《一個訂婚書生嘅出軌故事》: 亮相
「搭巴士返屋企？」打籃球散場及洗澡後，Parsons問我。
「今日唔返去住。」因為深水埗運動場距離南昌很近，所以我沒有駕車。
我續道：「我打算行去深水埗。」
「去黃金買Game阿？一齊啦。」
我們往深水埗的方向出發。
「唔係，約咗朋友去飲咖啡。」
「大師兄歸位，有新女！恭喜晒！」
「喂，我都無講過係女。」
「屌，唔通男人老狗約埋去打卡Cafe？」Parsons說：「又密密Check電話，睇穿晒你啦！」
「我覆江柏琪唔得㗎？」
「你拍拖頭三個月就咁密密覆姐，之後撚有咁好。成晚咪掂果一兩次電話。」
我無視Parsons對我的評價：「有無文青妹會鐘意嘅Cafe介紹？」
「你派啲花生嚟，我介紹俾你。」這人比女生更八卦！
「無花生呀。」
「上次個Mika？」
Parsons見我遲疑，語氣著急：「快啲講啦。」
「係呀。」我沒好氣地回答。
與鍾美嘉出軌一事已在我心中發酵了三個多月，整理好心情和想法後，也是可以和信任的朋友分享。獨個兒使壞很寂寞，總要找些臭味相投，能夠接受自己的人告解。
出軌讓我內心矛盾交戰。在精神獲得極大的滿足同時，也為我帶來很大壓力與疑惑。
我不希望鍾美嘉只存在於無人知曉的角落。我把她視作半個女朋友，甚至想將她介紹給朋友。這段關係，應該要有更多人為我們做見證。
我和鍾美嘉的關係是真實存在的。
「真係㗎？食咗未？」Parsons最關心的事。
「食咗。」
「好無食？」
「OK啦。」我心想，鍾美嘉不止OK，是非常OK。
「介紹嚟得唔得？」
「呢個唔得！我要私有化佢。」我覺得這段對話有點瘋狂。
我真的老了。想起從前Parsons和我是對襟兄弟，將女人當成玩物，在背後交換食評，竟有些遲來的羞恥和愧疚。我們對那些女生欠缺一種尊重，雖然部分在歡場的她們根本不介意。
我不想他打鍾美嘉的主意。
「沉船呀？」Parsons說。
「係，仲係好沉果隻。」我說：「我同江柏琪一齊三年一直都好乖。」
「你係因為鐘意Mika，所以破戒。」
「係阿。如果唔鐘意，我唔會冒咁大風險出軌。」
「Mika有咩特別？」
「唔識講。總之我一見到佢，就成個人著晒魔好有感覺。俾佢撩一撩，係完全控制唔到自己。」
「屌，好撚青澀。我好耐都無試過依種感覺。」Parsons說。
「我對鍾美嘉心動嘅程度，同初戀（林敏兒）同埋江柏琪有得揮。」事實上我很少經歷類似的怦然心動：「唔通係因為佢留齊蔭，有情意結所以加分？我同初戀拍拖果陣，佢都係留齊蔭。」
「你係Dry得太耐，咁啱有個條件唔錯嘅青年少艾同你玩先沉船姐。搵多幾條女玩返，就唔會生疏。」
「真係咩？之前喺其他Department返工都有過靚女對我有好感，但我真係無Feel。」
「果陣仲係熱戀期，而家三年之癢阿。」Parsons說：「唔試過沉船，邊好玩㗎。」
「即使另一半條件有幾好，相處幾融洽，幾鐘意對方，同出軌都可以無關係。原來出軌係一件好獨立嘅事。」
「姐係點？」
「姐係，鍾美嘉係一個令我心動嘅對象。我唔會因為有江柏琪，而唔鐘意鍾美嘉。」
喜歡就是喜歡。
Parsons說：「係咪衰呢，都叫咗你唔好咁快結婚。得果廿五歲邊度會玩夠。」
「唉，講起結婚，我都覺得有啲煩。」我說：「琴日去咗同江柏琪父母食飯。」
「跟住呢？」
「去之前，我同江柏琪周圍睇酒席。我開始質疑自己，係咪真係要繼續同江柏琪結婚？呢個念頭閃過嘅一刻都幾震撼，因為依三年嚟，我係第一次考慮同江柏琪分開。」
「江柏琪同Mika依兩個人，對你嚟講有咩唔同？佢地係咪性格相反？」Parsons問。
「江柏琪係一個令我安心、老婆型嘅結婚對象。我地經過情侶磨合嘅階段，生活習慣相近。我好肯定同佢結婚，往後幾十年嘅相處都會好穩定。」
「鍾美嘉外表同性格係我一向鐘意嘅類型。性格有啲似⋯我以前鐘意嘅人嘅混合體。對我感覺真誠，有少少公主病，活潑，諗嘢同做嘢古靈精怪。佢係一個同我一樣咁矛盾、性格多變嘅人。最加分係淫底。」我續道。
「難聽啲講，自從江柏琪出咗嚟做嘢，性格改變，無以前咁活潑，份人奄尖咗好多。佢都仲係一個靚女、好老婆，不過因為性格，減少咗異性嘅吸引力。鍾美嘉多多少少都彌補到我喺江柏琪身上失去咗嘅熱戀感覺。」
我說：「可惜偏偏喺呢個時間點上遇到鍾美嘉，錯晒Timing。」
Parsons回答：「計我話，Timing啱就真。鍾美嘉顯得特別吸引嘅前設係有江柏琪嘅存在。如果佢喺你單身嘅時候出現，你根本唔會沉船。」
「我有考慮過呢個可能性。我唔知呀。」我回答。
「咁你而家打算點？」Parsons正經地說：「如果Felix喺度，實會話如果你打算修身養性結婚，應該要狠心斬纜。」
「我想同鍾美嘉Keep住依種關係，繼續同江柏琪結婚，係咪好撚仆街⋯」我的聲音愈來愈小。
「你問個出軌當飯食嘅人，緊係唔覺得你仆街。不過前設係我對果啲女仔無乜感覺，先可以咁瀟灑。」
Parsons站回我的角度分析：「你地三個人對大家嘅影響係分唔開。只要第三者一日存在，佢都會影響到你同正室嘅關係。」
「我開始感受到你講嘅影響。」例如與江柏琪的性事、以及因內疚感而想逃避相處。與她是否知悉我出軌無關。
「唔緊要啦，結咗婚都可以離婚，更何況你地未結！」Parsons笑說。
「屌你啦，結得婚就緊係唔想離。」
「你咪Enjoy吓而家呢種忐忑嘅感覺，係上天俾你嘅祝福，唔係成日有㗎。」
「講起結婚，諗起都煩。琴日江柏琪父母獅子開大口，禮金想要十八萬。」我憶起昨天和江柏琪見家長的情況。
「呢個時勢禮金仲要十八萬，傻的嗎。」這樣的話，結一次婚的洗費可是多於三十萬，接近我一年的薪金，是個非常沉重的負擔。用來洞蜜月旅遊更划算吧，至少自己有享受到！
「我廢時出聲得罪外父外母，等江柏琪私下同佢父母溝通。若然佢地堅持要十八萬禮金，都要俾㗎啦。」
我差不多忘了五分鐘前，自己還在糾結是否仍要和江柏琪結婚。
「贖身劵，你再一次拯救咗深淵家庭嘅江柏琪。」
「喺琴晚嘅飯局，當我一直同佢父母講會好好照顧江柏琪，會愛護佢嘅時候，就覺得好諷刺。」
我說：「隨住時間嘅流逝，自然會作出選擇。我內心嘅質疑，亦隨之會搵到答案。」
「可能今個月你同Mika已經玩完。呢啲關係，一向都係隨時完結，講唔埋嘅。」
「無辦法預計到咁多。」我說。
「嗯。」
褲袋中的電話一震，原來是鍾美嘉打來。我相約她在深水埗地鐵站見面，打算接她到大南街。
「啱啱鍾美嘉打嚟。」我說：「你又話介紹Cafe俾我。」
「呢間Cafe啲咖啡同蛋糕都好高質。偏貴所以唔算話排好耐隊。」Parsons將該咖啡店的資料轉發給我。看到資料圖片感覺不錯。
「你會唔會想同佢打個招呼？」我想正式將鍾美嘉介紹給Parsons認識。
「唔洗啦。廢時尷尬。」Parsons拒絕了我的邀請。