《一個訂婚書生嘅出軌故事》: 薛丁格的愛情盒子

「點解你覺得做正室唔一定會幸福？」我問鍾美嘉。

「你覺得做你女朋友幸唔幸福？」她反問。

「佢唔知道我出軌，所以應該係幸福嘅。」

我想，出軌跟薛丁格的貓擁有相同性質，不出軌意味著「幸福」和「不幸福」兩個未知的可能。

當出軌行動干預了愛情盒子呢，其觀察結果便只剩餘「幸福」或「不幸福」當中一個選項。





「我覺得兩個人一齊最重要係坦誠。」鍾美嘉言下之意是，被欺騙不幸福。

「即使對方做咗啲對你唔住嘅事，你都同樣係咁諗？」

「係，我寧願知道對方一腳踏兩船，都唔想佢呃我。」她認為坦誠比專一重要：「正室唔等於大晒或者一定會幸福過第三者！我夠做過正室，咪又係俾男人呃，佢地嘅謊言推翻晒我地之間嘅回憶。我唔想相處時每一句話都要諗對方係咪呃我，我想要真實嘅感情。」

「但係知道咗被另一半背叛，咪等於分手。點可能坦誠？」我說。

「可能唔會呢。點解要抹殺開放式關係嘅可能性？」鍾美嘉說：「如果選擇謊言，喺第三者角度，我可以擁有最真摯誠實嘅你，而呢樣嘢，我相信正室唔會體會到。你對住佢，永遠都會收埋好多秘密。」





她續道：「當我知道對方嘅真實諗法，就有權利去作出選擇。無論結果係點，都係我自己攞嚟。正室根本無呢個機會。正室受道德制約，一旦意外知道咗對方出軌，大部份人都會選擇分手。

主角同第三者賭上身敗名裂嘅風險，經歷過內心掙扎、重重難關依然堅持發展出軌嘅關係。當建立咗感情基礎，呢段脫離咗社會制約嘅關係唔係更長久，更難分開咩？撇除外在嘅因素，分開只會單純因為兩人之間嘅問題。

呢段睇起上嚟複雜嘅關係，其實更純粹，因為大家出發點只係忠於本能。從呢個角度睇，做第三者唔係比正室好咩？當你接受到其他人同時擁有正室，認同愛唔等同佔有，而係兩個超越限制，自然靠近嘅靈魂，大部分人嘅相處問題已經唔再存在。」

一般來說，我們會用以形容沒有名份的SP關係，很少人會如此堂堂正正地讚頌破壞別人感情的行為（雖然牛不喝水按不到牛頭底，有份出軌的我沒有資格批評鍾美嘉的說法）。

聽起上來邏輯怪怪，扭曲了我的價值觀。她的思想比我更前衛。





「你真係可以做到咁超然豁達咩？對於愛嘅人難免會產生妒忌心、佔有慾，因為在意，所以有更多陰暗面誕生。即使你思想幾咁脫離道德規範，行動上依然要依隨社會嘅規則。兩個相愛嘅人可以光明正大咁走埋一齊，我相信做正室至少會幸福過做第三者。」

正室起碼不用偷雞摸狗，免去作賊心虛的痛苦。

我和鍾美嘉偷情能夠做的事情有限，即使多想展示真誠的自己，最多也只能佔據一星期裡偷情的一天半晚而已。

鍾美嘉說：「係，可以堂堂正正當然係好事。但我想帶出嘅係，大部分人諗嘢太過非黑即白。點解出軌一定係錯？假如因為遭受家暴、政治婚姻、言語暴力、聚少離多等等嘅理由而出軌，仲係咪錯呢？世界上有100%係一定嘅事咩？點解要用可恨嘅道德去可以抹殺愛嘅可能性？因為呢件事唔係發生喺佢地身上，針唔桔到肉都唔知痛。

我嘅願望係，開放式關係能夠變成主流，無論專一定係多人嘅關係都可以向呢個世界坦盪、誠實。咁樣先係對想專一嘅正室公平，不被欺騙，俾返個選擇權佢地。因為社會唔容許開放式關係嘅存在，先會有咁多謊言嘅出現。

一個人，只能夠愛一個人唔係自欺欺人嘅笑話咩？我地有另一半，咁父母、朋友呢，係咪就唔洗愛佢地？如果凡人口中嘅愛係咁偉大，咁點解佢地可以拍多過一次拖？佢地嘅行動真係乎合佢地嘅說法咩？佢地只係以愛勒索他人以滿足佔有慾嘅偽善撚！佢地根本唔知道乜嘢叫愛一個人。」

「有幾多人會接受到自己另一半出軌都仲願意喺埋一齊阿？坦白講，如果掉返轉頭係我女朋友出軌，我都未必接受到。」我說。

雙重標準是正常事，正如許多人容許自己和異性外出見面，但當看到另一半和異性聊天傳訊息已足夠叫人發瘋。





「咁係你唔夠愛對方，同埋對兩個人之間嘅關係無信心姐。」鍾美嘉說：「我覺得真正嘅愛情，唔係我綁住佢，限制佢必須做乜、唔可以做乜。而係我放任佢自由，佢喺呢個花花世界遊走，遇過比我好嘅人，卻依然選擇留喺我身邊。再講，我相信即使有開放式關係嘅選項，世界上依然有好多人會選擇專一。」

「你之前無因為對方出軌而分手咩？」我問。我想知道，她經歷過什麼事件，才會由一張戀愛白紙，變成容易受傷的女人，誕生這種奇怪想法？

「係，我三個前度都有出軌。但我係因為喺佢地身上感受唔到以前嘅愛意，而唔係因為出軌呢個行為而分手。兩者之間係有好大差異。」

「失敗咗咁多次，你都仲係好勇敢去追求你嘅愛。」

「我無失敗，只係驗證到佢地唔係我想搵嘅人姐。」鍾美嘉說。