《一個訂婚書生嘅出軌故事》: 純潔的一片淨土
我相約鍾美嘉下班後在公司對面的超市見面。
「你有無邊度想去阿？」我問鍾美嘉。
「我未諗到阿。」鍾美嘉笑笑：「我地行陣？」
「太古城？」
我心裡想著，下班後在太古城中心逛街，遇到同事的機率頗高。我自己偶爾也會到太古城中心逛一下才坐車離開。
撞到兩人逛街又有什麼奇怪？
也有不少我和女同事逛街的合理解釋阿——順路、在一起去地鐵時對方說陪她逛一下、一起為即將生日的上司預訂蛋糕特等。
根本就是自己心虛嘛！
「行超市。」她說。我們在超市徘徊，鍾美嘉朗讀和評估每樣產品的價錢。
「牛奶六蚊，正常價。」
「鮮蘋果汁廿八蚊一支，有啲想買。」
「買囉。」我說。
「但係Asahi十五蚊一罐咋喎！好抵！」
「買埋囉。」我回答，想想便覺得不對勁：「你識Asahi，原來上次係扮唔識飲酒！」
鍾美嘉說：「你上次點果隻黑啤，係Asahi嘛，我有留心㗎！」
「算你啦。」我當作她的意思，是因為我才認識（人人都知道的）Asahi。
「我啲莊員都會飲酒，都一齊喺豬欄飲過幾次。」
「你地飲咩呀？」我豎起耳朵，想要聽清楚她說的話。鍾美嘉會去飲酒一事讓我有點不悅。
「Jolly Sandy.」她說。
「會唔會係咁。」聽後倒是讓我哭笑不得。Jolly Sandy是汽水來的吧！
「係阿，佢地好渣，飲Jolly Sandy已經臉紅晒、腳步浮浮，好搞笑。」
鍾美嘉打開手機相簿，向我展示一張照片：「最渣果個男仔！飲咗一罐Jolly Sandy就醉，仲要嘔晒啱啱食完嘅公仔麵落地下。」
「嘩，睇見都覺得臭。」那人坐在地下，沒有對準手抱的垃圾桶，一半的嘔吐物都吐在地下。
感動！他們是少數未經社會催殘的純潔淨土！我還以為00後普遍經驗豐富，身經百戰。
「真係好臭。抹完成間房都仲係一陣味。」鍾美嘉說：「本身大家諗住喺豬欄過夜，最後臭到頂唔順要搭的士返屋企。」
「因住俾學校投訴，收返個Soc房唔俾你地用。」
「點會呢，SU有成三十幾年歷史，傳統都係咁。Polling完咗咪慶功，好合理吖。」
「欵，邊有一定㗎。我成日覺得，傳統不過係由人創造出嚟，會隨時代改變嘅。」就像以為堅不可催的感情，有一天還是會改變。
「都係嘅，例如以前用現金，而家就有電子支付。可能未來有腦電波支付，連電話都唔洗用。」
「唔係喎，我好似睇過單無人超市嘅新聞，客人拎貨走就自動俾咗錢。」
「係咩原理？」
「人臉識別同埋晶片技術呀，幾High tech！」
「你覺得呢啲係咪科技嘅進步？」她問我。
「睇你點定義『進步』呢樣嘢啦。」
「現金都有佢嘅存在價值，科技嘅進步係帶俾人多一個選擇姐。」我說：「變咗IT狗，好似扯得遠咗。」
「哈哈。果晚仲好難得同埋其他莊一齊飲，好好玩。」鍾美嘉說：「我入嚟個陣風頭火勢，學生會無搞O Camp。而家好似彌補咗Freshman時無玩O Camp嘅遺憾，雖然我入嚟咗嚟學校先得果三個月。」
「啱呀，讀書緊係要玩多啲。」
「你而家有得玩我，都開心吖。」鍾美嘉雙手捉住我的手在搖晃。
「低B，邊個得閒玩你。」我彈了她的額頭一下：「醒未呀？」
「哈哈。」她笑笑便放開雙手。
「咁除咗同莊員，你有無飲開酒？」我對於鍾美嘉耍弄胖虎的行徑感到疑惑。
「爸爸媽媽好鐘意品酒，所以我有時會一齊試吓啲紅酒同香檳。我啱啱先夠十八歲，都未有幾多機會去酒吧見識。」
「唔怪得之你咁飲得，原來訓練有素。」鍾美嘉的話似乎成功釋除了我的疑慮。
她仍只是一個十八歲的女生，我把她想得太壞了。雖然我不懂為何飲酒算壞，明明我其身不正，沒有資格對她批評。
「你帶我去見識見識就真。」
「我推薦啲Cheap酒俾你失禮晒，失敬失敬。」我說：「讀書果陣，大家都係學生無錢求醉。我返過果間酒吧Part time又係半劈場賣Cheap酒，都真係唔太認識啲靚酒。」
「你喺酒吧度打過工？」鍾美嘉對此很好奇。她眼睛睜大，停下腳步，回頭問我。
「係阿。」
「睇唔出喎！」
「唔該借借。」鍾美嘉站在陝窄通道的中心，擋住了客人的道路。
「Sorry。」她讓路，又轉頭對我說：「你個樣咁斯文，竟然會去啲劈場返工。」
「你個樣都唔似咁咸濕啦！」
「人地係鐘意你，情不自禁。」
「我地呢方面都有啲似。」我說。
「邊方面？咸濕？」
「都係。」
她說：「呢個世界邊個人唔咸濕？Sex is always considered as basic need. 一個人唔咸濕，一係佢身體出咗問題；一係佢好可憐，未曾嘗試過性愛嘅美好。」
「我某程度上同意你嘅講法。」
難道是我沒有為江柏琪帶來高潮，所以她不喜歡和我做愛？
「但係都有啲人天生性慾無咁強㗎嘛。」我自我安慰：「認真望你下唇原來都幾厚，我知你一定好強。」
凝望了鍾美嘉的櫻桃小嘴，又開黃腔講笑，好想親下去。
林書生，別忘了這裡是公開場合，君子一點。
「哈哈。」鍾美嘉說：「你知唔知我突然諗起啲咩？」
「唔知。」我回答。
「Free our nipple！身體自主！」她在大庭廣眾以雙手摸著自己的胸部：「希望有朝一日，我可以好似啲麻甩佬咁，唔著上衣，裸體遊街。」
若果江柏琪有鍾美嘉一半好色和開明便好了，我無法想像有一天連同性戀也不接受的江柏琪會忽然對我說想要「Free our nipple」。
「身為男士嘅我，完全無依個慾望。」
「咁，你仲覺得同我邊度似？」她問。
「表裡不一？外形同內心好唔夾。」
「哈哈哈，好多人都咁話過我。我認證。」
這種臭味相投，也是鍾美嘉能夠吸引我的特質之一吧。
只有短短的十分鐘的對話，卻讓我更了解她多一點。
我目睹到鍾美嘉格價的師奶仔模樣、她會和莊員一起喝Jolly Sandy、原來沒有到過酒吧幾次、自小會從愛品酒的父母中偷嚐美酒、對我曾在酒吧工作感到好奇、有Free the nipple的慾望⋯
我總是很喜歡和鍾美嘉隨心又交流到價值觀的對話，期望有什麼新想法能衝擊我的腦袋。
她是一本很耐看的劇集，每次翻閱都叫人忍不住一直追看下去，叫人廢寢忘餐。