佢見輔導，走過情緒低谷，最後同返江柏琪喺埋一齊。我又諗，好似林書生咁自私嘅人，會做對自己有利、開心嘅事，去自殺嘅機會比較低。所以Idea都係banned。





最終決定嘅結局：因為江柏琪同林書生嘅戀人關係理想，小缺點似乎唔足以構成分手嘅理由。林書生內心某程度期待出軌被發現，為穩定美好嘅關係搵到一個分手嘅理由。被正室揭發後產生無法再修補嘅裂縫；以第三者嘅身份相處，累積而來嘅失望令到鍾美嘉醒覺，回想起過往情感經歷，決定今次要自愛，對自己好啲，離開呢個重覆嘅遊戲，重刷新嘅人生。而林書生因為鍾美嘉打開咗情感嘅開關，學識咗感情對人帶嚟嘅傷害，改變咗佢嘅性格。

好難用關係去定義愛唔愛。（正室 vs 第三者）

好難用行為去定義愛唔愛。（男朋友嘅義務 vs 盡力陪伴第三者）

好難用思想去定義愛唔愛。（對正室嘅留戀 vs 對第三者嘅情慾）

「愛與不愛之間，存在好闊嘅光譜。」





情感唔可以非黑即白嚟介定。矛盾，無正確答案，係今個故事嘅中心思想。

三個人嘅關係因為愛與執著kick住，搵唔到出口，進退艱難。將三個人之間嘅牽絆放開，以時間治療內心嘅悲傷同遺憾，似乎係唯一嘅解決方法。

呢個結局，完唔完滿，係咪happy ending，我都唔識評價。

但對我嚟講，依個係最貼近現實嘅結局。


***





寫依個故事特別辛苦。

我希望自己嘅文筆有進步，去到可以出版嘅程度。上一個故《只》被編輯睇過後，評價可以改善嘅地方係內容鑽得唔夠深入，感情略嫌平淡。所以今次我嘅故事好集中，只圍繞住三位主角同埋出軌嘅思考。結果就奶嘢啦。

唔同過往隨心或者諗到個大綱就寫落去，今次出軌故真係諗得好深。三個角色過去嘅經歷，諗法，感受，點解會咁樣反應、會講咁嘅出話，每個細節都好認真思考。睇咗書、文章、論壇、詢問唔同出軌嘅人嘅心態，做咗啲research。我唔想讀者見到出軌故，一定會諗重甜；或者即刻屌鳩林書生出軌。我想寫一個現實，可以帶出思考，有深度嘅故事。你問得出，我都可以答到你點解會咁寫。每隻字都反覆疑問：角色點解會咁諗？如果呢個故事令你有反思，已經完成咗我嘅目標。

寫文經常好似神探伽利略咁閉上眼，想像自己係果個角色。有唔合理嘅地方，就改晒之後嘅劇情。（例如，本來林書生會搵PTGF Maisy去確認自己對鍾美嘉嘅心意係咪一時衝動；家境好嘅鍾美嘉唔鐘意林書生車出車入、送貴禮物；本來設定鍾美嘉係鐘意indie，但想突顯佢嘅平凡所以寫佢鐘意mirror；鍾美嘉為咗查證林書生說話真偽同埋被冷落有報復心態，而去同Parsons上床等等嘅情節。）改到阿媽都唔認得。

出軌依個題目太多矛盾，狂Loop攻守互換情節好痛苦。太過入戲，寫到就嚟精神分裂，成日寫到頭痛。每篇文我都會想像角色嘅感受（互換角色，仲要感受幾次），大癲。加上私人生活非常忙碌，好多人生大轉變接踵而來。好幾次好想放任暫停更新。好彩係當時開咗Patreon而唔係俾Payme code。覺得承諾咗，收咗人錢，就要交到貨。雖然筆錢好少，一個月都唔夠我返工一日嘅人工，但已經係好大嘅鼓勵。所以，唔好睇小你嘅一個正評，一個留言，真係寫作人堅持落去嘅動力。無你無我。

如果有follow其他作者IG，都會成日睇到佢地講，喺香港寫作嘅生活有幾咁艱難。唔係叫春，係真㗎！我去詢問出版實體書嘅資訊，都聽到好多打擊嘅勸喻。例如，出版社未必想幫我出呢個故事。OK，到考慮自資出版，字數太多，就算各方好友願意以友情價幫我接freelance，費用太高，銷量唔確定，就算我賣晒，都只係剛剛好breakeven到，唔好諗賺錢，除非你接受到本書design、排版好柒。雖然我無諗過出書會有錢賺，但都唔想課金做啲肯定蝕錢嘅嘢阿，唔long lasting！好撚灰阿！關於實體書嘅事，容許我稍後再update。

好多我以為係全職、產量好高嘅作家，原來都有正職。咪傻啦，靠寫文真係養唔到自己。將寫作當成夢想職業係戇居。對寫作無熱情，一定堅持唔到做咁耐義工。起身返放工搭車、犧牲睡眠時間去寫文⋯坦白講，我都唔知咁樣嘅生活，仲可以維持幾耐。過多一兩年，組織咗家庭，生埋個BB，仲有無時間寫落去？或者到時幾年先出一個故事，減低產量代替吧。Sorry，扯得太遠。





PS1. 完故我要休息一下。短期內唔會再寫愛情嘅故事，至多會寫吓愛情散文。未決定接下來會寫關於生活、心靈，定係擱置咗嘅恐怖冒險故事，隨心啦！點都好，記得follow我嘅IG (fuctoria)，得閒一齊吹吓水。
www.instagram.com/fuctoria

PS2. 寫依個故學識咗換位思考。啟發自《非暴力溝通》，當愈習慣step into others shoes，能夠從別人嘅角度出發去理解佢嘅顧慮，批判同恨意係少咗。以呢個態度做人，面對過去的傷害，會更容易釋懷，散發出更多愛同溫柔吧。

【廣告：Patreon限定番外篇進行中！】
請我飲杯咖啡～解鎖鍾美嘉同埋江柏琪視角～
預計連載時間：2個月（ 預計咋！）
https://www.patreon.com/fuctoria


***
Reference（有興趣請自行google研究）

1. 出軌比大家想像中普遍





約有２２％已婚男士曾經發生過婚外情，而已婚女士則有１４％。由於婚外情而離婚的比例佔所有離婚人士約１７％。這表示，每五對夫婦中就有一對經歷了婚外情。

https://www.hkpcc.hk/v2/zh-hk/psychological-classroom/page-ema.php?iframe=true&width=770&height=370

2. 七年之癢之前，其實仲有四年之癢

生物人類學教授Helen Fisher進行一項統計調查，指出雖然人們的平均婚姻年數為7年，但最多人離婚的時間卻是在第4年。而同樣另一項來自Larry A. Kurdek的研究，在500多對夫妻情侶中發現，戀愛關係的第一個轉捩點在第4年，而第7年則是第二個轉捩點。

https://www.hk01.com/sns/article/121570?utm_source=01articlecopy&utm_medium=referral

3.
》幸福嘅情侶同樣會出軌：身份認同、尋找另一個自己、與日常生活責任隔開、被理想化
》社會文化：古時大多政治婚姻，出軌反而係常態
》出軌比起戀情本身，更多嘅係尋找自我嘅中介




》斷聯唔係理想嘅中斷出軌嘅方式：需要學識認可回憶深刻嘅意義，將第三者同經驗分開

第三者的誕生：出軌行為的再思
https://www.books.com.tw/products/0010792595?sloc=main

4.美國和台灣的研究都發現，婚前同居過的人婚姻滿意度較差？

「婚前同居是否比較容易離婚、品質較差」的問題，多年來一直沒有一致的結果，基本上是一連串的羅生門，例如Manning與Cohen也發現同居與否和離婚無關，唯一可以確定的是：沒有穩定的結果發現，同居「有助」於婚姻。
https://pansci.asia/archives/74516
https://lescholar.pixnet.net/blog/post/116142891


5. Attachment 依戀模式 -「焦慮型＋逃避型」最災難的戀愛組合
https://www.ettoday.net/news/20200911/1806573.htm