《一個訂婚書生嘅出軌故事》: 一年
在我和鍾美嘉談完電話後回到餐廳的時候，Felix和Wade正準備離開。
「喂，林書生，時間有啲晏，我地返去先。」Wade對我說。
Felix拍拍我的肩膀：「再傾。」
「吓？」我未能反應過來，反射動作地說：「Bye.」
我只好無奈地坐下，看著Parsons。
「而家佢兩條友係咁，一夠鐘就趕返屋企。」Parsons說。
我以為他們聽到本人失婚和分手的消息，會大吃一驚，想要知道當中的故事，留下來安慰或者大喝特喝。
「無癮呀！」
「Wade話你食女當食生菜，下次再見你果陣無嘢㗎啦。」Parsons說。
『真係咩？』我心想。
看來，我真的離群太久，才意識到大家的生活轉變比想像中大。
對於預料之外的「被拋棄」，內心感受到穿透心臟的空虛和孤獨。
沒有誰能倚靠，最終還是由我一個人去面對所有難題。
只有鍾美嘉能在我需要的時候出現，耐心聆聽，撫慰我躁動的心靈。此時此刻，我特別想念鍾美嘉。矛盾的是，因為鍾美嘉，我才會衍生出後續的情緒。
「其實我都變咗。」我說：「不知不覺，鍾美嘉已經出現喺我生命一年。」
對我來說，她從來都不是走馬燈的存在。不再是Wade口中的「食女當食生菜」。
「不在乎天場地久，只在乎曾經擁有呀。」Parsons說。
「頭先鍾美嘉打電話嚟辭工。」
「係？」
「由圍封開始，鍾美嘉好似下定咗決心要同我斬纜。無論我點約，佢都有藉口拒絕。Block咗我IG，Delete埋我地嘅Playlist，試圖抹走關係嘅連結。佢咁做到底係乜嘢意思？啲回憶記喺心入面，真係襟個制就可以Delete晒？」
「但係Mika乖乖地果陣你冷落佢，嫌人煩。」Parsons質疑。
「我果陣時同江柏琪拍緊拖，個Capacity唔同。而家可以擺返多啲時間喺鍾美嘉身上。」
「你覺得自己對鍾美嘉嘅感覺係點？」
「愛，如果唔係，點解我會大老遠特登送飲醉嘅佢返屋企，早啲返屋企休息唔好？只不過，我對佢嘅愛並唔單純，唔係大愛嘅『無論佢點樣對我，都會對佢一樣好』，而係視乎『佢用咩程度對我，調節到理想嘅平衡點』。心意擺喺心入面就足夠。我嘅諗法好受鍾美嘉嘅行為影響，滲透住一份執著同貪心。」我補充：「唔係唔愛，只係我愛自己多啲。」
Parsons解釋：「點解忽冷忽熱，點解突然消失唔肯聯絡見面？因為到咗臨界線，大家都怕受傷，唔敢再踏出多一步。每當其中一個人選擇退縮，另一個人未到臨界線，佢就不明所以，將對方保護自己嘅行為解讀成唔愛自己。你同佢，不停角色互換。
你地兩個都係自私。愛嘅同時，好多計算，互相猜疑，唔信任自己值得被愛，唔信任對方真心愛自己，所以先會有咁嘅結果。你地成日話自己係乜嘢Open relationship，真係做到嘅話，唔應該有咁多計算。如果你兩個好似江柏琪咁將對方擺喺第一位，唔會理會對方愛唔愛自己，順從自己心意為對方設想，就唔會有而家嘅問題出現。」
「起初係好理想，相處好舒服，到真係一齊之後，段關係就變咗質，慢慢俾各種心魔佔據，唔再可以單純地享受呢段關係。」我說：「例如，之前鍾美嘉話中咗COVID，我硬係形住佢呃我。」
「呢頭話完你多猜疑，果頭又發作。」Parsons說：「我知道佢真係中咗COVID，亦都好返。」
「你有同佢傾計？」
「睇Story見到。」
「係囉，哈哈，我覺得你作為IG朋友，知道鍾美嘉嘅近況可能仲多過我。」我問：「咁佢IG有無咩Post或者Update？」
Parsons打開鍾美嘉的Instagram：「你自己睇啦。」
結果，一眼滑過她那只得數張照片的頁面，她沒有新的貼文，大概她一直只張貼限時動態。
「有樣嘢你肯定唔知。」Parsons說。
「係咩呀？」
「佢Quit咗U，準備去英國讀書。」
「吓？」
「英國九月開學丫嘛。」
「我從來都無聽過佢有去外國讀書嘅諗法。」
「應該係舉家移民。」Parsons說。我想起大廈圍封的時候，鍾美嘉說過父母會去英國兩星期，大概是在視察環境。原來一早有端倪。
「你點知㗎？」
「Mika醉咗果晚自爆晒出嚟。包括做咗你第三者嘅事，準備移民嘅事。佢不停講自己愛你，但又覺得同你無未來，喊得幾淒涼。」Parsons續道：「所以我信你地兩個係認真，先話你地自私。明明兩個人都好在意，偏偏因為各種各樣奇怪理由去疏遠對方。」
「⋯」鍾美嘉要離開，我的腦袋無法運作。
「佢選擇唔話我知，就咁粒聲走咗去，算點？」想到從此分道揚鏢，我既憤怒又難過。
「你好好同佢道別，唔好留底遺憾。」
「鍾美嘉幾時走？」
「我唔知佢坐邊一班機，要打聽下。本來訂咗機票走，但因為中咗COVID先延咗期。」Parsons發短訊給他認識的現屆莊員。
「痴撚線！佢真係諗住不辭而別！」我說：「你唔早啲同我講！」
「大佬呀，你同佢咁close，我點估到你會唔知姐！我聽到你同佢斷聯先發現你唔知！」
「今晚太衝擊，成個人function唔到。」
「我都係打電話去問穩陣啲。」Parsons致電後輩：「喂，係呀，想問你知唔知Mika幾時飛？咩話？聽朝十一點？你地全莊會去送機？哦⋯我唔去啦，要返工呀。喂，唔該晒。」
Parsons說：「嗱，你聽到啦，聽朝十一點。我幫到盡㗎啦。」
「埋單。」我舉手結賬：「我去太古城搵佢。」